ក្រសួងធនធានទឹក និងឧតុនិយម បានបញ្ជាក់ប្រាប់ឱ្យដឹងថា ធាតុអាកាសចាប់ពីថ្ងៃទី១ រហូតដល់ថ្ងៃទី៣ ខែវិច្ឆិកា ឆ្នាំ២០២៣ខាងមុខនេះ នឹងមានភ្លៀងធ្លាក់គ្របដណ្តប់លើផ្ទៃដីតែ២០% ទៅ៣០%តែប៉ុណ្ណោះ
រាជធានីភ្នំពេញ ៖ ក្រសួងធនធានទឹក និងឧតុនិយម បានបញ្ជាក់ប្រាប់ឱ្យដឹងថា ធាតុអាកាសចាប់ពីថ្ងៃទី១ រហូតដល់ថ្ងៃទី៣ ខែវិច្ឆិកា ឆ្នាំ២០២៣ខាងមុខនេះ នឹងមានភ្លៀងធ្លាក់គ្របដណ្តប់លើផ្ទៃដីតែ២០% ទៅ៣០%តែប៉ុណ្ណោះ។
យោងតាមសេចក្តីជូនដំណឹងស្តីពីអំពីស្ថានភាពធាតុអាកាសនៅព្រះរាជាណាចក្រកម្ពុជា សម្រាប់ថ្ងៃទី០១ ខែវិច្ឆិកា ឆ្នាំ២០២៣ របស់ក្រសួងធនធានទឹក និងឧតុនិយម បានលើកឡើងថា ព្រះរាជាណាចក្រកម្ពុជា ទទួលឥទ្ធិពលពីប្រព័ន្ធនៃសម្ពាធខ្ពស់ពីប្រទេសចិន ជាមួយនឹងការចាប់ផ្តើមទទួលនូវរបបខ្យល់មូសុងឦសាន។
ក្រសួងបានបន្ថែមថា ស្ថានភាពបែបនេះ នឹងធ្វើឱ្យចាប់ពីថ្ងៃទី០១ រហូតដល់ថ្ងៃទី០៣ ខែវិច្ឆិកា បណ្តាខេត្តនៅប៉ែកខាងជើង ប៉ែកឦសាន និងបណ្តាខេត្តនៅជាប់មាត់សមុទ្រ អាចពុំមានភ្លៀងធ្លាក់ ឬមានភ្លៀងធ្លាក់ក្នុងកម្រិតតិចតួច ជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដីតែ ១០% ទៅ ២០%តែប៉ុណ្ណោះ។
ក្រសួងបន្ថែមទៀតថា រីឯនៅរាជធានីភ្នំពេញ បណ្តាខេត្តនៅទិសខាងត្បូង និងទិសខាងកើតជាប់នឹងប្រទេសវៀតណាមវិញ អាចមានភ្លៀងធ្លាក់នៅក្នុងកម្រិតចាប់ពីខ្សោយ ទៅមធ្យម ជាមួយនឹងទំហំទឹកភ្លៀងធ្លាក់គ្របណ្ដប់លើផ្ទៃដីចាប់ពី ២០% ទៅ ៣០%៕
ចែករំលែកព័តមាននេះ