ភ្នំពេញ៖ រដ្ឋមន្ត្រីក្រសួង​អប់រំ យុវជន និងកីឡា លោក ហង់ជួន ណារ៉ុន បានប្រកាសថា ដំណើរការ​សំណេរ​នៃការប្រឡងសញ្ញាបត្រ​មធ្យមសិក្សាទុតិយភូមិ ឬប្រឡងបាក់ឌុប នាថ្ងៃទី៦-៧ខែវិច្ឆិកា ឆ្នាំ២០២៣ ដែលបានបិទបញ្ចប់​នៅល្ងាចថ្ងៃទី៧ ខែវិច្ឆិកានេះ បានបញ្ចប់ដោយជោគជ័យ​។

​ក្នុងខ្លីបវិដេអូ ចេញផ្សាយ​តាមហ្វេសប៊ុកផ្លូវការរបស់​ក្រសួងអប់រំ យុវជន និងកីឡា នាល្ងាចថ្ងៃទី៧ ខែវិច្ឆិកា ឆ្នាំ២០២៣ គឺប៉ុន្មាននាទីក្រោយ​បញ្ចប់​ការប្រឡងបាក់ឌុប លោក ហង់ជួន ណារ៉ុន ក៏បាន​អំពាវនាវ​ដល់បុគ្គលិកសិក្សា ដែលចូលរួម​​ក្នុងដំណើរការកំណែ ក៏ដូចជា ដំណើរការស្រង់បូកពិន្ទុ បន្តអនុវត្តនូវតួនាទីភារកិច្ចឱ្យហ្មត់ចត់ ដើម្បី​ឱ្យ​ការប្រឡង​ ធានាបាននូវគោលការណ៍ច្បាប់ តម្លាភាព និងលទ្ធផល​ទទួលយក​បាន។

ក្រសួងអប់រំ យុវជន និងកីឡា បានប្រកាសថា ដំណើរការប្រឡងបាក់ឌុប រយៈពេល ២ថ្ងៃ នៅថ្ងៃទី៦-៧វិច្ឆិកា ឆ្នាំ២០២៣ ​គោរពតាមគោល​ការណ៍​ច្បាប់ យុត្តិធម៌ តម្លាភាព និងលទ្ធផល​ទទួលយកបាន។ ក្នុងនោះ បេក្ខជនអវត្តមានសរុប ២.៣២៨នាក់ ស្រី៩៣៤នាក់ ស្មើនឹង ១,៦៩ភាគរយ នៃបេក្ខជនចុះឈ្មោះសរុប (ក្នុងនោះ បេក្ខជនស្វៃរិនអវត្តមានចំនួន ១.៨១៤នាក់ ស្រី៧៤៩នាក់)។ បេក្ខជនមានបញ្ហាសុខភាព ៨៥ករណី។

ក្រសួងអប់រំ បានប្រកាសថា ដំណើរការសំណេរនៃការប្រឡងសញ្ញបត្រមធ្យមសិក្សាទុតិយភូមិ សម័យប្រឡង ៖ ០៦ វិច្ឆិកា ២០២៣ បានប្រព្រឹត្តទៅរយៈពេលពីរថ្ងៃ នៅថ្ងៃទី៦ និងទី៧ ខែវិច្ឆិកា ឆ្នាំ២០២៣ ដែលមានបេក្ខជនចុះឈ្មោះប្រឡង សរុបចំនួន ១៣៧.៤១២នាក់ ស្រី៧៣.២៧៨នាក់ ចែកជា ២២៧មណ្ឌលប្រឡង ត្រូវជា ៥.៥៤៣បន្ទប់។

​ក្រសួងអប់រំ ប្រកាសថា បេក្ខជនអវត្តមានសរុប ២.៣២៨នាក់ ស្រី៩៣៤នាក់ ស្មើនឹង១,៦៩ភាគរយ នៃបេក្ខជនចុះឈ្មោះ​សរុប (ក្នុងនោះបេក្ខជនស្វៃរិនអវត្តមានចំនួន ១.៨១៤នាក់ ស្រី៧៤៩នាក់)។ បេក្ខជនមានបញ្ហា​សុខភាព ៨៥ករណី ក្នុងនោះបេក្ខជនមានបញ្ហាសុខភាព និងមិនអាចបន្ត​ការប្រឡង​បានចំនួន ៥ករណី ក្រៅពីនេះ បេក្ខជនដែលមានបញ្ហាសុខភាពទាំងអស់ បានបន្តការ​ប្រឡងជាធម្មតា បន្ទាប់ពីអាការៈបានធូរស្រាល និងក្រោមការយកចិត្តទុក ដាក់មើលថែ​ពីក្រុមគ្រូពេទ្យ។

