ខេត្តបន្ទាយមានជ័យ ៖ ថ្វីដ្បិតជាខេត្តមួយនៅជាប់ព្រំប្រទល់ប្រទេសសៀម ហើយមានច្រកសេដ្ឋកិច្ចមួយដ៏ធំ និងមានក្រុមហ៊ុនចំនួន៥នាំជ្រូកក្រហមចូលក្នុង១ថ្ងៃពី៧០០ទៅ១.០០០ក្បាល ក្តីតែសាច់ជ្រូកនៅខេត្តបន្ទាយមានជ័យនៅតែឡើងថ្លៃ ។ ប្រជាពលរដ្ឋនៅខេត្តបន្ទាយមានជ័យ និយាយថា ចាប់តាំងពីពេលបុណ្យចូលឆ្នាំថ្មីប្រពៃណីជាតិរហូត
ខេត្តបន្ទាយមានជ័យ ៖ ថ្វីដ្បិតជាខេត្តមួយនៅជាប់ព្រំប្រទល់ប្រទេសសៀម ហើយមានច្រកសេដ្ឋកិច្ចមួយដ៏ធំ និងមានក្រុមហ៊ុនចំនួន៥នាំជ្រូកក្រហមចូលក្នុង១ថ្ងៃពី៧០០ទៅ១.០០០ក្បាល ក្តីតែសាច់ជ្រូកនៅខេត្តបន្ទាយមានជ័យនៅតែឡើងថ្លៃ ។ ប្រជាពលរដ្ឋនៅខេត្តបន្ទាយមានជ័យ និយាយថា ចាប់តាំងពីពេលបុណ្យចូលឆ្នាំថ្មីប្រពៃណីជាតិរហូតដល់ពេលនេះ គឺ សាច់ជ្រូកបានឡើងថ្លៃ ដល់១គីឡូក្រាម២០.០០០រៀលដែលមុននេះត្រឹមតែពី១៥.០០០ទៅ១៧.០០០រៀល ។
លោកហ៊ុយ ទូច ប្រធានការិយាល័យផលិតកម្ម និងបសុព្យាបាលខេត្តថ្លែងថា នៅខេត្តបន្ទាយមានជ័យមានប្រជាពលរដ្ឋ៤០ភាគរយ ចិញ្ចឹមជ្រូក មាន់ ទា ហើយនាពេលបច្ចុប្បន្នតម្លៃជ្រូករស់សម្រាប់ជ្រូកក្នុងស្រុក១គីឡូក្រាមលក់បាន១២.៤០០រៀល ឯជ្រូកក្រហមថៃ១គីឡូក្រាម១១.៥០០រៀល។ មានក្រុមហ៊ុនចំនួន៥ដែលនាំជ្រូកក្រហមចូលពីថៃក្នុង១ថ្ងៃៗពី៧០០ទៅ១.០០០ក្បាល គឺមាន ១-ក្រុមហ៊ុនមេគង្គពាណិជ្ជ ២-ក្រុមហ៊ុនយុវពាណិជ្ជ ៣-ក្រុមហ៊ុនប៊ុតចន្ធូ ៤-ក្រុមហ៊ុនផូគឹមស្រ៊ាង ៥-ក្រុមហ៊ុនងួន សុបិន ។ ក្រុមហ៊ុនទាំង៥នេះកាលមុននាំចូលជ្រូកថៃចូលក្នុង១ថ្ងៃ១.០០០ក្បាល ប៉ុន្តែក្រោយពេលមានសភាពការណ៍ជម្លោះព្រំដែនកើតឡើង ពេលនេះ១ថ្ងៃនាំចូលពី៧០០ទៅ១.០០០ក្បាល ដោយនាំចូលមួយថ្ងៃខានមួយថ្ងៃ ហើយក្រៅពីលក់នៅក្នុងខេត្ត គឺមាននាំទៅលក់នៅខេត្តសៀមរាប បាត់ដំបង និងភ្នំពេញ ។ ដោយឡែកនៅក្នុងខេត្ត គឺក្រុមហ៊ុនផូគឹមស្រ៊ាងដាក់ជ្រូក៤០ក្បាល សម្រាប់បម្រើសេចក្តីត្រូវការ ។
មន្ត្រីដដែលមិនបានឱ្យដឹងថា ការឡើងថ្លៃសាច់ជ្រូកនេះបណ្តាលមកពីអ្វីទេ តែពាណិជ្ជករមួយរូបនិយាយថា មិនមែនតែសាច់ជ្រូកទេ ដែលឡើងថ្លៃគឺទំនិញសព្វសាររពើឡើងថ្លៃទាំងអស់ ។ សម្រាប់ប្រជាពលរដ្ឋដែលរកចំណូលបានត្រឹម១ម៉ឺនរៀលក្នុងមួយថ្ងៃកំពុងប្រឈមនឹងការលំបាកហើយ ខណៈពេលដែលទំនិញនានាឡើងថ្លៃ ឯការស្វែងរកចំណូលក៏ជួបការលំបាកដែរ ៕
ចែករំលែកព័តមាននេះ