បុរសជាជនជាតិចិនម្នាក់បានចូលទៅម៉ាស្សានៅមួយកន្លែង លុះពេលចេញពីម៉ាស្សាវិញ ក៏ស្រាប់តែត្រូវជនមួយក្រុមនាំគ្នាមកវា.យ រួចអូសបុរសចិនរូបនោះបង្ខំឱ្យចូលក្នុងរថយន្តម៉ាកតូយ៉ូតាព្រូសមួយគ្រឿង ហើយបើករថយន្ត
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសជាជនជាតិចិនម្នាក់បានចូលទៅម៉ាស្សានៅមួយកន្លែង លុះពេលចេញពីម៉ាស្សាវិញ ក៏ស្រាប់តែត្រូវជនមួយក្រុមនាំគ្នាមកវា.យ រួចអូសបុរសចិនរូបនោះបង្ខំឱ្យចូលក្នុងរថយន្តម៉ាកតូយ៉ូតាព្រូសមួយគ្រឿង ហើយបើករថយន្តរត់គេចខ្លួនបាត់ បង្កឱ្យមានការភ្ញាក់ផ្អើលកាលពីវេលាម៉ោង១១និង៥៧នាទីយប់ ថ្ងៃទី១ ខែវិច្ឆិកា ឆ្នាំ២០២៣ នៅចំណុចបុរីញ៉ូថោន ស្ថិតក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
បើតាម ប្រភពព័ត៌មានពីស្ត្រីម៉ាស្សាម្នាក់ បាននិយាយប្រាប់លោកមេភូមិឱ្យដឹងថា «ជនរងគ្រោះដែលត្រូវគេចាប់បង្ខំវា.យអូសចូលក្នុងរថយន្តនោះ គឺជាជនជាតិចិន ដែលធ្លាប់ចូលម៉ាស្សាជាច្រើនដងមកហើយ»។
ស្ត្រីម៉ាស្សាខាងលើបន្តថា «នៅមុនពេលកើតហេតុ បុរសជនជាតិចិនរូបនោះបានបើករថយន្តមួយគ្រឿងម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ2AP-6382 ចូលទៅម៉ាស្សានៅទីតាំងកើតហេតុ ។ ខណៈពេលជនរងគ្រោះកំពុងតែម៉ាស្សានោះ ស្រាប់តែឃើញមានរថយន្តមួយគ្រឿងទៀតម៉ាកតូយ៉ូតាព្រូស ពណ៌ស មិនចាំស្លាកលេខ បានបើកទៅវិញទៅមកកាត់មុខកន្លែងម៉ាស្សាជាច្រើនដង»។
ស្ត្រីម៉ាស្សាខាងលើបន្តទៀតថា «លុះពេលជនជាតិចិនដែលជាជនរងគ្រោះចេញពីម៉ាស្សាវិញ ក៏ស្រាប់តែត្រូវជនសង្ស័យមួយក្រុមមានគ្នា៣នាក់ ពាក់អាវភ្លៀងទាំង៣នាក់ដែលជិះរថយន្តម៉ាកតូយ៉ូតាព្រូសនោះ ប្រដាប់ដោយដាវ បានចាប់វា.យបង្ខំជនរងគ្រោះជាជនជាតិចិនឱ្យចូលក្នុងរថយន្ត។ ហើយខណៈពេលកំពុងតែចាប់បង្ខំជនរងគ្រោះ និងវា.យឱ្យចូលរថយន្តនោះ ក៏បានធ្លាក់សោរថយន្ដរបស់ជនរងគ្រោះនៅកន្លែងកើតហេតុ ចំណែកក្រុមជនសង្ស័យវិញ ក៏ដឹកជនរងគ្រោះជាជនជាតិចិនរត់គេចខ្លួនបាត់ស្រមោលតែម្ដង។
បើតាមប្រជាពលរដ្ឋនៅកន្លែងកើតហេតុក៏បានប្រាប់ដែរថា «ពួកគាត់ឃើញសកម្មភាពជនជាតិចិនមួយក្រុម ចាប់ប្រវា.យប្រតប់ជនរងគ្រោះបង្ខំចូលក្នុងរថយន្ត ហើយជនរងគ្រោះស្រែកដែរ ប៉ុន្តែមិនដឹងថា តើស្រែកថាម៉េចនោះទេ? ព្រោះស្រែកជាភាសាចិន ណាមួយក្រុមជនសង្ស័យមានដាវនៅក្នុងដៃទៀត ទើបពួកគាត់មិនហ៊ានចូលទៅជួយ»។
ក្រោយពេលកើតហេតុ បងប្អូនប្រជាពលរដ្ឋនៅកន្លែងកើតហេតុ បានទាក់ទងទៅលោកមេភូមិ និងកម្លាំងសមត្ថកិច្ចនគរបាលប៉ុស្តិ៍ និងជំនាញព្រហ្មទណ្ឌខណ្ឌពោធិ៍សែនជ័យ ដើម្បីឱ្យកម្លាំងនគរបាលប៉ុស្តិ៍យករថយន្តរបស់ជនជាតិចិន ដែលត្រូវជនសង្ស័យមួយក្រុមចាប់វា.យបង្ខំចូលរថយន្តនោះ យកទៅរក្សាទុក ដើម្បីរង់ចាំធ្វើការស្រាវជ្រាវបន្តទៀតថា តើនេះជាករណីអ្វីឲ្យពិតប្រាកដ?៕
ចែករំលែកព័តមាននេះ