ក្រសួងអប់រំ បន្តថា នៅតាមមណ្ឌលប្រឡងនីមួយៗ មានដំណើរការល្អ មានសភាពស្ងប់ស្ងាត់ និងរបៀបរៀបរយល្អ ព្រមទាំងបានអនុវត្តតាមសេចក្ដីណែនាំរបស់ក្រសួងអប់រំ យុវជន និងកីឡា។ ទោះបីជានៅតាម​បណ្ដា​ខេត្តមួយចំនួន មានភ្លៀងធ្លាក់ក៏ដោយ ប៉ុន្តែមិនបានប៉ះពាល់ដល់​ដំណើរការសំណេរ​របស់បេក្ខជនឡើយ។

គណៈមេប្រយោគទូទាំងប្រទេស គណៈកម្មការអប្បមាទទូទាំងប្រទេស ជំនួយការអប្បមាទ ប្រធាន អនុប្រធានមណ្ឌល គណៈកម្មការកណ្ដាល គណៈកម្មការត្រួតពិនិត្យអគារ និងគណៈកម្មការ​​អនុរក្សបានបំពេញការងារប្រកបដោយការយកចិត្តទុកដាក់ និងទំនួលខុសត្រូវ និងដោយមានកិច្ចសហការល្អពីសំណាក់អង្គភាពប្រឆាំងអំពើពុករលួយ សហភាពសហព័ន្ធ​យុវជន​កម្ពុជា ភ្នាក់ងារសុខាភិបាល កងកម្លាំងនិងអាជ្ញាធរមានសមត្ថកិច្ចពាក់ព័ន្ធ។

ក្រសួងអប់រំ បន្តថា បេក្ខជន បានគោរពបទបញ្ញត្តិនៃការប្រឡងបានយ៉ាងល្អ ស្ទើរតែពុំមាននាំមក​ជាប់ខ្លួន​នូវ​សំណៅឯកសារ និងឧបករណ៍ហាមឃាត់។ បេក្ខជនប្រព្រឹត្តកំហុសឆ្គងមាន ១ករណីគត់​។

ដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ០៦ វិច្ឆិកា ២០២៣ បានបញ្ចប់ទៅនៅម៉ោង ១៦:៣០ រសៀល ថ្ងៃទី៧ ខែវិច្ឆិកា ឆ្នាំ២០២៣។ ហឹបសំណៅ​កិច្ចការ​បេក្ខជន និងសំណុំឯកសារពាក់ព័ន្ធការប្រឡង នឹងត្រូវត្រួតពិនិត្យដោយហ្មត់ចត់បំផុត ហើយត្រូវបញ្ជូនមកកាន់រាជធានីភ្នំពេញ ដើម្បីបន្តដំណើរការកំណែ។

ជារួម ក្រសួងអប់រំ យុវជន និងកីឡា បានបញ្ជាក់ថា ដំណាក់កាលសំណេរនៃការ​ប្រឡង​សញ្ញាបត្រ​មធ្យមសិក្សាទុតិយភូមិ សម័យប្រឡង៖ ០៦ វិច្ឆិកា ២០២៣ បានប្រព្រឹត្តទៅដោយ​គោរពតាម​គោល​ការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន និងស្របតាមគោលការណ៍ “អ្នកចេះគឺជាប់”។

តាមការគ្រោងទុក លទ្ធផលប្រឡង នឹងត្រូវប្រកាស នៅតាមមណ្ឌលប្រឡងក្នុងរាជធានីភ្នំពេញ និងខេត្តកណ្ដាល នៅរសៀលថ្ងៃទី២៧ ខែវិច្ឆិកា ឆ្នាំ២០២៣ និងនៅតាមមណ្ឌលប្រឡង ក្នុងខេត្ត​ផ្សេងទៀត នាថ្ងៃទី២៨ ខែវិច្ឆិកា ឆ្នាំ២០២៣ និងផ្សព្វផ្សាយតាមបណ្ដាញទំនាក់ទំនងសង្គមផ្លូវការ​របស់​ក្រសួងអប់រំ យុវជន និងកីឡា MoEYS Cambodia ៕