ខេត្តស្ទឹងត្រែង ៖ នៅព្រឹកថ្ងៃទី៣១ ខែតុលា ឆ្នាំ២០២៣ អភិបាលខេត្តស្ទឹងត្រែង លោក ស្វាយ
សំអ៊ាង បានបើកកិច្ចប្រជុំដើម្បីជំរុញឱ្យសមត្ថកិច្ច និងអាជ្ញាធរមូលដ្ឋាន បន្តពង្រឹងការអនុវត្តគោលនយោបាយភូមិ-ឃុំមានសុវត្ថិភាព ដោយត្រូវសហការរួមគ្នាចុះបង្ក្រាបទីតាំងល្បែងស៊ីសងខុសច្បាប់គ្រប់ប្រភេទ ព្រមទាំងត្រូវចុះពិនិត្យជាក់ស្តែង លើទីតាំងណាដែលសង្ស័យមានបង្កប់លេងល្បែងស៊ីសងដាច់ខាត ។
លោកអភិបាលខេត្តថ្លែងនៅក្នុងកិច្ចប្រជុំត្រួតពិនិត្យវឌ្ឍនៈភាពប្រចាំខែតុលា ឆ្នាំ២០២៣ និងលើកទិសដៅភារកិច្ចបន្តរបស់រដ្ឋបាលខេត្តស្ទឹងត្រែង ធ្វើឡើងនៅសាលាខេត្តស្ទឹងត្រែង នាព្រឹកថ្ងៃទី ៣១ ខែតុលា ឆ្នាំ២០២៣នេះ ដោយមានការចូលរួមពីអភិបាលរងខេត្តប្រធាន-អនុប្រធានមន្ទីរ អង្គភាពជុំវិញខេត្ត អភិបាលក្រុងស្រុក និងថ្នាក់ដឹកនាំ កងកម្លាំងទាំង៣ ក្នុងខេត្តស្ទឹងត្រែងផងដែរ ។
លោកអភិបាលខេត្តស្ទឹងត្រែងបានមានប្រសាសន៍ថា បញ្ហាល្បែងស៊ីសងនៅមូលដ្ឋាននឹងបង្ករឲ្យមានភាពអសន្តិសុខ អសុវត្តិភាព និងបាត់បង់សណ្តាប់ធ្នាប់សាធារណៈ ដូចនេះ អាជ្ញាធរមូលដ្ឋាន ក្រុង ស្រុក និងសមត្ថកិច្ចពាក់ព័ន្ធ ត្រូវពង្រឹងកិច្ចសហការគ្នាចុះតាមដានត្រួតពិនិត្យ និងបង្ក្រាបជាបន្ទាន់ ដើម្បីធានាថាទីតាំងមុខសញ្ញា ដែលប្រព្រឹត្តបទល្មើសល្បែងភ្នាល់មាន់ល្បែងស៊ីសងអនឡាញ និងល្បែងខុសច្បាប់គ្រប់ប្រភេទ មិនឱ្យកើតមានឡើងសារជាថ្មី ឬលួចលាក់លេងជាថ្មីបន្ថែមទៀត នៅក្នុងភូមិសាស្ត្រ និងដែនសមត្ថកិច្ចរបស់ខ្លួន ។
លោកលោកអភិបាលមានប្រសាសន៍ទៀតថា ដើម្បីសុខសុវត្តិភាពដល់ប្រជាពលរដ្ឋ និងធានាបាននូវសន្តិសុខសណ្តាប់សាធារណៈបានល្អប្រសើរ អាជ្ញាធរមូលដ្ឋាន កងកម្លាំងមានសមត្ថកិច្ច ត្រូវបន្តអនុវត្តគោលនយោបាយភូមិ-ឃុំ មានសុវត្ថិភាព ឱ្យមានប្រសិទ្ធភាព ព្រមទាំងត្រូវបង្កើនកិច្ចសហការគ្នា ក្នុងការអនុវត្តការងារបង្ក្រាបបទល្មើសគ្រប់ប្រភេទក្នុងសាស្ត្រខេត្តស្ទឹងត្រែង ។
លោកបញ្ជាក់ទៀតថា រាជរដ្ឋាភិបាលកម្ពុជានីតិកាលទី៧នៃរដ្ឋសភាបានដាក់ចេញនូវគោលនយោបាយយុទ្ធសាស្ត្របញ្ជកោណដំណាក់កាលទី១ បាននិងកំពុងពង្រឹងប្រសិទ្ធភាពការងារទាំងថ្នាក់ជាតិ និងថ្នាក់ក្រោមជាតិ ដើម្បីថែរក្សាសុខសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម ឱ្យបានល្អប្រសើរ និងការអភិវឌ្ឍសេដ្ឋកិច្ចសង្គម ឱ្យមានភាពរីកចម្រើនលើគ្រប់វិស័យ ។ ដើម្បីរួមចំណែកជាមួយរាជរដ្ឋាភិបាល ឲ្យសម្រេចបានចក្ខុវិស័យឆ្នាំ២០៣០ ជាប្រទេស ដែលមានចំណូលសេដ្ឋកិច្ចមធ្យមកម្រិតខ្ពស់ និងឆ្នាំ២០៥០ ជាប្រទេស ដែលមានចំណូលសេដ្ឋកិច្ចកម្រិតខ្ពស់ យើងត្រូវបង្កើនការអនុវត្តការងារ និងពង្រឹងសន្តិសុខសណ្តាប់សាធារណៈនៅមូលដ្ឋានឲ្យមានភាពល្អប្រសើរ។
យោងតាមរបាយការណ៍ប្រចាំខែតុលា ឆ្នាំ២០២៣ របស់រដ្ឋបាលខេត្តស្ទឹងត្រែង ជាលទ្ធផលអាជ្ញាធរមូលដ្ឋាន បានអនុវត្តគោលនយោបាយភូមិ-ឃុំ-សង្កាត់មានសុវត្ថិភាព តាមរយៈការធ្វើការផ្សព្វផ្សាយគោលនយោបាយបាន១៧២លើក, បានធ្វើវេទិកាសាធារណៈ១៣២លើកបង្ក្រាបល្បែងស៊ីសងខុសច្បាប់ ស្ថិតនៅភូមិលើ សង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង ដោយបានធ្វើការឃាត់ខ្លួនអ្នកលេងល្បែងស៊ីសងខុសច្បាប់០៧នាក់ (ស្រី០៥នាក់) និងវត្ថុតាង ព្រមទាំងកម្លាំងជំនាញបានធ្វើការអប់រំណែនាំ និងធ្វើកិច្ចសន្យាឱ្យបញ្ឈប់លេងល្បែងស៊ីសងឱ្យត្រឡប់ទៅលំនៅឋានវិញ ៕
ចែករំលែកព័តមាននេះ