ខេត្តស្ទឹងត្រែង ៖ សពយុវជនម្នាក់បានត្រូវប្រជាពលរដ្ឋប្រទះឃើញអណ្តែតទឹកទន្លេចម្ងាយប្រមាណ៣០០ម៉ែត្រពីវត្តស្រែគរ ក្រោយពីយុវជនម្នាក់នេះ រួមនឹងមិត្តភក្តិប៉ុន្មាននាក់មានទំនាស់ជាមួយក្រុមម្ខាងទៀត ខណៈរាំធុងបាស់ក្នុងវត្តស្រែគរនាថ្ងៃបុណ្យវិសាខបូជា ហើយដេញវាយគ្នាប្រសេចប្រសាច និងបាត់ខ្លួនមួយយប់រួចមក
ខេត្តស្ទឹងត្រែង ៖ សពយុវជនម្នាក់បានត្រូវប្រជាពលរដ្ឋប្រទះឃើញអណ្តែតទឹកទន្លេចម្ងាយប្រមាណ៣០០ម៉ែត្រពីវត្តស្រែគរ ក្រោយពីយុវជនម្នាក់នេះ រួមនឹងមិត្តភក្តិប៉ុន្មាននាក់មានទំនាស់ជាមួយក្រុមម្ខាងទៀត ខណៈរាំធុងបាស់ក្នុងវត្តស្រែគរនាថ្ងៃបុណ្យវិសាខបូជា ហើយដេញវាយគ្នាប្រសេចប្រសាច និងបាត់ខ្លួនមួយយប់រួចមក។
ហេតុការណ៍ដេញវាយគ្នាបណ្តាលឲ្យម្នាក់ស្លាប់បាត់បង់ជីវិតនេះ បានកើតឡើងនៅវេលារំលងអធ្រាត្រឈានចូលថ្ងៃទី១៨ ឧសភា ២០១១ ស្ថិតក្នុងភូមិស្រែគរ ឃុំស្រែគរ ស្រុកសេសាន។ ជនរងគ្រោះដែលត្រូវក្រុមម្ខាងវាយរហូតស្លាប់នេះឈ្មោះថេង ថុង អាយុ២៤ឆ្នាំ មានស្រុកកំណើតនៅស្រុកជីក្រែង ខេត្តសៀមរាប តែបានមកស្នាក់នៅធ្វើជាជាងសិប្បកម្មក្នុងភូមិកើតហេតុខាងលើ។ ប្រភពព័ត៌មានបានឲ្យដឹងថា នៅថ្ងៃទី១៩ ឧសភា ជាថ្ងៃបុណ្យវិសាខបូជា ក្នុងវត្តស្រែគរមានរៀបចំពិធីបុណ្យដោយគណៈកម្មការវត្ត។ក្រោយពិធីបុណ្យចប់រួចរាល់នាវេលាយប់ក៏មានចាក់ធុងបាស់រាំកម្សាន្តកំដរបុណ្យក្នុងវត្ត ហើយក៏មានមនុស្សម្នាមកពីភូមិផ្សេងៗគ្នាមកចូលរួម។
លោកអន សំអាត អធិការនគរបាលស្រុកសេសាន បានឲ្យដឹងថា នៅថ្ងៃទី១៧ ឧសភា ក្នុងវត្តខាងលើបានរៀបចំពិធីសូត្រមន្តបុណ្យវិសាខបូជា លុះដល់វេលារំលងអធ្រាត្រ ទើបមានចាក់ភ្លេងរាំកំសាន្ត ហើយជនរងគ្រោះរួមជាមួយមិត្តភក្តិបីទៅបួននាក់បានឈ្លោះប្រកែកគ្នាជាមួយក្រុមម្ខាងទៀត តែក៏ត្រូវសមត្ថកិច្ចធ្វើអន្តរាគមន៍។ ពេលនោះក្រុមជនរងគ្រោះបានរត់សំដៅទៅទន្លេ ខ្លះស្រាយខ្សែទូក និងខ្លះជិះលើទូក ចំណែកជនរងគ្រោះបានលោតទឹកទន្លេហែលទៅត្រើយម្ខាង ព្រោះជាកន្លែងស្នាក់នៅ ឯមិត្តភក្តិរបស់ខ្លួនក៏បានឡើងពីទូកមកលើគោកវិញ។
