ខេត្តស្ទឹងត្រែង ៖ ក្រុមហ៊ុនបូណារីតា ដែលជាក្រុមហ៊ុនដីសម្បទានសេដ្ឋកិច្ចមួយកន្លែង ស្ថិតនៅចំណុចដុងក្រឡ ក្នុងសង្កាត់សាមគ្គី ក្រុងស្ទឹងត្រែង គេពុំឃើញមានការអភិវឌ្ឍអ្វីទេ សូម្បីតែដើមល្ហុងមួយដើមក៏គ្មានដែរ។ ដីសម្បទានសេដ្ឋកិច្ចមួយកន្លែងនេះ ត្រូវក្រុមហ៊ុនបូណារីតា ដេញថ្លៃបានពីរដ្ឋ កាលពីឆ្នាំ២០០៧ ប៉ុន្តែរហូតមកដល់បច្ចុប្បន្ន គេមិនឃើញមានអ្វីប្លែកដែលជាការអភិវឌ្ឍលើផ្ទៃដីទាំងនោះចេញជារូបរាងច្បាស់លាស់សោះ ធ្វើឱ្យគេលាន់មាត់គ្រប់ៗគ្នាថា ក្រុមហ៊ុនបង្កកដីចាំម៉ូយ ។
ការសង្ស័យថាបង្កកដីចាំម៉ូយនេះបាន ក្លាយជាការពិត ដោយលោកញឹម បូណា អតីតប្រធានក្រុមហ៊ុនអះអាងថា ក្រុមហ៊ុនដីសម្បទានសេដ្ឋកិច្ចបូណារីតា មានផ្ទៃដី៨.៦០០ហិកតា បានលក់ឱ្យអ្នកផ្សេងហើយ គឺឈ្មោះពន្លឺ រស់នៅភ្នំពេញ ហើយការផ្ទេរសិទ្ធិបានចាប់ផ្តើមតាំងពីដើមឆ្នាំ២០១១មកម្ល៉េះ។ លោកម៉ៅ ធនិន អភិបាលរងខេត្តបានឱ្យដឹងថា ដីក្រុមហ៊ុននេះមិនមែនជាដីសម្បទានសេដ្ឋកិច្ចទេ គឺជាដីសម្បទានសង្គមកិច្ចខេត្ត ដែលមានផ្ទៃដីជាង៦០០ហិកតាផ្តល់សិទ្ធិឱ្យក្រុមហ៊ុនបូណារីតាធ្វើការអភិវឌ្ឍ តែរហូតមកដល់ពេលនេះ លោកក៏មិនទាន់ចុះធ្វើការត្រួតពិនិត្យដែរ ថាតើក្រុមហ៊ុននេះបានគោរពតាមកិច្ចសន្យាហើយឬនៅ ។
លោកទូច ធា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបានបញ្ជាក់កាលពីរសៀលថ្ងៃទី១៨ ខែឧសភាថា ចាប់ពីពេលដែលក្រុមហ៊ុនបានទទួលអាជ្ញាប័ណ្ណពីរដ្ឋរហូតដល់បច្ចុប្បន្ន លោកមិនបានដឹងថា ក្រុមហ៊ុនបានអភិវឌ្ឍលើវិស័យអ្វីនោះទេ ហើយលោកក៏មិនដឹងថា ម្ចាស់ក្រុមហ៊ុនបានផ្ទេរសិទ្ធិឱ្យអ្នកថ្មីដែរ។ កន្លងមក អធិការកិច្ចនៃក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានចុះមកត្រួតពិនិត្យដីក្រុមហ៊ុននេះដែរ តែមិនឃើញមានលទ្ធផលអ្វីនៅឡើយទេ ហើយក្រុមហ៊ុននៅតែល្មើសដដែលមិនមានការអភិវឌ្ឍ ។
ចំពោះក្រុមហ៊ុននេះគេឃើញថា បានទទួលសិទ្ធគ្រប់គ្រងលើដីសម្បទានសង្គមកិច្ចនេះហើយ សម្រាប់ធ្វើការអភិវឌ្ឍលើវិស័យណាមួយឱ្យមាន ភាពរីកចម្រើនដល់ខេត្ត ផ្ទុយទៅវិញមិនបានអនុវត្តតាមគោលការណ៍នៃកិច្ចព្រមព្រៀង តែបែរជាទុកដីបង្កកសំរាប់លក់ឱ្យម៉ូយយ៉ាងដូច្នោះ ធ្វើឱ្យថ្នាក់ខេត្តបាត់បង់សេចក្តីទុកចិត្ត ដែលកន្លងមកសង្ឃឹមថា ក្រុមហ៊ុននឹងអភិវឌ្ឍលើវិស័យណាមួយពិតប្រាកដដើម្បីផ្តល់ផលប្រយោជន៍ដល់ខេត្ត និងប្រជាពលរដ្ឋ។
