ខេត្តកណ្តាល ៖ ជនសង្ស័យប្រើប្រាស់ថ្នាំញៀន២នាក់ បានត្រូវប៉ូលិសប៉ុស្តិ៍តាខ្មៅសហការជាមួយប៉ូលិសព្រហ្មទណ្ឌក្រុងតាខ្មៅចាប់ខ្លួនកាលពីវេលាម៉ោង៤និង៣០នាទីរសៀលថ្ងៃទី១៨ ឧសភា ខណៈជនទាំងពីរនាក់កំពុងប្រើប្រាស់ថ្នាំញៀនប្រភេទម៉ាទឹកកកនៅក្នុងផ្ទះ ស្ថិតនៅភូមិព្រែកសំរោង សង្កាត់តាខ្មៅ ក្រុងតាខ្មៅ
ខេត្តកណ្តាល ៖ ជនសង្ស័យប្រើប្រាស់ថ្នាំញៀន២នាក់ បានត្រូវប៉ូលិសប៉ុស្តិ៍តាខ្មៅសហការជាមួយប៉ូលិសព្រហ្មទណ្ឌក្រុងតាខ្មៅចាប់ខ្លួនកាលពីវេលាម៉ោង៤និង៣០នាទីរសៀលថ្ងៃទី១៨ ឧសភា ខណៈជនទាំងពីរនាក់កំពុងប្រើប្រាស់ថ្នាំញៀនប្រភេទម៉ាទឹកកកនៅក្នុងផ្ទះ ស្ថិតនៅភូមិព្រែកសំរោង សង្កាត់តាខ្មៅ ក្រុងតាខ្មៅ ។
លោកអនុសេនីយ៍ឯកមិន ប៊ុនឈាន អធិការរងនគរបាលក្រុងតាខ្មៅ ទទួលផ្នែកយុត្តិធម៌បានឱ្យដឹងថា ជនសង្ស័យ២នាក់ដែលឃាត់ខ្លួននេះ ម្នាក់ឈ្មោះយ៉េត មុនី ភេទប្រុស អាយុ២០ឆ្នាំ និងម្នាក់ទៀតឈ្មោះម៉ៅ សៅថា ភេទប្រុស អាយុ២៦ឆ្នាំ អ្នកទាំង២រស់នៅភូមិព្រែកសំរោង សង្កាត់តាខ្មៅ ក្រុងតាខ្មៅ ។ លោកអធិការរងបានឱ្យដឹងទៀតថា ដោយអនុវត្តតាមការណែនាំចង្អុលបង្ហាញរបស់លោកវរសេនីយ៍ឯកលន់ សុផាត ស្នងការរងទទួលបន្ទុកប្រឆាំងបទល្មើសគ្រឿងញៀន ឱ្យកម្លាំងប៉ូលិសត្រូវតែធ្វើការបង្ក្រាបការជួញដូរ ចែកចាយ និងប្រើប្រាស់គ្រឿងញៀន ដើម្បីឱ្យភូមិ-ឃុំមានសុវត្ថិភាព កម្លាំងប៉ូលិសបានធ្វើការស្រាវជ្រាវ រហូតដល់កំណត់មុខសញ្ញាជនសង្ស័យប្រើប្រាស់ថ្នាំញៀន ហើយឈានដល់ការឃាត់ខ្លួនបានជនទាំង២នាក់ ខណៈកំពុងប្រើប្រាស់ថ្នាំញៀន ជាក់ស្តែងនៅក្នុងផ្ទះ ។
ក្រោយពីឃាត់ខ្លួន ប៉ូលិសដកហូតបានវត្ថុតាង ជាសម្ភារប្រើប្រាស់ និងថ្នាំញៀនមួយចំនួន។ ជនសង្ស័យបានសារភាពថា ខ្លួនពិតជានាំគ្នាប្រើប្រាស់ថ្នាំញៀនប្រភេទម៉ាទឹកកកមែន ហើយថ្នាំញៀននេះគេបានទៅទិញពីភ្នំពេញមក ។ ជនទាំងពីរនាក់ត្រូវបានប៉ូលិសក្រុងតាខ្មៅ កសាងសំណុំរឿងបញ្ជូនទៅកាន់ស្នងការដ្ឋានខេត្ត ដើម្បីចាត់ការបន្តតាមច្បាប់ ៕
ចែករំលែកព័តមាននេះ