ពុទ្ធបរិស័ទ្ធច្រើនកុះករ ខណៈមានព្រះវត្តមានព្រះធម្ម វន វាសី ចន្ទ មុនី លើទឹកដីអង្គរ
- សៀមរាប
ខេត្តសៀមរាប ៖ កាលពីថ្ងៃទី ២៩ ខែ តុលា ឆ្នាំ២០២៣ នៅបរិវេណអភិរក្សដ្ឋានអង្គរ ខេត្តសៀមរាប
ខេត្តសៀមរាប ៖ កាលពីថ្ងៃទី ២៩ ខែ តុលា ឆ្នាំ២០២៣ នៅបរិវេណអភិរក្សដ្ឋានអង្គរ ខេត្តសៀមរាប មានប្រារព្ធពិធីប្រកាសសច្ចវាចាបួងសួង សុំសេចក្តីសុខ សេចក្តីចម្រើន ដែលរៀបចំធ្វើឡើងដោយលោកជំទាវ ហ៊ុន សេងនី និងលោក ឧត្តមសេនីយ៍ឯក គង់ ប៊ុនលី មេបញ្ជាការរងកងអង្គរក្ស តំណាងលោកនាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរង កងយោធពលខេមរភូមិន្ទ នាយករងខុទ្ទកាល័យ សម្តេចតេជោនាយករដ្ឋមន្ត្រី និងជាមេបញ្ជាការបញ្ជាការដ្ឋានអង្គរក្ស និងលោក សម សោមសក្តិ នាយករងរដ្ឋបាលសាលាខេត្ត ក្រោមវត្តមាននិមន្តចូលរួមរបស់ ព្រះធម្មវនវាសី ចន្ទ មុនី ដើម្បីផ្តល់នូវពុទ្ធឱវាទ តាមគន្លងព្រះសម្មាសាម្ពុទ្ធ ។ ក្នុងនោះដែរក៏មានវត្តមានអញ្ជើញចូលរួមពី លោក លោកស្រី អភិបាលរងខេត្ត ថ្នាក់ ដឹកនាំមន្ទីរអង្គភាពជុំវិញខេត្ត និងមន្ត្រីអ្នកមុខអ្នកការ និង បងប្អូនប្រជាពុទ្ធបរិស័ទ្ធជាច្រើនកុះករផងដែរ ។
ក្នុងពិធីប្រកាសសច្ចវាចាបួងសួង សុំសេចក្តីសុខ សេចក្តីចម្រើន ការនិមន្តមកដល់អភិរក្សដ្ឋានអង្គរ ព្រះធម្មវនវាសី ចន្ទ មុនី បាននិមន្តធ្វើការបូជាទៀនធូប ផ្កាភ្ញី ថ្វាយដល់ព្រះរូបលោកតាដំបងដែក និងព្រះរូបលោកមេទ័ពខ្លាំងពូកែនាសម័យអង្គរ ព្រមទាំងបាននិមន្តចូលធ្វើការថ្វាយបង្គំ ព្រះបរមរូបបដិមាករ ពីបុរាណកាលមក ដែលបានយកមកតម្កល់ថែរក្សាទុកនៅក្នុងអភិរក្សដ្ឋានអង្គរ ដែលជាមរតកដូនតាខ្មែរយើងដែលមិនអាចកាត់ថ្លៃបានបន្សល់ ទុកសម្រាបកូនចៅយើងគ្រប់ជំនាន់ ។
ក្នុងពិធីបួងសួងនៅមុខព្រះអង្គរគោកធ្លកនោះដែរ ព្រះធម្មវនវាសី ចន្ទ មុនី បានផ្តល់នូវពុទ្ធឱវាទល្អៗ ដល់ថ្នាក់ដឹកនាំមន្ត្រីរាជការ កងកម្លាំង និងប្រជាពុទ្ធបរិស័ទឲ្យប្រតិបត្តិនូវតែអំពើល្អ និង ត្រូវមានការរួមសាមគ្គីគ្នា និង ត្រូវប្រកាន់ភ្ជាប់នូវធម៌ខន្តី មេត្តា ។