បន្ទាប់ពីម្ចាស់ថ្មីបានមកគ្រប់គ្រងលើក្រុមហ៊ុននេះ និងបានទទួលសិទ្ធិបន្តលើដីសម្បទានសង្គមកិច្ចរួចមក នាពេលថ្មីៗនេះ គឺនៅថ្ងៃទី៩ និងទី១០ ខែឧសភា ឆ្នាំ២០១១ មានប្រជាពលរដ្ឋជាច្រើនគ្រួសាររស់នៅចំណុចដុងក្រឡ ក្នុងសង្កាត់សាមគ្គី ក្រុងស្ទឹងត្រែង បានចោទប្រកាន់ខាងក្រុមហ៊ុនដីសម្បទានសង្គមកិច្ចបូណារីតាថា បានរំលោភយកដីដំណាំរបស់ពួកគាត់ ។ ប្រជាពលរដ្ឋបាននាំគ្នាដែលម្នាក់ៗមានកាំបិត ពូថៅ ក្នុងដៃធ្វើការតវ៉ាជាមួយក្រុមកម្មកររបស់ក្រុមហ៊ុនបូណារីតា ដែលកំពុងតែឈូសឆាយ និងដាំបង្គោលវាតទីលើដីដែលប្រជាពលរដ្ឋដាំដំឡូង មី ។ ប្រជាពលរដ្ឋបានអះអាងថា ដីទាំងនេះជាកម្មសិទ្ធិរបស់ពួកគាត់ ព្រោះពួកគាត់បានរស់នៅទីនេះតាំងពីឆ្នាំ២០០០មកម្ល៉េះ ។
ចំណែកតំណាងក្រុមហ៊ុនបញ្ជាក់ថា ការបោះបង្គោលនិងឈូសឆាយនេះគឹធ្វើទៅតាមប្លង់ដែលបានទទួលដីសម្បទានតែប៉ុណ្ណោះ។ ជុំវិញករណីនេះ សមត្ថកិច្ចបានធ្វើការសម្របសម្រួលមកដល់ថ្នាក់សង្កាត់ តែការដោះស្រាយមិនទាន់ដឹងថាដល់កម្រិតណាទេ ហើយបើតាមការបញ្ជាក់ពីមន្រ្តីសាលាសង្កាត់សាមគ្គីនៅថ្ងៃទី១៨ ឧសភាថា ក្រុមហ៊ុនបានកាត់ដីពីអ័ក្សផ្លូវជាតិជម្រៅ១០០ម៉ែត្រ ឱ្យប្រជាពលរដ្ឋរស់នៅទីនោះ ហើយពីចំណុច១០០ម៉ែត្រទៅ គឺជាដីក្រុមហ៊ុន ។ ម្យ៉ាងទៀត មានប្រជាពលរដ្ឋចំនួន៥គ្រួសារប៉ុណ្ណោះដែលរងផលប៉ះពាល់ខ្លាំង ចំណែកគ្រួសារផ្សេងទៀតមិនសូវមានផលប៉ះពាល់ប៉ុន្មានទេ តែការដោះស្រាយមិនដឹងថាប្រជាពលរដ្ឋយល់ព្រម ឬយ៉ាងណានោះឡើយ។
ពាក់ព័ន្ធនឹងបញ្ហានេះ គេសង្ឃឹមថា ម្ចាស់ក្រុមហ៊ុនថ្មីនឹងមានដំណោះស្រាយប្រសើរមួយរវាងប្រជាពលរដ្ឋនិងក្រុមហ៊ុន ហើយក្រុមហ៊ុននឹងធ្វើការអភិវឌ្ឍលើដីសម្បទាន ផ្តល់ផលប្រយោជន៍ដល់ខេត្តនិងប្រជាពលរដ្ឋ មិនមែនបង្កកដីដើម្បីស្វែងរកម៉ូយថ្មីទេ ។ ម្យ៉ាងទៀត សូមឱ្យក្រសួងជំនាញមកធ្វើការត្រួតពិនិត្យដី របស់ក្រុមហ៊ុននេះដើម្បីឱ្យដឹងថាមានការអភិវឌ្ឍលើវិស័យណាខ្លះ ហើយមានព្រំប្រទល់ពីចំណុចណាដល់ចំណុចណា ដើម្បីកុំឱ្យមានវិវាទតទៅទៀតពីរឿងដីធ្លីនេះ ៕
ចែករំលែកព័តមាននេះ