មនុស្សប្រុសស្រីប្រមាណជាង៦០នាក់ ដែលត្រូវជាកម្មករបេះផ្លែស្វាយ បានរងរបួសធ្ងន់ស្រាល ហើយត្រូវបញ្ជូនយកទៅសង្គ្រោះភ្លាមៗ ខណៈពេលដែលរថយន្តចំនួនពីរគ្រឿងបើកលឿនបុ.កគ្នាពេញទំហឹង
ខេត្តកំពង់ស្ពឺ ៖ បើតាមសេចក្តីរាយការណ៍បានឱ្យដឹងថា មនុស្សប្រុសស្រីប្រមាណជាង៦០នាក់ ដែលត្រូវជាកម្មករបេះផ្លែស្វាយ បានរងរបួសធ្ងន់ស្រាល ហើយត្រូវបញ្ជូនយកទៅសង្គ្រោះភ្លាមៗ ខណៈពេលដែលរថយន្តចំនួនពីរគ្រឿងបើកលឿនបុ.កគ្នាពេញទំហឹង បណ្ដាលឱ្យក្រឡាប់ផ្ងារជើងនៅកន្លែងកើតហេតុ។ ករណីរថយន្តពីរគ្រឿងបុ.កគ្នា ធ្វើឱ្យមនុស្សរងរបួសជាច្រើននាក់នេះ បង្កឱ្យមានការភ្ញាក់ផ្អើលកាលពីវេលាម៉ោង៦ព្រឹក ថ្ងៃទី៦ ខែវិច្ឆិកា ឆ្នាំ២០២៣ នៅលើផ្លូវក្រាលកៅស៊ូ ស្ថិតក្នុងភូមិក្បាលទឹកលើ ឃុំជាំសង្កែ ស្រុកភ្នំស្រួច ខេត្តកំពង់ស្ពឺ។
បើប្រភពព័ត៌មានពីមន្ត្រីនគរបាលចរាចរណ៍ខេត្តកំពង់ស្ពឺ បាននិយាយប្រាប់ឲ្យដឹងថា នៅមុនពេលកើតហេតុ មានរថយន្តមួយគ្រឿងម៉ាកតូយ៉ូតាព្រុស ពណ៌ទឹកមាស ពាក់ផ្លាកលេខ ភ្នំពេញ2BR-2738 អ្នកបើកបរមិនស្គាល់អត្តសញ្ញាណ និងអាសយដ្ឋាននោះទេ បានបើកបរតាមបណ្តោយផ្លូវក្រាលកៅស៊ូ ទិសដៅពីលិចទៅកើត។
មន្ត្រីនគរបាលចរាចរណ៍ បានប្រាប់ឲ្យដឹងបន្តថា លុះពេលធ្វើដំណើរមកដល់ចំណុចកើតហេតុខាងលើ ក៏ស្រាប់តែរ៉េចង្កូតចូលចំណែកផ្លូវខាងឆ្វេង រួចក៏ទៅបុ.ករថយន្តមួយគ្រឿងទៀត ម៉ាកហ៊ីយ៉ាន់ដាយ ពណ៌ស ពាក់ផ្លាកលេខ កំពង់ស្ពឺ3A-1646 ទិសដៅបញ្ច្រាសទិសគ្នា បើកបរដោយឈ្មោះ ស៊ន សុខន ភេទប្រុស អាយុ៤៥ឆ្នាំ រស់នៅភូមិក្បាលទឹកក្រោម ឃុំជាំសង្កែ ស្រុកភ្នំស្រួច ខេត្តកំពង់ស្ពឺ ដែលកំពុងដឹកកម្មករបេះផ្លែស្វាយជាង៦០នាក់ បណ្ដាលឲ្យរថយន្តដឹកកម្មករក្រឡាប់ផ្ងារជើង ធ្វើឲ្យមនុស្សជាង៦០នាក់រងរបួសធ្ងន់ស្រាល។ ចំណែករថយន្តបង្កម៉ាកតូយ៉ូតាព្រុសវិញ ក្រោយបង្កហេតុរួច អ្នកបើកបរក៏ចុះរត់គេចខ្លួនចេញពីកន្លែងកើតហេតុបាត់ស្រមោលតែម្ដង។
មន្ត្រីនគរបាលដដែលបានបន្តទៀតថា ក្រោយពេលកើតហេតុ មន្ត្រីជំនាញបានហៅរថយន្តសាមុយដឹកអ្នករងរបួសធ្ងន់ស្រាលយកទៅសង្គ្រោះនៅឯមន្ទីរពេទ្យបង្អែកត្រពាំងក្រឡឹង ដើម្បីសង្គ្រោះបន្ទាន់ និងព្យាបាល។ ហើយចំពោះវត្ថុតាងរថយន្តទាំងពីរគ្រឿងវិញ សមត្ថកិច្ចជំនាញ ធ្វើការអូសយកទៅរក្សាទុកនៅអធិការដ្ឋាននគរបាលស្រុកភ្នំស្រួច ដើម្បីរង់ចាំធ្វើការដោះស្រាយនៅពេលក្រោយបន្តទៀត៕
ចែករំលែកព័តមាននេះ