លោកអធិការបានបន្តថា ដោយសារតែយប់ងងឹតហើយទន្លេលាតសន្ធឹងធំយើងមិនបានដឹងថា ជនរងគ្រោះហែលដល់ចំណុចណាទេ លុះព្រឹកឡើងកម្លាំងប៉ុស្តិ៍បានស្វែងរកតែរកមិនឃើញ លុះរហូតដល់ម៉ោងជាង៥ព្រឹក ថ្ងៃទី១៨ ឧសភា អ្នកភូមិប្រទះឃើញសពជនរងគ្រោះអណ្តែតទឹកទៅទើរនៅកំពង់របស់អ្នកភូមិ ទើបរាយការណ៍មកនគរបាលប៉ុសិ៍្តចុះទៅពិនិត្យកន្លែងកើតហេតុ និងធ្វើសេចក្តីជូនដំណឹងមកស្នងការដ្ឋានខេត្ត ដើម្បីឲ្យកម្លាំងនគរបាលផ្នែកកោសល្យវិច័យ និងវិទ្យាសាស្ត្រចុះទៅពិនិត្យបន្ថែមទៀត។ តាមការសន្និដ្ឋានគឺជនរងគ្រោះទំនងជាស្រវឹងស្រា ហើយភិតភ័យលោតទឹក តែដោយហែលពុំផុតក៏លង់ទឹកស្លាប់តែម្តង។ សពជនរងគ្រោះត្រូវបានតម្កល់រង់ចាំពិនិត្យធ្វើកោសល្យវិច័យពីនគរបាលជំនាញ ចំណែកក្រុមម្ខាងទៀត សមត្ថកិច្ចកំពុងតាមដានហៅមកសាកសួរ ដើម្បីឲ្យដឹងច្បាស់ពីមូលហេតុនៃទំនាស់។
រឿងរា៉វដាច់ដោយឡែកមួយទៀត កាលពីល្ងាចថ្ងៃទី១៧ ឧសភា នោះដែរ មានក្មេងទំនើងចំនួនពីរក្រុមបានជិះម៉ូតូដេញវាយគ្នាតាមដងផ្លូវម្តុំជិតស្ពានសេកុង ។ ការដេញវាយគ្នាប្រសាចពេញផ្លូវនេះ បណ្តាលឲ្យក្រុមម្ខាងមានគ្នា៣នាក់ត្រូវគូភាគីមានគ្នា៥នាក់ វាយរួចឲ្យលូនកាត់ថ្នល់ ថែមទាំងរុញម៉ូតូសង្កត់ពីលើថែមទៀត តែត្រូវបានប៉េអឹមជួយអន្តរាគមន៍ទាន់ចាប់បាន២នាក់ ក្នុងចំណោម៥នាក់ប្រគល់ទៅឲ្យអធិការដ្ឋាននគរបាលក្រុងស្ទឹងត្រែងចាត់ការបន្ត។ ប្រភពព័ត៌មានបានឲ្យដឹងថា ក្មេងទំនើងទាំងពីរនាក់ត្រូវបានដោះលែងវិញ ជាថ្នូរនឹងទឹកប្រាក់ចំនួន៥០០.០០០រៀល។ ជាមួយនឹងការដោះលែង ជាថ្នូរនឹងលុយបែបនេះ មិនដឹងថា តើគោលនយោបាយភូមិ-ឃុំមានសុវត្ថិភាពដែលកំពុងអនុវត្តនេះមានប្រសិទ្ធភាព ឬក៏អត់?
ចែករំលែកព័តមាននេះ