រាជធានីភ្នំពេញ ៖ សាលាដំបូងរាជធានី កាលពីល្ងាចថ្ងៃទី១៨ ឧសភា បានសម្រេចឃុំខ្លួនយុវជនម្នាក់ដាក់ពន្ធនាគារជាបណ្តោះអាសន្ន ក្រោមបទចោទប្រកាន់លួចមានស្ថានទម្ងន់ទោស ដើម្បីរង់ចាំការស៊ើបអង្កេតបន្ត ។ យុវជនរូបនេះឈ្មោះសូ ចាន់មករា អាយុ១៦ឆ្នាំ ជាសិស្ស ស្នាក់នៅផ្ទះលេខ២៩០Eo ផ្លូវលេខ២១៧ សង្កាត់អូរឫស្សីទី២
រាជធានីភ្នំពេញ ៖ សាលាដំបូងរាជធានី កាលពីល្ងាចថ្ងៃទី១៨ ឧសភា បានសម្រេចឃុំខ្លួនយុវជនម្នាក់ដាក់ពន្ធនាគារជាបណ្តោះអាសន្ន ក្រោមបទចោទប្រកាន់លួចមានស្ថានទម្ងន់ទោស ដើម្បីរង់ចាំការស៊ើបអង្កេតបន្ត ។ យុវជនរូបនេះឈ្មោះសូ ចាន់មករា អាយុ១៦ឆ្នាំ ជាសិស្ស ស្នាក់នៅផ្ទះលេខ២៩០Eo ផ្លូវលេខ២១៧ សង្កាត់អូរឫស្សីទី២ ខណ្ឌ៧មករា ។
យោងតាមប្រភពព័ត៌មានបានឱ្យដឹងថា កាលពីថ្ងៃទី១៥ ឧសភា យុវជនឈ្មោះសូចាន់ មករា រួមជាមួយគូកន២នាក់ទៀត ម្នាក់ឈ្មោះអៀង និងម្នាក់ទៀតឈ្មោះណូ បានជិះម៉ូតូ១គ្រឿងចេញធ្វើសកម្មភាពឆក់ខ្សែ.កពីនារីម្នាក់នៅម្តុំវត្តប្រយូវង្ស តាមបណ្តោយមហាវិថីព្រះនរោត្តម ស្ថិតក្នុងសង្កាត់ទន្លេបាសាក់ ខណ្ឌចំការមន ។ សកម្មភាពនោះឈ្មោះអៀង ជាអ្នកបើកម៉ូតូ ឈ្មោះណូ ជាអ្នកឆក់ខ្សែ.កប្លាទីនទម្ងន់៣ជី ពីនារីម្នាក់ ឯឈ្មោះសូ ចាន់មករា ជិះពីក្រោយ។ ទាំងអស់នេះជាចម្លើយសារភាពរបស់ឈ្មោះសូ ចាន់មករា ប្រាប់នគរបាលនៅពេលចាប់ខ្លួន ។
ប្រភពដដែលបានឱ្យដឹងបន្តថា បន្ទាប់ពីពួកគេឆក់ខ្សែ.កនោះមិនបានសម្រេច និងត្រូវម្ចាស់ខ្សែ.កស្រែកចោរៗ ស្រាប់តែមាននគរបាលការិយាល័យស៊ើបការណ៍នៃនាយកដ្ឋានព្រហ្មទណ្ឌក្រសួងមហាផ្ទៃអន្តរាគមន៍ដេញតាមពីក្រោយ ធ្វើឱ្យពួកគេភ័យស្លន់ស្លោក៏ជិះទៅបុកម៉ូតូអ្នកដំណើរបណ្តាលឱ្យដួលប្រកាច់ប្រកិន ។ ពេលនោះឈ្មោះសូ ចាន់មករា ត្រូវបានចាប់ខ្លួន ចំណែកបក្សពួក២នាក់ទៀតបានរត់គេចខ្លួនបាត់ស្រមោលចោលម៉ូតូ ។ យុវជនជាប់សង្ស័យឆក់ខ្សែ.កបានប្រាប់សមត្ថកិច្ចថា គូកន២នាក់ដែលរត់គេចខ្លួននោះធ្លាប់ធ្វើសកម្មភាពឆក់ ដូច្នេះហើយបានជាគេរហ័សរហួនរត់គេចខ្លួនរួច ចំណែករូបគេមិនធ្លាប់សោះ។ នេះជាលើកទី១ហើយ ដែលរូបគេមិនចូលសាលាជិះម៉ូតូតាមគេឆក់ខ្សែ.កម្តង ក៏ភ្លាត់ស្នៀតត្រូវនគរបាលចាប់ខ្លួនបានតែម្តង ។
ក្រោយពីឃាត់ខ្លួនសមត្ថកិច្ចនគរបាលក្រសួងមហាផ្ទៃបានកសាងសំណុំរឿងបញ្ជូនទៅសាលាដំបូងរាជធានី ដើម្បីធ្វើការសាកសួរ។ ដោយយោងតាមចម្លើយសារភាពថា រូបគេពិតជាបានជិះម៉ូតូជាមួយគូកនធ្វើសកម្មភាពឆក់ខ្សែ.កតាមផ្លូវសាធារណៈនោះមែន តំណាងអយ្យការបានធ្វើការចោទប្រកាន់បញ្ជូនទៅចៅក្រមសម្រេចឃុំខ្លួនដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