រាជធានីភ្នំពេញ ៖ បុរសជាឪពុកក្មេក និងកូនប្រសាបានរងគ្រោះឆេះរោលពេញរាងកាយដោយសារភ្លើងអាល់កុល ខណៈយកទៅបង្កាត់ភ្លើងដាំទឹកយកឆុងតែ ។ តាមប្រភពព័ត៌មានបានឱ្យដឹងថា នៅវេលាម៉ោង៦ព្រឹកថ្ងៃទី១៩ ឧសភា បុរសជាកូនប្រសាបានព្យាយាមបង្កាច់ភ្លើងដាំទឹកឆុងតែជូនឪពុកក្មេក ។ ដោយសារតែការបង្កាត់ភ្លើងនោះមិនឆេះ
រាជធានីភ្នំពេញ ៖ បុរសជាឪពុកក្មេក និងកូនប្រសាបានរងគ្រោះឆេះរោលពេញរាងកាយដោយសារភ្លើងអាល់កុល ខណៈយកទៅបង្កាត់ភ្លើងដាំទឹកយកឆុងតែ ។ តាមប្រភពព័ត៌មានបានឱ្យដឹងថា នៅវេលាម៉ោង៦ព្រឹកថ្ងៃទី១៩ ឧសភា បុរសជាកូនប្រសាបានព្យាយាមបង្កាច់ភ្លើងដាំទឹកឆុងតែជូនឪពុកក្មេក ។ ដោយសារតែការបង្កាត់ភ្លើងនោះមិនឆេះ ឪពុកក្មេកក៏យកទឹកអាល់កុលទៅចាក់លើកម្ទេចភ្លើង ស្រាប់តែមានការឆាបឆេះឡើងរោលរាលឪពុក និងកូន បណ្តាលឱ្យរោលខ្មៅពេញខ្លួនប្រាណទាំងពីរនាក់ឪពុកក្មេក និងកូនប្រសា ព្រមទាំងឆាបឆេះដល់ដំបូលផ្ទះបាយ និងជញ្ជាំងផ្ទះបន្តិចផងដែរ ។ ហេតុការណ៍នេះកើតឡើងនៅភូមិតាប៉ុក ឃុំជើងរាស់ ស្រុកឧដុង្គ ខេត្តកំពង់ស្ពឺ ។
ឪពុកក្មេកឈ្មោះឡេង លីម អាយុ៤២ឆ្នាំ មុខរបរជាចុងភៅតាមរោងបុណ្យ និងរោងការ ចំណែកកូនប្រសាឈ្មោះវ៉េត លីន ភេទប្រុស អាយុ១៩ឆ្នាំ ។ តាមការរៀបរាប់ពីកូនប្រសាដែលរងគ្រោះ បានឱ្យដឹងថា ពេលខ្លួនភ្ញាក់ពីដំណេក ក៏ទៅអង្គុយបង្កាត់ភ្លើងដាំទឹកយកទៅឆុងតែឱ្យឪពុកក្មេក។ ប៉ុន្តែបង្កាត់មិនឆេះ ក៏ចេះតែអង្គុយបក់បណ្តើរ ផ្លុំបណ្តើរឆេះមានរងើកតិចៗទៅហើយ តែនៅហុយផ្សែងនៅឡើយ។ ដោយឃើញការបង្កាត់ភ្លើងក្រឆេះពេក ឪពុកក្មេកក៏ទៅយកប៊ីដុងដាក់អាល់កុលដែលនៅសល់ប្រមាណ២លីត្រយកទៅចាក់ពីលើបន្តិច ក៏បណ្តាលឱ្យឆេះឆាបប៊ីដុងជះភ្លើងរោលរាលពេញខ្លួនប្រាណទាំងពីរនាក់តែម្តង ។
ប្រភពព័ត៌មានពីឈ្មោះឡេង ស្រីម៉ៅ ភេទស្រី អាយុ៤១ឆ្នាំ ត្រូវជាប្អូនស្រីរបស់ឈ្មោះឡេង លីមបានឱ្យដឹងថា ផ្ទះគាត់នៅទល់មុខផ្ទះរបស់បងប្រុសដែលរងគ្រោះ។ ខណៈពេលកើតហេតុអ្នកជិតខាងបានផ្អើលឆោឡោទៅជួយពន្លត់ភ្លើង ខ្លាចឆាបឆេះផ្ទះ ព្រោះផ្ទះប្រក់ស្លឹក និងបាំងជញ្ជាំងស្លឹកដែរ ។ ដោយសារមានការជួយជ្រោមជ្រែងពីអ្នកជិតខាងទាន់ពេលវេលា ទើបភ្លើងឆាបឆេះតែដំបូលផ្ទះបាយ និងជញ្ជាំងបន្តិចប៉ុណ្ណោះ ព្រោះគ្រប់គ្នារវល់តែជួយពន្លត់ភ្លើង មិនបានជួយមើលមនុស្សឆេះខ្លួនទេ ទើបបណ្តាលឱ្យភ្លើងឆាបឆេះរោលខ្មៅពេញខ្លួនប្រាណបែបនេះ សូម្បីតែសក់ក៏ឆេះរួញដែរ ។ ចំណែកឈ្មោះឡេង លីម ជាបងប្រុសបានរត់ទៅននៀលដីខ្សាច់ ។ បន្ទាប់មកទើបក្រុមគ្រួសារបានបញ្ជូនទាំងពីរនាក់ឪពុកក្មេក និងកូនប្រសាទៅមន្ទីរពេទ្យបង្អែកខេត្តកំពង់ស្ពឺ ។
ប្រភពព័ត៌មានដដែលបន្តថា បានជាផ្ទះរបស់គាត់មានអាល់កុលទុកច្រើនលីត្របែបនេះ ដោយសារក្រៅពីធ្វើស្រែចំការគាត់ធ្វើចុងភៅតាមរោងការ រោងបុណ្យ និងកម្មវិធីផ្សេងៗទៀត ហេតុនេះហើយទើបនៅសល់អាល់កុលយកមកទុកនៅផ្ទះដូច្នេះ ។ បន្ទាប់ពីបញ្ជូនដល់មន្ទីរពេទ្យខេត្តដោយសាររលាកធ្ងន់ធ្ងរពេក ទើបគ្រូពេទ្យបានបញ្ជូនមកព្យាបាលទៅមន្ទីរពេទ្យព្រះកុសុមៈ។ គួរកត់សម្គាល់ផងដែរថា ការឆេះរលាកដោយសារអាល់កុល ភាគច្រើនជាចុងភៅការ បុណ្យនេះតែម្តង ដែលជាអ្នកប្រើប្រាស់ជាប្រចាំនូវអាល់កុលទឹកបែបនេះ៕
ចែករំលែកព័តមាននេះ