រាជធានីភ្នំពេញ ៖ រាជរដ្ឋាភិបាលកម្ពុជា-ចក្រភពអង់គ្លេស បានឯកភាពធ្វើការរួមគ្នា ក្នុងការពង្រឹង និងពង្រីកបន្ថែមទៀត នូវកិច្ចសហប្រតិបត្តិការក្នុងវិស័យ ដែលមានសក្ដានុពលខ្ពស់ នាពេលខាងមុខ ។…
រាជធានីភ្នំពេញ ៖ រាជរដ្ឋាភិបាលកម្ពុជា-ចក្រភពអង់គ្លេស បានឯកភាពធ្វើការរួមគ្នា ក្នុងការពង្រឹង និងពង្រីកបន្ថែមទៀត នូវកិច្ចសហប្រតិបត្តិការក្នុងវិស័យ ដែលមានសក្ដានុពលខ្ពស់ នាពេលខាងមុខ ។
ការឯកភាពទ្វេភាគីនេះ ធ្វើឡើងក្នុងកិច្ចប្រជុំពិគ្រោះយោបល់ទ្វេភាគី លើកទី១ រវាងក្រសួងការបរទេសកម្ពុជា-អង់គ្លេស ដែលភាគីកម្ពុជាដឹកនាំដោយឯកឧត្តមបណ្ឌិត ចែម វីឌ្យ៉ា រដ្ឋលេខាធិការក្រសួងការបរទេស និងភាគីអង់គ្លេសដឹកនាំដោយលោក Dominic Williams ឯកអគ្គរាជទូត នៃចក្រភពអង់គ្លេស ប្រចាំកម្ពុជា នាថ្ងៃទី៣១ តុលា នៅទីស្ដីការក្រសួង ។
ក្នុងឱកាសនោះ ថ្នាក់ដឹកនាំ នៃគណៈប្រតិភូទាំងពីរ បានចុះហត្ថលេខាលើអនុស្សរណៈ នៃការយោគយល់គ្នា ស្តីពីការបង្កើតកិច្ចពិគ្រោះយោបល់ នយោបាយទ្វេភាគី រវាងក្រសួងការបរទេសទាំងពីរ ។
ឯកឧត្តមបណ្ឌិត ចែម វីឌ្យ៉ា បានជម្រាបជូនភាគីមិត្ត អំពីការអភិវឌ្ឍសេដ្ឋកិច្ច និងស្ថានភាពនយោបាយថ្មីៗ នៅកម្ពុជា ជាពិសេសការបោះឆ្នោតសកលឆ្នាំ២០២៣ កម្មវិធីអាទិភាព ៦ចំណុច និងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជាថ្មី ។
ជាការឆ្លើយតប លោកទូត Dominic Williams បានកោតសរសើរអំពីវឌ្ឍនភាព និងសមិទ្ធផល ដ៏គួរឱ្យកត់សម្គាល់របស់កម្ពុជា និងបានបញ្ជាក់ឡើងវិញ អំពីការប្តេជ្ញាចិត្តយ៉ាងមុតមាំរបស់ចក្រភពអង់គ្លេស ក្នុងការបន្តពង្រឹងកិច្ចសហប្រតិបត្តិការ ទាំងក្នុងក្របខ័ណ្ឌទ្វេភាគី និងពហុភាគី រវាងប្រទេសទាំងពីរ ។
ក្នុងជំនួបភាគីទាំងពីរ បានឯកភាពធ្វើការរួមគ្នា ក្នុងការពង្រឹងនិងពង្រីកបន្ថែមទៀត នូវកិច្ចសហប្រតិបត្តិការក្នុងវិស័យ ដែលមានសក្ដានុពលខ្ពស់ នាពេលខាងមុខ។ ភាគីទាំងពីរ បានសន្យាជំរុញការផ្លាស់ប្តូរ ទស្សនកិច្ចទៅវិញទៅមកបន្ថែមទៀត ព្រមទាំងបន្តការពិគ្រោះយោបល់ និងកិច្ចសន្ទនា ទៀងទាត់រវាងប្រទេសទាំងពីរ ។
ជាមួយគ្នានោះដែរភាគីទាំងពីរ ចាត់ទុកកិច្ចពិគ្រោះយោបល់ទ្វេភាគី ជាយន្តការចាំបាច់ លើកកម្ពស់កិច្ចសហប្រតិបត្តិការ ដែលមានសក្តានុពល រវាងប្រទេសទាំងពីរ។ កិច្ចពិគ្រោះយោបល់ទ្វេភាគីលើកទី២ នឹងធ្វើឡើងនៅទីក្រុងឡុងដ៏ នាឆ្នាំក្រោយ ៕
ចែករំលែកព័តមាននេះ