រាជធានីភ្នំពេញ ៖ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ការដោះស្រាយវិវាទក្រៅប្រព័ន្ធតុលាការ នឹងរួមចំណែកកាត់បន្ថយការកកស្ទះសំណុំរឿងនៅតាមតុលាការ និងបានស្នើឲ្យអាជ្ញាធរទាំងអស់…
រាជធានីភ្នំពេញ ៖ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ការដោះស្រាយវិវាទក្រៅប្រព័ន្ធតុលាការ នឹងរួមចំណែកកាត់បន្ថយការកកស្ទះសំណុំរឿងនៅតាមតុលាការ និងបានស្នើឲ្យអាជ្ញាធរទាំងអស់ ធ្វើការសហការទាំងអស់គ្នា ដើម្បីឈ្នះទាំងអស់គ្នា ។
ក្នុងឱកាសអញ្ជើញសម្ពោធដាក់ឲ្យប្រើប្រាស់អគាររដ្ឋបាលថ្មី និងសមិទ្ធផលនានា នៅខេត្តកំពង់ស្ពឺ ព្រមទាំងប្រកាសខេត្តកំពង់ស្ពឺ ជាខេត្តអស់មីន នៅព្រឹកថ្ងៃទី៣០ ខែតុលា ឆ្នាំ២០២៣នេះ សម្ដេចបតី ហ៊ុន ម៉ាណែត បានលើកឡើងថា ចំណុចពិសេស ពេលដោះស្រាយវិវាទក្រៅប្រព័ន្ធតុលាការរួច ត្រូវចាត់ទុកថា ដោះស្រាយរួចរាល់ ដោយមិនចាំបាច់ប្ដឹងទៅតុលាករ ព្រោះកំណត់ហេតុ ព្រមព្រៀងបញ្ចប់វិវាទ មានអានុភាពអនុវត្តដូចសាលក្រមស្ថាពររបស់តុលាការ ។
សម្តេចធិបតី បានលើកឡើងថា មានវិធានការសំខាន់ ៣ ដែលរាជរដ្ឋាភិបាល ដាក់ចេញ ដើម្បីពង្រឹងប្រព័ន្ធយុត្តិធម៌ ក្នុងនោះ ៖
ទី១. ការបង្កើតយន្តការដោះស្រា យវិវាទក្រៅប្រព័ន្ធតុលាការ បន្ថែមលើយន្តការដែលមានស្រាប់។
ទី២. ការជំរុញ និងពន្លឿន ការដោះស្រាយរឿងក្ដី នៅតាមតុលាការ ឲ្យបានឆាប់រហ័ស សំដៅលើកកម្ពស់គុណភាព ប្រសិទ្ធភាព នៃការផ្ដល់សេវាយុត្តិធម៌ជូនពលរដ្ឋ ។
និងទី៣. ការត្រួតពិនិត្យ និងដោះស្រាយភាពមិនប្រក្រតីមួយចំនួន នៅតាមតុលាការ ។
ជាមួយគ្នានោះដែរ សម្តេចធិបតី លើកឡើងថា ការដោះស្រាយរបស់អាជ្ញាធរជាតិ ដោះស្រាយវិវាទ ក្រៅប្រព័ន្ធតុលាការ គឺដោះស្រាយវិវាទ រដ្ឋប្បវេណី និងពាណិជ្ជកម្ម ក៏ដូចជាវិវាទដទៃទៀត តាមរយៈការផ្សះផ្សារ ដោយផ្អែកទៅលើកិច្ចព្រមព្រៀងរវាងភាគីពាក់ព័ន្ធ និងតាមការស្នើសុំរបស់ភាគីវិវាទ ដែលព្រមទទួលយកយន្តការ សម្របបសម្រួលផ្សះផ្សារ ។
សម្ដេចបញ្ជាក់ថា អាជ្ញាធរជាតិ ដោះស្រាយវិវាទក្រៅប្រព័ន្ធតុលាការ មិនទៅជំនួសតុលាការ និងប្រព័ន្ធយុត្តិធម៌ ដែលមានស្រាប់នោះទេ ។ សម្ដេចបន្តថា យន្តការនេះ មិនមែនជាការចាប់បង្ខំប្រជាពលរដ្ឋ ឱ្យប្រើប្រាស់សេវាថ្មីនេះនោះដែរ ។
សម្ដេចធិបតីនាយករដ្ឋមន្ត្រី សង្កត់ធ្ងន់ថា ៖ «អ្វីដែលជាលក្ខណៈពិសេសរបស់យន្តការនេះ (ដោះស្រាយវិវាទក្រៅប្តព័ន្ធតុលាការ) គឺរួមចំណែកកាត់បន្ថយការកកស្ទះសំណុំរឿងនៅតាមតុលាការ ព្រោះទំនាស់ ដែលដោះស្រាយរួចហើយ នៅក្នុងក្របខ័ណ្ឌអាជ្ញាធរថ្មីនេះ ត្រូវចាត់ទុកថា ដោះស្រាយរួចរាល់ជាស្ថាពរ ដោយមិនបាច់ប្ដឹងទៅតុលាការ ព្រោះកំណត់ហេតុព្រមព្រៀងបញ្ចប់វិវាទ ដោយអាជ្ញាធរនេះ មានអានុភាពអនុវត្តដូចទៅនឹងសាលក្រមស្ថាពររបស់តុលាការ នេះគឺលក្ខណៈពិសេសរបស់វា» ។
ជាមួយគ្នានោះដែរ សម្តេចធិបតីនាយករដ្ឋមន្ត្រី ក៏បានជំរុញឱ្យផ្សព្វផ្សាយឱ្យបានទូលំទូលាយ នូវការដោះស្រាយវិវាទក្រៅប្រព័ន្ធតុលាការ ដើម្បីឱ្យពលរដ្ឋបានយល់ និងទទួលយកយន្តការនេះ ដែលជាការរួមចំណែកធ្វើឱ្យមានយុត្តិធម៌ នៅក្នុងសង្គមកម្ពុជា ។
សម្តេចធិបតី ក៏បានស្នើឲ្យអាជ្ញាធរក្រុង-ស្រុក-ខណ្ឌ ត្រៀមគាំទ្រឲ្យបានពេញលេញ និងសហការឲ្យបានល្អ ដើម្បីជាកម្លាំងដល់អាជ្ញាធរជាតិដោះស្រាយ វិវាទក្រៅប្រព័ន្ធតុលាការ ដើម្បីបម្រើសេវាដល់ពលរដ្ឋ ។
ក្នុងឱកាសនោះ សម្តេចធិបតី បានគូសបញ្ជាក់យ៉ាងដូច្នេះថា ៖ «យើងនឹងបន្តវប្បធម៌នយោបាយឈ្នះ-ឈ្នះ តាមរយៈការដោះស្រាយវិវាទក្រៅប្រព័ន្ធតុលាការ ដើម្បីឈ្នះ-ឈ្នះទាំងអស់គ្នា ដែលទាំងអស់នេះជាការរួមចំណែកមួយ ក្នុងពង្រឹងប្រព័ន្ធយុត្តិធម៌របស់យើង» ៕
ចែករំលែកព័តមាននេះ