ក្រុងប៉ោយប៉ែត ៖ ដើម្បីក្រពះអ្វីក៏ហ៊ានធ្វើដែរ បើទោះជាដឹងថា ការឆ្លងព្រំដែនពេលយប់ចូលដីសៀមខុសច្បាប់នឹងជួបគ្រោះថ្នាក់ផ្សេងៗក៏ដោយសំរាប់កម្មករក៏ដូចជាអ្នកលក់ដូរបន្លែ ត្រីសាច់ នៅក្រុងប៉ោយប៉ែតតូចតាចនៅតែចូលទៅដីសៀមនាវេលារំលងអធ្រាត្ររៀងរាល់យប់ ដើម្បីទិញបន្លែ ផ្លែឈើ ឬត្រី សាច់យកមកលក់ដែរ ដោយខ្លះទូល ខ្លះរែក
ក្រុងប៉ោយប៉ែត ៖ ដើម្បីក្រពះអ្វីក៏ហ៊ានធ្វើដែរ បើទោះជាដឹងថា ការឆ្លងព្រំដែនពេលយប់ចូលដីសៀមខុសច្បាប់នឹងជួបគ្រោះថ្នាក់ផ្សេងៗក៏ដោយសំរាប់កម្មករក៏ដូចជាអ្នកលក់ដូរបន្លែ ត្រីសាច់ នៅក្រុងប៉ោយប៉ែតតូចតាចនៅតែចូលទៅដីសៀមនាវេលារំលងអធ្រាត្ររៀងរាល់យប់ ដើម្បីទិញបន្លែ ផ្លែឈើ ឬត្រី សាច់យកមកលក់ដែរ ដោយខ្លះទូល ខ្លះរែក ខ្លះលីចេញពីច្រករបៀងមួយចំនួននៅក្បែរកាស៊ីណូផ្កាយ៥ ស្ថិតក្នុងភូមិក្បាលស្ពាន ខាងជើងផ្លូវជាតិលេខ៥។
ច្រករបៀងដែលគេធ្វើស្ពានឱ្យកម្មករឆ្លងទៅមកចូលដីសៀមនោះមានជាច្រើនកន្លែង ហើយសម្រាប់ទំនិញដែលគេទិញពីសៀមយកមកលក់នៅដីខ្មែរ គឺគេអាចចេញចូលទាំងយប់ទាំងថ្ងៃ។ ពេលថ្ងៃចេញចូលសម្រាប់តែកម្មករទៅធ្វើការនៅផ្សារលុងក្លឿ គឺទៅព្រឹកវិលវិញល្ងាច ឯអ្នកលក់ដូរទំនិញបន្លែ ត្រី សាច់ និងផ្លែឈើ គឺគេចូលទៅដីសៀមពេលយប់ លុះភ្លឺឡើងទើបនាំគ្នាចេញមកវិញ ខណៈច្រកទ្វារអន្តរជាតិប៉ោយប៉ែតពុំទាន់ទាំងបើកទ្វារព្រំដែនផង បន្លែ ត្រី សាច់ និងផ្លែឈើ គឺមានលក់ព្រោងព្រាតបាត់ទៅហើយ។
ក្រុមអ្នកលក់ផ្លែឈើអម្រែកក៏ដូចជាអ្នកនាំបន្លែត្រីសាច់ចូលពីដីសៀមបានប្រាប់ថា ពួកគាត់បានចូលទៅដីសៀមនៅវេលារំលងអធ្រាត្រខ្លះថា ទៅម៉ោង៣ ខ្លះថា ទៅម៉ោង៤ ឬ៥ទៀបភ្លឺដោយបង់លុយឱ្យសមត្ថកិច្ចព្រំដែនបន្តិចបន្តួចរួចនាំទំនិញចេញមកវិញជាការស្រេច។ ជុំវិញបញ្ហាការចេញចូលតាមច្រករបៀងដោយផ្សងគ្រោះថ្នាក់ចូលទៅដីសៀមនាពេលយប់ លោកអនុសេនីយ៍ទោ សួង សៅ ប៉ូលិសការពារព្រំដែនគោកវរសេនាតូចលេខ៩១១ដែលទទួលខុសត្រូវបន្ទាត់ព្រំដែនចំណុចនោះ ពុំអាចសុំការបំភ្លឺបានទេ ព្រោះទូរស័ព្ទរបស់លោកគ្មានអ្នកទទួល។ ប៉ុន្តែទោះបីជាបែបណាកន្លងមក សមត្ថកិច្ចព្រំដែនធ្លាប់ប្រាប់ថា កម្មករដែលធ្វើការឆ្លងដែនចូលទៅដីសៀមតាមច្រករបៀង គឺសុទ្ធតែជាអ្នកក្រីក្រគ្មានលុយធ្វើប័ណ្ណឆ្លងដែនទើបចូលតាមច្រករបៀងបែបនេះ ហើយប៉ូលិសព្រំដែនប្រាប់ថា ពួកគេអាណិតទើបឱ្យចេញចូលដោយពុំមានការយកលុយយកកាក់ទេ។
គេកត់សម្គាល់ថា កន្លងទៅថ្មីៗនេះសមត្ថកិច្ចសៀមបានប្រមូលចាប់ពលករខ្មែរជាង១០០នាក់ក្នុងផ្សារលុងក្លឿដោយចោទប្រកាន់ថា ឆ្លងដែនខុសច្បាប់។ ដូច្នេះដើម្បីបញ្ចៀសការចោទប្រកាន់ ឬមើលងាយមើលថោកពីសំណាក់ភាគីសៀមសង្ឃឹមថា សមត្ថកិច្ចនៅតាមច្រកខាងលើ នឹងធ្វើការទប់ស្កាត់មិនឱ្យប្រជាពលរដ្ឋខ្មែរផ្សងគ្រោះថ្នាក់តទៅទៀតនោះទេ ហើយក៏រំពឹងថា អាជ្ញាធរនឹងជួយរកវិធីឱ្យប្រជាពលរដ្ឋអាចរស់បានក្នុងមុខរបររបស់ខ្លួនដោយមិនចាំបាច់ខ្ចីដង្ហើមសៀមដកតទៅទៀតដែរ ៕
ចែករំលែកព័តមាននេះ