រាជធានីភ្នំពេញ ៖ ក្នុង​បរិយាកាស​អធិក​អធម​ពិធី​រំលឹក​ខួប​លើក​ទី៥០​ ថ្ងៃកំណើត ​Peace Corps ​ដែល​រៀប​ចំធ្វើ​នៅ​ក្នុង​ស្ថានទូត ​អាមេរិក​កាល​ពី​ថ្ងៃ​ទី១៨ ខែ​ឧសភា​​ កន្លង​​​មក​នេះ ​លោក​​ស្រី​ឯកអគ្គ​រដ្ឋទូត​អាមេរិក​ប្រចាំ​កម្ពុជា​ Rodley ​មាន​ប្រសាសន៍​ដោយ​ក្តី​សង្ឃឹម​ថា ​ទំនាក់​ទំនង​​រវាង​​ប្រទេស​ទាំងពីរ​កម្ពុជា​-​អាមេរិក​​កាន់​តែ​ជិតស្និទ្ធ និង​រឹង​មាំ​​ថែម​ទៀត តាមរយៈ​សកម្មភាពភ្នាក់​ងារ Peace Corps នៅកម្ពុជា ។

ថ្លែងទៅកាន់ពិធីជប់លៀងអបអរសាទរខួប លើកទី៥០ របស់ភ្នាក់ងារ Peace Corps នាឱកាសនោះ​ លោក​ស្រី Rodley បាន​លើក​ឡើងថា រយៈពេល៥០ឆ្នាំរួចមកហើយ​ដែលអ្នក​ស្ម័គ្រចិត្តរបស់ទីភ្នាក់ងារ Peace Corps បានធ្វើ​ជាឯក​អគ្គ​រដ្ឋទូតក្នុងពិភពលោក ។ ពួកគេច្រើន​តែ​ជា​ជនជាតិអាមេរិកដំបូងក្នុងសហគមន៍ម្ចាស់​ផ្ទះ​របស់គេ ហើយ​ក៏ជាជនជាតិអាមេរិកដំបូង​ដែល​មនុស្សជាច្រើនក្នុងសហគមន៍ទាំងនោះបាន​ជួប។ ពួកគេបង្ហាញឱ្យឃើញនូវទឹកចិត្តសប្បុរស​គំនិតច្នៃប្រឌិត និងជំនាញក្នុងលក្ខណៈ​ដែលធ្វើ​ឱ្យមានការផ្លាស់ប្តូរក្នុងជីវិត ហើយធ្វើឱ្យ​មាន​ការ​យល់ដឹងបានជ្រាលជ្រៅនៃវប្បធម៌រវាងគ្នា។ សម្រាប់ប្រទេសកម្ពុជា អ្នកស្ម័គ្រចិត្តរបស់ទីភ្នាក់​ងារ Peace Corps បានធ្វើការ​ជិតស្និទ្ធជាមួយ សហគមន៍ដែលពួកគេស្នាក់នៅជាមួយ ដើម្បីធ្វើ អ្វីមួយដែលទាំងអស់គ្នាយល់ស្របគ្នាថាត្រូវធ្វើ។

លោកស្រី Rodley មានប្រសាសន៍ថា លោក​​ស្រី​​គ្មាន​ការសង្ស័យទេថា កម្មវិធី Peace Corps នៅកម្ពុជា ពិតជាបំពេញគោលដៅ​យ៉ាង​ខ្លាំងក្លា ក្នុងពេលដែល​ប្រជាជន​មូលដ្ឋាន​កំពុង​តែ​ទទួលប្រយោជន៍ពីការងារសុខភាពតាម​សហ​គមន៍មូលដ្ឋាន ។ លោកស្រីបាន​ថ្លែងអំណរ​គុណ​ដល់​រាជរដ្ឋាភិបាលកម្ពុជា ប្រជាជនកម្ពុជាដែល​បានអញ្ជើញ​ភ្នាក់ងារ Peace Corps ឱ្យបំពេញ​ការ​ងារ​និងរៀនសូត្រនៅក្នុងប្រទេសកម្ពុជា ហើយ​កិច្ចសហប្រតិបត្តិការរវាង Peace Corps និងកម្ពុជា នៅតែមានលក្ខណៈល្អប្រសើរប្រពៃ ដដែល។ កម្ពុជាបានផ្តល់ឱ្យយើងនូវ​ក្តីសង្ឃឹម ។ លោកស្រីបញ្ជាក់ថា លោកស្រីបានជួបជា​មួយ​នាយករដ្ឋមន្រ្តីកម្ពុជា ហើយបង្ហាញនូវក្តី​សង្ឃឹម​ថា ចំណងទាក់ទង​រវាង​ប្រទេស​​ទាំងពីរ​កាន់តែ​ជិតស្និទ្ធនិងរឹងមាំថែមទៀត ។ ពេលនោះ​លោក​នាយករដ្ឋមន្រ្តីបានមាន​ប្រសាសន៍​ដោយញញឹម​ថា លោកស្រីមិនបាច់បារម្ភទេ ព្រោះភ្នាក់ងារ Peace Corps កំពុងតែជួយលោកស្រីក្នុង​កិច្ចការនេះ ។

លោកជំទាវ ភឿន សកុណា រដ្ឋលេខាធិការ ក្រសួងអប់រំយុវជននិងកីឡា មានប្រសាសន៍ នាឱកាសនោះ ដោយថ្លែងអំណរគុណចំពោះ ភ្នាក់ងារ ​Peace Corps ដែលបានធ្វើសកម្ម​ភាពជា​ប្រយោជន៍ដល់ប្រជាជនកម្ពុជានិង​ប្រទេស​កម្ពុជា។ វត្តមានភ្នាក់ងារ Peace Corps នៅកម្ពុជា បានបង្ហាញនូវទំនាក់ទំនងវប្បធម៌ ប្រពៃណី ការបណ្តុះបណ្តាល ការអប់រំ និងអ្វី ទៀតដែលជាគោលដៅនិងប្រយោជន៍របស់ យើងទាំងអស់គ្នា ។ លោកជំទាវជឿជាក់ថា តាម​រយៈ Peace Corps យុវជនកម្ពុជាបាន​ទទួលនូវចំណេះដឹងជាច្រើន សំខាន់ផ្នែកភាសា​អង់គ្លេស និងផ្នែកសុខភាព ។

លោកជំទាវមានប្រសាសន៍ថា ក្នុងគោល​នយោបាយកាត់បន្ថយភាពក្រីក្ររបស់រាជរដ្ឋា​ភិបាលកម្ពុជា សំខាន់គឺការយកចិត្តទុកដាក់​លើ​វិស័យបណ្តុះបណ្តាលធនធានមនុស្ស ។ ដូច្នេះ​សកម្មភាពទាំងឡាយរបស់ Peace Corps គឺ​បានចូលរួមចំណែកផងដែរដល់ការអនុវត្ត​គោល​នយោបាយកាត់បន្ថយភាពក្រីក្ររបស់រាជរដ្ឋា​ភិបាល​កម្ពុជា ។ យើងចង់ឱ្យវត្តមានភ្នាក់​ងារ Peace Corpsមានជាបន្តទៀតលើទឹកដីកម្ពុជា ៕