នៅពេលការប្រឡងបាក់ឌុបកាន់តែជិតចូលមកដល់ ពោលគឺនៅថ្ងៃទី៦-៧ ខែវិច្ឆិកា ឆ្នាំ២០២៣ អាជ្ញាធរសមត្ថកិច្ច និងសហភាពសហព័ន្ធយុវជនកម្ពុជា តាមបណ្តាខេត្តនានា ក៏ចាប់ផ្តើមប្រកាសជាបន្តបន្ទាប់ពីការរៀបចំផ្ទះស្នាក់នៅ និងកន្លែងផ្ញើកង់ ម៉ូតូ ដោយឥតគិតថ្លៃ
រាជធានីភ្នំពេញ ៖ នៅពេលការប្រឡងបាក់ឌុបកាន់តែជិតចូលមកដល់ ពោលគឺនៅថ្ងៃទី៦-៧ ខែវិច្ឆិកា ឆ្នាំ២០២៣ អាជ្ញាធរសមត្ថកិច្ច និងសហភាពសហព័ន្ធយុវជនកម្ពុជា តាមបណ្តាខេត្តនានា ក៏ចាប់ផ្តើមប្រកាសជាបន្តបន្ទាប់ពីការរៀបចំផ្ទះស្នាក់នៅ និងកន្លែងផ្ញើកង់ ម៉ូតូ ដោយឥតគិតថ្លៃ សម្រាប់បេក្ខជនប្រឡងបាក់ឌុប។
ផ្តើមដំបូង នៅខេត្តកណ្តាល, ត្បូងឃ្មុំ, ខេត្តព្រះសីហនុ និងខេត្តកំពង់ឆ្នាំងជាដើម សហភាពសហព័ន្ធយុវជនកម្ពុជា តាមបណ្តាខេត្តទាំងនេះ បានប្រកាសជាបន្តបន្ទាប់ជូនដល់ប្អូនៗសិស្សានុសិស្សប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ដែលនឹងប្រព្រឹត្តទៅនៅថ្ងៃទី៦-៧ ខែវិច្ឆិកា ឆ្នាំ២០២៣ខាងមុខ គឺសហភាពសហព័ន្ធយុវជនកម្ពុជា បានរៀបចំកន្លែងផ្ញើកង់ និងម៉ូតូដោយឥតគិតថ្លៃជូនប្អូនៗនៅតាមមណ្ឌលប្រឡងទាំងអស់ក្នុងបណ្តាខេត្តទាំងនោះ។ ដូច្នេះសូមប្អូនៗស្វែងរកកន្លែងផ្ញើកង់ និងម៉ូតូ ដែលមានចងជាបដាសម្គាល់ និងមានស្លាកសញ្ញា (Logo) ស.ស.យ.ក។
នៅខេត្តត្បូងឃ្មុំ ខេត្តព្រះសីហនុ និងបណ្តាខេត្តដទៃទៀត អភិបាលបាលខេត្តក៏បានប្រកាសពីការរៀបចំកន្លែងស្នាក់នៅជូនដល់បេក្ខជនប្រឡងបាក់ឌុប សម្រាប់ការស្នាក់នៅដោយឥតគិតថ្លៃ អំឡុងពេលប្រឡងរយៈពេល២ថ្ងៃ គឺនៅថ្ងៃទី៦-៧ ខែវិច្ឆិកា ឆ្នាំ២០២៣។ មណ្ឌលប្រឡងបាក់ឌុប ត្រូវបានរៀបចំឡើងនៅទីរួមខេត្ត ដូច្នេះបេក្ខជនមួយចំនួនមកពីតាមបណ្តាស្រុក-ឃុំនានា ត្រូវឡើងមកប្រឡងនៅទីរួមខេត្ត។
ការរៀបចំនេះ គឺពិតជាអាចធ្វើបាន បើសិនជាអាជ្ញាធរសមត្ថកិច្ចតាមបណ្តាខេត្ត រាជធានី ក្រុង ស្រុក ខណ្ឌ ឃុំ និងសង្កាត់ ឬក៏សហភាពសហព័ន្ធយុវជនកម្ពុជា ចង់ធ្វើនៅតាមគ្រប់មណ្ឌលប្រឡង។ ស្ថាប័នទាំងនេះ មានសមាជិកច្រើន។ ម្យ៉ាងទៀត ការរៀបចំដោយមិនគិតថ្លៃនេះ ក៏ត្រូវតែធានាដល់សុខសុវត្ថិភាព និងអនាម័យសម្រាប់អ្នកស្នាក់នៅ រួមទាំងកង់ ម៉ូតូរបស់អ្នកផ្ញើគ្រប់រូបផងដែរ។
