ADផ្ទាំងផ្សព្វផ្សាយពាណិជ្ជកម្ម

ក្រុមហាម៉ាស់ប្រកាសថាខ្លួននឹងដោះលែងចំណាប់ខ្មាំងមួយចំនួន

1 ឆ្នាំ មុន

០១ ខែ វិច្ឆិកា ឆ្នាំ ២០២៣ ម៉ោង ០៤:០៥

តំបន់ហ្កាហ្សា៖ អ្នកនាំពាក្យក្រុមហាម៉ាស់ឈ្មោះអាប៊ូ អ៊ូបៃដា (Abu Ubaida) ថ្លែងថានារយៈពេលប៉ុន្មានថ្ងៃខាងមុខនេះ ចំណាប់ខ្មាំងខ្លះនឹងដោះលែងឱ្យមានសេរីភាពឡើងវិញ។ អ្នកនាំពាក្យរូបនេះមិនបានបញ្ជាក់ច្បាស់ថាតើចំណាប់ខ្មាំងដែលត្រៀមដោះលែងនោះមានចំនួនប៉ុន្មាននាក់ ហើយក៏មិនបានបញ្ជាក់ថានៅក្នុងចំណោមអ្នកទាំងនោះមានជនជាតិអ្វីខ្លះទេ។ អ្នកនាំពាក្យរូបនេះថ្លែងបន្តទៀតថាមានការប្រយុទ្ធគ្នារវាងទាហានអ៊ីស្រាអែល…

តំបន់ហ្កាហ្សា៖ អ្នកនាំពាក្យក្រុមហាម៉ាស់ឈ្មោះអាប៊ូ អ៊ូបៃដា (Abu Ubaida) ថ្លែងថានារយៈពេលប៉ុន្មានថ្ងៃខាងមុខនេះ ចំណាប់ខ្មាំងខ្លះនឹងដោះលែងឱ្យមានសេរីភាពឡើងវិញ។ អ្នកនាំពាក្យរូបនេះមិនបានបញ្ជាក់ច្បាស់ថាតើចំណាប់ខ្មាំងដែលត្រៀមដោះលែងនោះមានចំនួនប៉ុន្មាននាក់ ហើយក៏មិនបានបញ្ជាក់ថានៅក្នុងចំណោមអ្នកទាំងនោះមានជនជាតិអ្វីខ្លះទេ។

អ្នកនាំពាក្យរូបនេះថ្លែងបន្តទៀតថាមានការប្រយុទ្ធគ្នារវាងទាហានអ៊ីស្រាអែល និងយុទ្ធជនរបស់ក្រុមហាម៉ាស់នៅលើសមរភូមិបីកន្លែង។ ក្រុមហាម៉ាស់បាញ់ស្លាប់ និងរបួសទាហានអ៊ីស្រាអែលមួយចំនួន និងកម្ទេចយានជំនិះរបស់អីស្រាអែល២២គ្រឿង។ កងទ័ពជើងទឹកហាម៉ាស់ចាប់ផ្ដើមប្រើប្រាស់គ្រាប់មីស៊ីលបាញ់ពីក្រោមទឹកជាលើកដំបូងឈ្មោះអាស៊ីហ្វ (Aasif)។

ចំពោះព័ត៌មានដែលផ្សាយថាអ៊ីស្រាអែលរំដោះបានចំណាប់ខ្មាំងជាស្ត្រីជនជាតិអ៊ីស្រាអែលម្នាក់ និងទាហានអ៊ីស្រាអែលនោះ អ្នកនាំពាក្យរូបនេះអះអាងថាអ្នកទាំងនោះមិនមែនស្ថិតនៅក្នុងដៃរបស់ក្រុមហាម៉ាស់ទេ។ មានន័យថាស្ថិតនៅក្នុងដៃរបស់ក្រុមផ្សេង។ អាប៊ូ អ៊ូបៃដា ថ្លែងថាយើងបានជូនដំណឹងទៅអ្នកសម្រុះសម្រួលរួចហើយអំពីគម្រោងដោះលែងជនជាតិបរទេស។ ប៉ុន្តែអ្នកនាំពាក្យរូបនេះព្រមានថាតំបន់ហ្កាហ្សានឹងក្លាយជាទីលានបង្ហូរឈាមសម្រាប់ពួកសត្រូវរបស់យើង។

នៅពេលនេះ ចំណាប់ខ្មាំង២៤០នាក់ស្ថិតនៅក្នុងដៃរបស់ក្រុមហាម៉ាស់។ ក្នុងនោះ ៥នាក់ត្រូវពួកគេដោះលែងមកវិញបន្ទាប់ពីមានការសម្រុះសម្រួល និងការចរចាគ្នាតាមរយៈការទូត។ ក្រុមហាម៉ាស់បានបបួលអ៊ីស្រាអែលដូរគ្នារវាងចំណាប់ខ្មាំងទាំងនោះ និងអ្នកទោសជនជាតិប៉ាឡេស្ទីនដែលកំពុងជាប់ឃុំនៅអ៊ីស្រាអែល។ ប៉ុន្តែអ៊ីស្រាអែលមិនទាន់យល់ព្រមទេ។

អ៊ីស្រាអែលចាត់ទុកអ្នកទោសទាំងនោះជាភ្នាក់ងាររបស់ក្រុមហាម៉ាស់ដែលអាចបង្កគ្រោះថ្នាក់ចំពោះសន្តិសុខជាតិរបស់ខ្លួន។ យោងតាមអ្នកនាំពាក្យរូបនេះ, បើចង់ឱ្យក្រុមហាម៉ាស់ដោះលែងចំណាប់ខ្មាំងទាំងអស់លុះត្រាអ៊ីស្រាអែលដោះលែងអ្នកទោសប៉ាឡេស្ទីនទាំងអស់ពីពន្ធនាគារ។ អាប៊ូ អូបៃដា ថ្លែងថាមានជម្រើសជាច្រើននៅក្នុងការដោះដូរគ្នានេះ។ អ៊ីស្រាអែលអាចប្រើប្រាស់វិធីដូរគ្នាម្ដងទាំងអស់ក៏បាន។ ឬមិនដូច្នេះទេ អ៊ីស្រាអែលអាចដោះលែងជាលក្ខណៈរំលស់ម្ដងបន្តិចៗក៏បាន។

មានន័យថាអ៊ីស្រាអែល និងហាម៉ាស់អាចរំលស់អ្នកទោស និងចំណាប់ខ្មាំងគ្នាទៅវិញទៅមកម្ដងបន្តិចៗទៅតាមដំណាក់កាលនីមួយៗ។ បើគេស្ដាប់ពីខាងភាគីអ៊ីស្រាអែលវិញម្ដង អ៊ីស្រាអែលហាក់ដូចជាមិនប្រញាប់ប្រញាល់នៅក្នុងការដោះដូរចំណាប់ខ្មាំងទេ ហើយក៏មិនធ្វើអត្ថាធិប្បាយលើរឿងនេះដែរ។ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ គ្រាន់តែនិយាយដោយខ្លីថាលោកនឹងខិតខំប្រើប្រាស់គ្រប់មធ្យោបាយទាំងអស់ដើម្បីនាំយកចំណាប់ខ្មាំងទាំងនោះត្រឡប់មកវិញ៕

ប្រភព៖ Reuters និង Wionews
https://www.wionews.com/world/will-free-foreign-hostages-in-the-next-few-days-says-hamas-653626
https://www.reuters.com/world/middle-east/hamas-release-some-foreign-captives-coming-days-armed-wing-spokesman-2023-10-31/