រាជធានីភ្នំពេញ ៖ កម្ពុជាបានបង្ហាញនូវការស្វាគមន៍ ចំពោះគ្រប់បណ្ដាវិនិយោគិនទាំងអស់ ចូលមកបណ្តាក់ទុនវិនិយោគ នៅប្រទេសកម្ពុជា ពិសេសបើកការស្វាគមន៍ ចំពោះក្រុមហ៊ុន ដែលមានឆន្ទៈខ្ពស់ ក្នុងការចូលរួមកាត់បន្ថយការបំពុលបរិស្ថាន ។
ការស្វាគមន៍នេះ ខណៈឯកឧត្តម ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតឱ្យក្រុមហ៊ុន Metal Jewelry ដឹកនាំដោយលោក Timothe DELHAISE នាយកប្រតិបត្តិក្រុមហ៊ុន ចូលជួបសម្ដែងការគួរសម និងពិភាក្សាការងារ កាលពីថ្ងៃទី៣០ ខែតុលា ឆ្នាំ២០២៣ ។
ក្នុងជំនួបនោះ ក្រុមហ៊ុនបានយកឱកាសនេះ ដើម្បីថ្លែងអំណរគុណដល់រាជរដ្ឋាភិបាលកម្ពុជា ពិសេសចំពោះក្រុមប្រឹក្សាអភិវឌ្ឍន៍កម្ពុជា ដែលជានិច្ចជាកាលតែងតែជួយសម្របសម្រួល និងគាំទ្រដល់ការអនុវត្តការងាររបស់ក្រុមហ៊ុន ។
ជាមួយគ្នានេះ នាដើមខែធ្នូ ឆ្នាំ២០២៣ ខាងមុខ ក្រុមហ៊ុននឹងផ្តើមដំណើការសាងសង់រោងចក្ររបស់ខ្លួនជាថ្មីម្ដងទៀត តែបានផ្អាកដោយសារស្ថានភាពជំងឺកូវីដ-១៩ ដោយក្នុងនោះ ក្រុមហ៊ុនក៏ផ្តោតការយកចិត្តទុកដាក់ជាសំខាន់ ទៅលើការការពារបរិស្ថាន ពិសេសការព្យាយាមឈានទៅរកអព្យាក្រឹត្យកាបូន ។
តាមរយៈជំនួបពិភាក្សានាឱកាសនេះ ឯកឧត្តម ឧបនាយករដ្ឋមន្ត្រីស៊ុន ចាន់ថុល បានបង្ហាញនូវការស្វាគមន៍របស់កម្ពុជា ចំពោះគ្រប់បណ្ដាវិនិយោគិនទាំងអស់ចូលមកបណ្តាក់ទុនវិនិយោគ នៅប្រទេសកម្ពុជា ពិសេសបើកការស្វាគមន៍ចំពោះក្រុមហ៊ុន ដែលមានឆន្ទៈខ្ពស់ ក្នុងការចូលរួមកាត់បន្ថយការបំពុលបរិស្ថាន ។
ឯកឧត្តម បន្តថា រាជរដ្ឋាភិបាលកម្ពុជា មានទិសដៅក្នុងការកាត់បន្ថយការបំភាយឧស្ម័នកាបូន តាមរយៈការប្រើប្រាស់ថាមពល ដែលស្អាត (Clean Energy) និងអព្យាក្រឹត្យកាបូន ត្រឹមឆ្នាំ២០៥០ ៕
ចែករំលែកព័តមាននេះ