គ្រាន់តែឈ្មោះថា មិនគិតថ្លៃ តែបន្ទប់ស្នាក់នៅមិនថា ផ្ទះសំណាក់ សណ្ឋាគារ ឬការស្នាក់នៅរួមទេ គឺមានអ្នកសម្អាតត្រឹមត្រូវ មានគ្រែ កង្ហារ មុង ភួយ ខ្នើយ ឬក៏ម៉ាស៊ីនត្រជាក់។ មានអ្នកបោសសម្អាត ដូចអ្វីដែលធ្លាប់បម្រើជូនភ្ញៀវ។ រីឯអ្នកស្នាក់នៅ ក៏ត្រូវរក្សាអនាម័យ និងចាត់ទុកដូចជាផ្ទះខ្លួនឯង គឺត្រូវចូលរួមសម្អាត និងមិនឱ្យមានបែកបាក់ ឬខូចខាតសម្ភារៈនោះទេ។
កន្លែងផ្ញើកង់ ម៉ូតូ ដោយមិនគិតថ្លៃវិញ ក៏ត្រូវតែមានចាត់អ្នកយាមឱ្យបានគ្រប់គ្រាន់ ដើម្បីរក្សាសុវត្ថិភាពម៉ូតូ និងកង់របស់បេក្ខជនប្រឡង។ មានអ្នកកិបសំបុត្រត្រឹមត្រូវ មានអ្នករៀបចំសណ្តាប់ធ្នាប់ រៀបចំកង់ម៉ូតូ មានខ្សែចងខណ្ឌកន្លែងទុកដាក់ម៉ូតូ ដើម្បីធានាថា មិនប៉ះពាល់ដល់សណ្តាប់ធ្នាប់ផ្លូវសាធារណៈ ហើយក៏មិនបែកបាក់ ឬក៏រលាត់ថ្នាំម៉ូតូ ហើយមួកសុវត្ថិភាពរបស់អ្នកជិះម៉ូតូក៏មិនធ្លាក់បែកបាក់ ឬក៏បាត់មួក បែកកញ្ចក់ម៉ូតូជាដើមឡើយ។ ជាពិសេស គឺម៉ូតូ កង់របស់បេក្ខជនប្រឡង ក៏មិនបាត់បង់ដោយប្រការណាមួយនោះទេ។ នេះជារឿងសំខាន់ ដែលត្រូវគិតគូរ។
ការរៀបចំកន្លែងស្នាក់នៅ និងកន្លែងផ្ញើកង់ម៉ូតូ សម្រាប់បេក្ខជនប្រឡងបាក់ឌុប ដោយឥតគិតថ្លៃនេះ ត្រូវបានអាជ្ញាធរខេត្ត និងសហភាពសហព័ន្ធយុវជនកម្ពុជា ស.ស.យ.ក តាមបណ្តាខេត្ត បានធ្វើឡើងច្រើនឆ្នាំមកហើយ។ នេះជាកាយវិការប្រកបដោយមនុស្សធម៌ ដើម្បីជួយសម្រាលការចំណាយ និងការលំបាករបស់បេក្ខជនប្រឡងបាក់ឌុប។
ក្រៅពីជំនួយមនុស្សធម៌នេះ អាជ្ញាធរសមត្ថកិច្ច រាជធានីខេត្ត ក្រុងស្រុកខណ្ឌ និងថ្នាក់ ដឹកនាំក្រសួងស្ថាប័នពាក់ព័ន្ធនានា ក៏គួរតែចាត់វិធានការបន្ថែមទៀត សម្រាប់អ្នកលក់ដូរមួយចំនួន និងម្ចាស់ផ្ទះសំណាក់ សណ្ឋាគារ ភោជនីយដ្ឋាន ហាងលក់ដូរមួយចំនួន គឺក្នុងអំឡុងពេលបុណ្យទាន ជាពិសេសពេលប្រឡងបាក់ឌុបនេះ ដែលបេក្ខជនឡើងមកប្រឡង និងខ្លះក៏ត្រូវបានក្រុមគ្រួសារជូនមកប្រឡងឆ្ងាយពីផ្ទះ ហើយត្រូវការស្នាក់នៅ និងទទួលទានអាហារតាមហាង ឬកន្លែងលក់បាយនានាជិតៗមណ្ឌលប្រឡង គឺមិនត្រូវដំឡើងថ្លៃបន្ទប់ សេវាស្នាក់នៅ ឬក៏ម្ហូបអាហារនោះទេ។ បើមិនចុះថ្លៃ ក៏សូមត្រឹមតែកុំឡើងថ្លៃ។
ជាបទពិសោធន៍កន្លងមក ក្នុងសង្គមយើង ម្ចាស់ផ្ទះសំណាក់ ម្ចាស់សណ្ឋាគារ ភោជនីយដ្ឋាន កន្លែងលក់ដូរអាហារនានា ជាពិសេសកន្លែងទទួលផ្ញើកង់ ម៉ូតូ ឡានខ្លះ គឺនៅពេលបុណ្យទាន ឬមានពិធីអ្វី ដែលមានមនុស្សច្រើនមកស្នាក់នៅ មកហូបចុក និងផ្ញើកង់ ម៉ូតូ ឡាន គឺតែងតែឡើងថ្លៃ។ ដូច្នេះអំឡុងពេលប្រឡងបាក់ឌុបនេះ បើមិនបានបញ្ចុះថ្លៃ ឬក៏មិនយកថ្លៃផ្ញើកង់ ម៉ូតូ ឡានទេ ដូចការរៀបចំរបស់អាជ្ញាធរសមត្ថកិច្ច និងសហភាពសហព័ន្ធយុវជនកម្ពុជា តាមបណ្តាខេត្តនានាទេ គឺសូមត្រឹមតែកុំឡើងថ្លៃ។ ពោលគឺបើយកលុយពីការផ្ញើកង់ ម៉ូតូ នៅតាមមណ្ឌលប្រឡង ពិសេសនៅភ្នំពេញ គឺត្រឹមតែកង់១គ្រឿង៥០០រៀល ឬក៏ម៉ូតូ១គ្រឿងថ្លៃត្រឹម១០០០រៀល ក៏បានដែរ បើ ទោះបីជាតម្លៃភាស៊ីបន្ទុករបស់ក្រសួងសេដ្ឋកិច្ច និងហិរញ្ញវត្ថុ តម្រូវឱ្យយកថ្លៃផ្ញើម៉ូតូ ១គ្រឿងត្រឹមតែ ៣០០រៀល ក៏ដោយ។
ក្រៅពីវិធានការណែនាំរបស់អាជ្ញាធរសមត្ថកិច្ចលើអ្នកទទួលផ្ញើម៉ូតូ កង់ និងភោជនីយដ្ឋាន អាហារដ្ឋាន ផ្ទះសំណាក់ សណ្ឋាគារ រួមទាំងអ្នកផ្តល់សេវាដឹកជញ្ជូននានា កុំឱ្យឡើងថ្លៃ ហើយក្រុមអ្នកប្រកបរបរទទួលផ្ញើម៉ូតូកង់ អាហារដ្ឋាន ផ្ទះសំណាក់ ភោជនីយដ្ឋាន សណ្ឋាគារ ឬក៏អ្នករត់ម៉ូតូឌុប ឡានឈ្នួល រត់ម៉ូតូកង់បី តុកតុក ជាដើម ក៏គួរតែចូលរួមទាំងអស់គ្នា។ គឺត្រូវមានចិត្តយោគយល់ កុំឡើងថ្លៃ ទោះជាមានមនុស្សច្រើននៅថ្ងៃបុណ្យទាន ឬនៅថ្ងៃប្រឡងបាក់ឌុបនេះក៏ដោយ។ បើថា មិនអាចមិនយកលុយទេ ឬក៏មិនបានចុះថ្លៃអ្វីទេ គឺធ្លាប់យកប៉ុណ្ណា ក៏យកថ្លៃដដែលប៉ុណ្ណោះ។ ចូរគិតថា រឿងនេះ ម្តងគេ ម្តងយើង។ យើងចូលរួមជួយគ្នាបានប៉ុណ្ណា ធ្វើតាមលទ្ធភាពដែលអាចធ្វើបាន៕
ដោយ ៖ មុត ស្រីពៅ
ចែករំលែកព័តមាននេះ