ហាម៉ាស់ចេញវីដេអូពីចំណាប់ខ្មាំងអ៊ីស្រាអែល៣នាក់ ក្នុងនោះនារីជាទាហានម្នាក់ត្រូវរំដោះ
សង្គ្រាមអ៊ីស្រាអែលនិងក្រុមហាម៉ាស់ ៖ ក្រុមហាម៉ាស់នាថ្ងៃទី៣០តុលាបានផ្សាយវីដេអូមួយ បង្ហាញ
សង្គ្រាមអ៊ីស្រាអែលនិងក្រុមហាម៉ាស់ ៖ ក្រុមហាម៉ាស់នាថ្ងៃទី៣០តុលាបានផ្សាយវីដេអូមួយ បង្ហាញនារីចំណាប់ខ្មាំងអ៊ីស្រាអែល៣នាក់ ក្នុងចំណោមចំណាប់ខ្មាំងស្ថិតក្នុងកណ្ដាប់ដៃគេនៅជ្រោយហ្គាហ្សា។ នេះជាវីដេអូមួយដែលចេញផ្សាយចាប់តាំងពីការវាយប្រហារបង្ហូរឈាមលើអ៊ីស្រាអែលពីថ្ងៃទី៧តុលាមក។
នាយករដ្ឋមន្ត្រីអ៊ីស្រាអែលលោកបេនចាមីននេតាន់យ៉ាហ៊ូចាត់ទុកវីដេអូនោះថាជាការឃោសនាចិត្តសាស្ត្រដ៏សាហាវ។ វីដេអូរយៈពេល៧៦វិនាទីនោះ ចេញផ្សាយដោយបណ្ដាសារព័ត៌មានហាម៉ាស់ជាមួយចំណងជើងថា អ្នកទោសស្យូនីស្តមួយចំនួនផ្ញើសារដល់បេនចាមីននេតាន់យ៉ាហ៊ូនិងរដ្ឋាភិបាលរបស់គេ។ តាមរូបភាពគេឃើញនារីអ៊ីស្រាអែលទាំង៣នាក់នោះ អង្គុយលើកៅអីធ្វើពីប្លាស្ទិក។ ក្នុងចំណោមអ្នកទាំង៣ នារីអង្គុយកណ្ដាលគេនិយាយក្នុងសំឡេងម៉ាត់ៗ អំពាវនាវឲ្យនាយករដ្ឋមន្ត្រីអ៊ីស្រាអែលព្រមព្រៀងដោះដូរអ្នកទោសគ្នា ជាមួយក្រុមហាម៉ាស់ដើម្បីឲ្យទទួលបានការដោះលែងពួកគេ។
សារព័ត៌មានអ៊ីស្រាអែលជាច្រើនបានផ្សាយបន្តវីដេអូនោះដោយគូសបញ្ជាក់ថា ការនិយាយរបស់នារីនោះ ជាការបង្ខំពីពួកហាម៉ាស់ឲ្យនិយាយតាមខ្លួន។ រដ្ឋមន្ត្រីការពារប្រទេសអ៊ីស្រាអែលលោកយ៉ូអាវហ្គាល់ឡង់កាលពីថ្ងៃទី២៩តុលា បានចោទប្រកាន់ក្រុមហាម៉ាស់ថា ធ្វើសង្គ្រាមចិត្តសាស្ត្រពីបញ្ហាចំណាប់ខ្មាំង បន្ទាប់ពីចលនាអ៊ិស្លាមនោះនិយាយថា ត្រៀមដោះលែងចំណាប់ខ្មាំងទាំងអស់ ជាថ្នូរនឹងការដោះលែងអ្នកទោសប៉ាឡេស្ទីនទាំងអស់ដែលជាប់ឃុំឃាំងនៅអ៊ីស្រាអែល។
ចាប់តាំងពីយប់ថ្ងៃទី២៧តុលាមក អ៊ីស្រាអែលបានបង្កើនប្រតិបត្តិការវាយលុកទាំងតាមជើងអាកាស ជើងគោកនិងជើងទឹក លើជ្រោយហ្គាហ្សាដើម្បីកម្ទេចពួកហាម៉ាស់និងរំដោះចំណាប់ខ្មាំង ឲ្យបានវិលត្រឡប់មកផ្ទះវិញ។ នាថ្ងៃទី៣០តុលាកងទ័ពអ៊ីស្រាអែល ប្រកាសពីការរំដោះបាននារីទាហានអ៊ីស្រាអែលម្នាក់ ដែលចាប់ជាចំណាប់ខ្មាំងក្នុងឱកាសនៃការវាយលុកតាមជើងគោករបស់ខ្លួនលើហ្គាហ្សា។ នារីជាទាហានរូបនេះមានឈ្មោះថាORI MEGIDISH ។ តាមតុល្យការចុងក្រោយរបស់អ៊ីស្រាអែលថា ចំណាប់ខ្មាំងយ៉ាងតិច២៣៩នាក់ត្រូវបានចាប់ដោយកងកុំម៉ង់ដូក្រុមហាម៉ាស់៕
ចែករំលែកព័តមាននេះ