រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់ឲ្យដឹងថា ប្រទេសកម្ពុជាបានទទួលរងសំណើមពីសមុទ្រចិនខាងត្បូងបង្កើតបានជាពពកភ្លៀងធ្លាក់គ្របដណ្តប់លើកផ្ទៃដីពី៤០% ដល់៦០% ។
យោងតាមសេចក្តីជូនដំណឹងស្តីពីស្ថានភាពធាតុអាកាសនៅព្រះរាជាណាចក្រកម្ពុជា សម្រាប់ថ្ងៃទី៣០ ខែតុលា ឆ្នាំ២០២៣ បានឲ្យដឹងថា ព្រះរាជាណាចក្រកម្ពុជាទទួលរងឥទ្ធិពលពីប្រព័ន្ធសម្ពាធខ្ពស់នៃប្រទេសចិនដែលគ្របដណ្តប់ផ្នែកខាងជើង ប្រទេសថៃ និងលាតសន្ធឹងទៅដល់សមុទ្រចិនខាងត្បូង ។
ក្រសួងធនធានទឹកបានបញ្ជាក់ថា ៖ «ខណៈនោះ នឹងមានលំហូរខ្យល់បក់មកពីទិសខាងជើង និងទិសឦសានប្រសព្វគ្នាជាមួយលំហូរខ្យល់បក់ពីទិសអាគ្នេយ៍ដែលផ្ទុកនូវសំណើមនៃសមុទ្រចិនខាងត្បូង បង្កើតបានជាពពកភ្លៀងលើប្រទេសកម្ពុជា» ។ ក្រសួងបានលើកឡើងថា ស្ថានភាពធាតុអាកាសបែបនេះ នៅតែបន្តមានរហូតដល់ថ្ងៃទី០៣ ខែវិច្ឆិកា ឆ្នាំ២០២៣។
ជាមួយគ្នានោះដែរ ក្រសួងធនធានទឹកបានលើកឡើងថា ស្ថានភាពបែបនេះនឹងធ្វើឱ្យនៅថ្ងៃទី៣០ ខែតុលា ខេត្តមួយចំនួននៅក្នុងតំបន់មាត់សមុទ្រ និងតំបន់ខ្ពង់រាបនឹងមានភ្លៀងធ្លាក់ក្នុងកម្រិតពីតិច ទៅបង្គួរ លាយឡំជាមួយផ្គររន្ទះ និងខ្យល់កន្ត្រាក់ គ្របដណ្ដប់លើផ្ទៃដីពី៣០% ទៅ ៥០%។ ចំពោះរាជធានីភ្នំពេញ និងខេត្តមួយចំនួននៅក្នុងតំបន់ទំនាបកណ្តាលនឹងមានភ្លៀងធ្លាក់ពីកម្រិតមធ្យមទៅបង្គួរលាយឡំជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដីពី៤០% ទៅ ៦០% ។
ក្រសួងធនធានទឹក ក៏បានឲ្យដឹងថាចាប់ពីថ្ងៃទី៣១ ខែតុលា ដល់ថ្ងៃទី០៣ ខែវិច្ឆិកា ភ្លៀងនឹងបន្តធ្លាក់លើខេត្តមួយចំនួនក្នុងតំបន់មាត់សមុទ្រ និងតំបន់ខ្ពង់រាប ក្នុងកម្រិតពីតិចទៅបង្គួរលាយឡំជាមួយផ្គររន្ទះ និងខ្យល់កន្ត្រាក់ គ្របដណ្តប់ លើផ្ទៃដីពី៣០% ទៅ៥០%។
ចំណែកឯរាជធានីភ្នំពេញ និងបណ្តាខេត្តមួយចំនួននៅក្នុងតំបន់ទំនាបកណ្តាលនឹងមាន ភ្លៀងធ្លាក់ពីកម្រិតមធ្យមទៅបង្គួរ លាយឡំជាមួយផ្គររន្ទះ និងខ្យល់កន្ត្រាក់ គ្របដណ្តប់លើផ្ទៃដីពី ៤០% ទៅ៦០%៕
ចែករំលែកព័តមាននេះ