រាជធានីភ្នំពេញ​៖​ ​​សេចក្តី​ជូន​ដំណឹង​របស់​រដ្ឋបាល​រាជធានីភ្នំពេញ​ បានឱ្យ​ដឹង​ថា​ រដ្ឋបាលរាជធានី​ភ្នំពេញ នឹងរៀបចំពិធីសម្ពោធដាក់ឱ្យប្រើប្រាស់ជាផ្លូវការនូវ​ស្ពានខ្សែកាបតភ្ជាប់រវាងតំបន់​អភិវឌ្ឍកោះនរា និងតំបន់អភិវឌ្ឍកោះពេជ្រ ដែល​ស្ថិតនៅសង្កាត់និរោធ ខណ្ឌច្បារអំពៅ រាជធានីភ្នំពេញ នៅថ្ងៃទី១៥ ខែវិច្ឆិកា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត។

តាមសេចក្តីប្រកាស ដើម្បីឱ្យកម្មវិធីខាងលើ ប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្ដាប់ធ្នាប់ និងព្រមទាំងបញ្ចៀសបាននូវការកកស្ទះចរាចរ រដ្ឋបាលរាជធានីភ្នំពេញ នឹងធ្វើការផ្អាក​ចរាចរជាបណ្ដោះអាសន្នយានយន្តគ្រប់ប្រភេទ ដែលធ្វើដំណើរឆ្លងកាត់​ស្ពានខ្សែកាប​​តភ្ជាប់​រវាងតំបន់​អភិវឌ្ឍកោះនរា និងតំបន់អភិវឌ្ឍកោះពេជ្រ និងជុំវិញទីតាំង​ប្រារព្ធពិធី ចាប់ពីវេលាម៉ោង ២៤:០០នាទីយប់ ឈានចូលថ្ងៃទី១៥ ខែវិច្ឆិកា ឆ្នាំ២០២៣ រហូតដល់បញ្ចប់កម្មវិធី។

រដ្ឋបាលរាជធានីភ្នំពេញ បានប្រកាស ជម្រាបជូនបងប្អូនប្រជាពលរដ្ឋ ដែលត្រូវធ្វើដំណើរឆ្លងកាត់​តាមផ្លូវខាងលើ មេត្តាជ្រាប យោគយល់អធ្យាស្រ័យ និងបញ្ចៀសការធ្វើដំណើរឆ្លងកាត់ទីតាំង​ប្រារព្ធពិធីតាមកាលបរិច្ឆេទខាងលើដោយអនុគ្រោះ។ ផុតរយៈពេលហាមឃាត់បណ្តោះ​អាសន្ននេះ រដ្ឋបាលរាជធានីភ្នំពេញ នឹងបើកឱ្យចរាចរជាធម្មតាវិញ។

សូមរម្លឹកថា ស្ពានថ្មខ្សែកាប តភ្ជាប់ពីទីក្រុងរណបកោះពេជ្រ ទៅកាន់គម្រោងអភិវឌ្ឍន៍កោះនរា មាន​ប្រវែងសរុប ៨២៤ម ទទឹង ២៤.៥ម​ ​ជាស្ពានចរាចរទ្វេរទិស មានគន្លង សម្រាប់រថយន្តចំនួន ២ទៅ និងគន្លងចំនួន ២មក ដែល ១គន្លងមានទទឹង ​៣,២៥ម៉ែត្រ​ និងមានគន្លង សម្រាប់​ទោចក្រយានយន្តចំនួន ១ទៅ និងគន្លងចំនួន ១មក ដែលមានទទឹង ១,២៥ម៉ែត្រ​សងខាង​។ ការសាងសង់ស្ពាននេះ ចំណាយ ៣៨.០០០.០០០ដុល្លារអាមេរិក រយៈពេលសាងសង់ ៣៥ខែ​ គិតចាប់ពីថ្ងៃបើកការដ្ឋាន កាលពីថ្ងៃទី២៦ ខែតុលា ឆ្នាំ២០២០។ ស្ពាននេះ សាងសង់​ដោយក្រុមហ៊ុនវិនិយោគទុនអណិកជនកម្ពុជា OCIC​។ ​

​ស្ពានថ្មីនេះ ត្រូវបានសាងសង់ឡើង ដើម្បីបម្រើសេចក្តីត្រូវការរបស់ប្រជាពលរដ្ឋ ក្នុងការធ្វើដំណើរ​កាត់បន្ថយការកកស្ទះចរាចរណ៍​ដ៏មមាញឹក ក្នុងរាជធានីភ្នំពេញ ជាពិសេសបន្ថយបន្ទុក​លំហូរចរាចរ នៅស្ពានព្រះមុនីវង្ស ច្បារអំពៅ ក៏ដូចមហាវិថីព្រះនរោត្តម ផងដែរ៕