ក្នុងពិធីបួងសួងស្ថិតនៅក្រោមដំណក់ទឹកភ្លៀងដ៏ត្រជាក់ ដែលបានធ្វើការប្រោះព្រហ្មមកលើប្រជាពុទ្ធ បរិស័ទ ថ្នាក់ដឹកនាំ មន្ត្រីរាជការ លោកជំទាវក៏បានបួងសួងសូមឱ្យ បារមីវត្ថុស័ក្តិ សិទ្ធិទាំងឡាយនៅលើលោក ដែលបានគង់ប្រថាប់នៅប្រាង្គប្រាសាទអង្គរវត្ត និង ប្រាសាទបុរាណនានាជាកេរ្តិ៍ដំណែលស្ថាបត្យកម្មដូនតាខ្មែរ មានលោកតារាជ្យ លោកតាពេជ្រ លោកយាយទេព្យ ព្រះអង្គចេកព្រះអង្គចម បារមីព្រះអង្គធំខ្នងភ្នំគូលែន និង ព្រះបារមីព្រះអង្គគោគធ្លក ព្រមទាំងទាំងបារមីដែលបានគង់ប្រថាប់នៅក្នុងអភិរក្សដ្ឋានអង្គរនេះ តាមជួយថែ រក្សា និង ប្រសិទ្ធិពរជ័យជូនដល់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និង សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ ព្រមទាំងថ្នាក់ដឹកនាំ គ្រប់ជាន់ថ្នាក់ ព្រមទាំងប្រជាពលរដ្ឋ នៅទូទាំងប្រទេសកម្ពុជា សូមឱ្យជួបសេចក្តីសុខ សន្តិភាព និងសេចក្តីចម្រើនគ្រប់ៗគ្នា ។
ពិធីប្រកាសសច្ចវាចាបួងសួង សុំសេចក្តីសុខ សេចក្តីចម្រើន គឺ ស្ថិតក្នុងជំនឿតាមបែបព្រលឹងដែល ប្រជាជនខ្មែរយើង មានជំនឿជឿថា នៅលើលោកនេះ អ្នកខ្លាំងពូកែ ដែលបានចែកឋានទៅ ពិតជាព្រលឹងរបស់ខ្លួននៅតាមថែរក្សាកូនចៅជំនាន់ក្រោយៗ នឹងមើលការខុសត្រូវដោយឬទ្ធានុភាពជួយគាំទ្រកូនចៅដែលប្រព្រឹត្តិអំពើល្អ និង មានមនសិការស្នហាជាតិ ស្រឡាញ់ការពារទឹកដីមាតុភូមិ កេរ្តិ៍ដំណែលដូនតាដោយពិតប្រាកដ ។
ក្នុងសកម្មភាពនោះដែរ យើងក៏បានសង្កេតឃើញបងប្អូនប្រជាពុទ្ធបរិស័យ ដែលបានធ្វើការរង់ចាំនៅអមតាមដងផ្លូវ ដើម្បី សុំនូវពរជ័យពី ព្រះធម្មវនវាសី ចន្ទ មុនី ដើម្បីសុំនូវសេចក្តីសុខ ចម្រើននៅក្នុងសង្គមគ្រួសាររៀងៗខ្លួនផងដែរ ។ បន្ទាប់មក ពុទ្ធបរិស័ទសម្រុកចេញពីវត្តបត្តបុរី អង្គរខាងជើង មកវិញ នៅវេលាម៉ោងប្រមាណ៤រសៀល បណ្ដាលឱ្យមនុស្សកកកុញឆ្លងកាត់ស្ពានបណ្ដែតទឹក ។ អ្នកខ្លះត្រឡប់មកវិញ ដោយពោលថា បានជួបព្រះភក្ត្រព្រះអង្គធម្មវនវាសី ចន្ទ មុនី រួមជាមួយទឹកមន្ត។ ឯខ្លះក៏មិនបានជួប។
ខណៈពេលនោះ នៅវេលាម៉ោងប្រមាណជា៥ រសៀលថ្ងៃដដែល ព្រះអង្គធម្មវន វាសី ចន្ទ មុនី ក៏បាន និមន្ត សម្តែងព្រះធម៌ទេសនា នៅវត្តឥន្ទបត្តបុរី ហៅវត្តអង្គរខាងជើងចប់ រួចក៏និមន្តមកថ្វាយ បង្គំលោកតារាជ ហើយក៏និមន្តឡើងរថយន្តត្រឡប់ចូលមកក្នុងក្រុងសៀមរាប ដើម្បីសឹងនៅក្នុង ក្រុងតែម្តង ។
សូមបញ្ជាក់ផងដែរថា នៅថ្ងៃទី៣០ ខែ តុលា ឆ្នាំ២០២៣នេះ វត្តឥន្ទបត្តបុរី ហៅ វត្តអង្គរខាងជើង ក៏បានរៀបចំពិធីបុណ្យកឋិនទានសាមគ្គី ហើយបុណ្យកឋិននេះ ក៏មានការនិមន្តសម្ដែងព្រះធម៌ទេសនាពីព្រះអង្គធម្មវនវាសី ចន្ទ មុនី ផងដែរ ៕
ចែករំលែកព័តមាននេះ