ខេត្តកំពង់ស្ពឺ ៖ សម្តេចធិបតី បានគូសបញ្ជាក់ថា ពិតមែនហានិភ័យ នៃសង្គ្រាម និងហានិភ័យ នៃគ្រាប់មីន យើងលែងព្រួយបារម្ភទៀតហើយ ប៉ុន្តែហានិភ័យ…
ខេត្តកំពង់ស្ពឺ ៖ សម្តេចធិបតី បានគូសបញ្ជាក់ថា ពិតមែនហានិភ័យ នៃសង្គ្រាម និងហានិភ័យ នៃគ្រាប់មីន យើងលែងព្រួយបារម្ភទៀតហើយ ប៉ុន្តែហានិភ័យ ដែលជាការព្រួយបារម្ភរបស់ប្រជាពលរដ្ឋខ្មែរ គឺសុខសុវត្ថិភាពសង្គម ទើបសំខាន់ ក្នុងនោះមានគ្រឿងញៀន បញ្ហាបងធំបងតូច បញ្ហាល្បែង ស៊ីសង ល្បែងអនឡាញផ្សេងៗ ជាកង្វល់ធំបំផុត ។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការ “អគាររដ្ឋបាលថ្មី និងសមិទ្ធផលនានា ក្នុងខេត្តកំពង់ស្ពឺ ព្រមទាំងប្រកាសខេត្តកំពង់ស្ពឺ ជាខេត្តអស់មីន” នាព្រឹកថ្ងៃទី៣០ ខែតុលា ឆ្នាំ២០២៣ សម្តេចធិបតី បានចាត់ទុកបញ្ហាខាងលើនេះ គ្រឿងញៀន បញ្ហាបងធំបងតូច បញ្ហាល្បែង ស៊ីសង ល្បែងអនឡាញផ្សេងៗ ជាវិធានគន្លឹះសំខាន់ ដែលត្រូវដោះស្រាយ និងលុបបំបាត់ឲ្យអស់ នៅក្នុងយុទ្ធសាស្ត្របញ្ចកោណ មានគ្របសណ្តប់លើយុទ្ធសាស្ត្រចតុកោណ ក្នុងនោះគោលនយោបាយធំ ដែលមានស្រាប គឺត្រូវតែបន្តធ្វើទៀត ។
សម្តេចបានគូសបញ្ជាក់ថា ៖ «វិធានគន្លឹះចង់សំដៅថា យើងត្រូវគិតឲ្យបានធំ គ្រប់ជ្រុងជ្រោយ តែធ្វើតូច បានន័យថា ផ្តោតទៅលើកម្មវិធីសកម្មភាពណាដែលសំខាន់ជាគ្រឹះ នៃសកម្មភាព នៃនយោបាយធំនោះ ពីមួយអាណត្តិ ទៅមួយអាណត្តិ ដើម្បីសម្រូចឲ្យចំតែម្តង» ។
សម្តេចនាយករដ្ឋមន្ត្រី បន្ថែមថា ក្នុងវិស័យអាទិភាព រាជរដ្ឋាភិបាល ត្រូវតែធ្វើផ្តោតសំខាន់ឲ្យខ្លាំង ពង្រឹងឲ្យរឹងមាំ និងដាក់ថវិការពង្រឹងឲ្យរឹងមាំ នោះផ្សេងទៀត នឹងរឹងមាំ ។
ជាមួយគ្នានោះដែរ សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «រដ្ឋបាលរាជធានី ខេត្ត ត្រូវពង្រឹងភាពស្អាតស្អំរបស់ខ្លួន ជាពិសេសត្រូវចៀសវាង ការប្រើប្រាស់អំណាចខុសច្បាប់ វាធ្វើឲ្យប៉ះពាល់ដល់ផលប្រយោជន៍របស់បងប្អូនប្រជាពលរដ្ឋ។ រាជរដ្ឋាភិបាល នឹងចាត់វិធានការតឹងរ៉ឹងបំផុត ប្រសិនបើករណីនេះ កើតមាន» ។
សម្តេចធិបតី បានថ្លែងទៀតថា ការបញ្ជាក់សារជាថ្មី រាជរដ្ឋាភិបាល នឹងខិតខំធ្វើយ៉ាងណាជួយដល់រដ្ឋបាលរាជធានី ខេត្ត ស្រុក ឃុំ សង្កាត់ ដើម្បីមានភាពលទ្ធភាព នៅក្នុងការបំពេញភារកិច្ចរបស់ខ្លួនឲ្យកាន់តែល្អប្រសើរ ៕
ចែករំលែកព័តមាននេះ