ក្រុមហ៊ុនបន្ទះឈីបអាមេរិក Intel ច្រានចោលដំណឹងការវិនិយោគថ្មីនៅវៀតណាម
វៀតណាម ៖ ក្រុមហ៊ុនផលិតបន្ទះឈីបដ៏ធំរបស់សហរដ្ឋអាមេរិក Intel បានប្រកាសថា ខ្លួនមិនដែល
វៀតណាម ៖ ក្រុមហ៊ុនផលិតបន្ទះឈីបដ៏ធំរបស់សហរដ្ឋអាមេរិក Intel បានប្រកាសថា ខ្លួនមិនដែលប្រកាសអំពីការវិនិយោគបន្ថែមណាមួយនៅក្នុងប្រទេសវៀតណាម ក្រៅពីការវិនិយោគទឹកប្រាក់ចំនួន១.៥ពាន់លានដុល្លារអាមេរិក ដែលបានធ្វើរួចមកហើយរហូតមកដល់ពេលនេះ។
អ្នកតំណាងក្រុមហ៊ុនខ្នាតយក្សរបស់អាមេរិក កាលពីថ្ងៃទី៨ ខែវិច្ឆិកា កន្លងទៅ បានថ្លែងប្រាប់សារព័ត៌មានវៀតណាម VnExpress ថា បន្ទាប់ពីបង្កើនការវិនិយោគដល់ ១.៥ពាន់លានដុល្លារក្នុងឆ្នាំ ២០២១ ក្រុមហ៊ុនមិនដែលបានប្រកាសជាផ្លូវការណាមួយអំពីការវិនិយោគថ្មីនោះទេ។ ការប្រកាសនេះកើតឡើង បន្ទាប់ពីទីភ្នាក់ងារសារព័ត៌មាន Reuters កាលពីថ្ងៃទី៧ ខែវិច្ឆិកា កន្លងទៅ បានរាយការណ៍ថា Intel បានលុបចោលផែនការវិនិយោគ១ពាន់លានដុល្លារបន្ថែមទៀត នៅប្រទេសវៀតណាម។
ក្រុមហ៊ុន Intel បានចាប់ផ្តើមប្រតិបត្តិការរបស់ខ្លួននៅក្នុងប្រទេសវៀតណាម ចាប់តាំងពីឆ្នាំ ២០០៦ ជាមួយនឹងរោងចក្រផលិត និងសាកល្បងបន្ទះឈីបស្ថិតនៅទីក្រុងហូជីមិញ ហើយរោងចក្រ Intel Products Vietnam គឺជាមជ្ឈមណ្ឌលផលិតកម្មមួយក្នុងចំណោមមជ្ឈមណ្ឌលផលិតកម្មទាំង ១០ របស់ក្រុមហ៊ុននៅទូទាំងពិភពលោក។ រោងចក្រនេះ ដែលមានបុគ្គលិកប្រមាណ២,៨០០នាក់ បានដឹកជញ្ជូនផលិតផលជាង ៣ពាន់លានគ្រឿងក្នុងរយៈពេល១៥ឆ្នាំ នៃប្រតិបត្តិការរបស់ខ្លួន។
នៅក្នុងជំនួបជាមួយឧបនាយករដ្ឋមន្ត្រីវៀតណាម លោក Tran Luu Quang កាលពីខែតុលា កន្លងទៅ ថ្នាក់ដឹកនាំក្រុមហ៊ុន Intel បានប្តេជ្ញាចិត្តវិនិយោគរយៈពេលវែងនៅវៀតណាម។ លោក Patrick Gelsinger នាយកប្រតិបត្តិក្រុមហ៊ុន Intel ធ្លាប់បានប្រាប់នាយករដ្ឋមន្ត្រីវៀតណាម លោក Pham Minh Chinh កាលពីខែឧសភាកន្លងទៅថា ក្រុមហ៊ុននឹងវិនិយោគជាច្រើនបន្ថែមទៀតនៅប្រទេសវៀតណាម សម្រាប់ពេលអនាគត។ ក្រុមហ៊ុនកំពុងពង្រីកការវិនិយោគរបស់ខ្លួនលើការវេចខ្ចប់បន្ទះឈីបនៅក្នុងប្រទេសម៉ាឡេស៊ី ដែលជាដៃគូប្រកួតប្រជែងដ៏សំខាន់មួយរបស់វៀតណាម នៅក្នុងការទាក់ទាញការវិនិយោគផ្ទាល់ពីបរទេស៕
ចែករំលែកព័តមាននេះ