ខេត្តស្វាយរៀង ៖ មានរថយន្តយីឌុបធុនយក្សជាច្រើនគ្រឿង ដែលសង្ស័យដឹកទំនិញគេចពន្ធជាច្រើនប្រភេទ លួចឆ្លងដែនទៅប្រទេសវៀតណាម តាមច្រករបៀងនៃច្រកទ្វារព្រំដែនទួលស្ដី ស្ថិតនៅភូមិកោះប្ញស្សី ឃុំទួលស្ដី ស្រុកចន្ទ្រា ដូចហែកឋិន…
ខេត្តស្វាយរៀង ៖ មានរថយន្តយីឌុបធុនយក្សជាច្រើនគ្រឿង ដែលសង្ស័យដឹកទំនិញគេចពន្ធជាច្រើនប្រភេទ លួចឆ្លងដែនទៅប្រទេសវៀតណាម តាមច្រករបៀងនៃច្រកទ្វារព្រំដែនទួលស្ដី ស្ថិតនៅភូមិកោះប្ញស្សី ឃុំទួលស្ដី ស្រុកចន្ទ្រា ដូចហែកឋិន មហាជនដាក់ការសង្ស័យថា ទំនងសមត្ថកិច្ចពាក់ព័ន្ធទទួលបានសំណែន ទើបគ្មានការបង្ក្រាបបែបនេះ ។
មហាជនទម្លាយករណីឈ្មួញដឹកទំនិញគេចពន្ធឆ្លងដែនទៅប្រទេសវៀតណាមនេះ បានកើតឡើងនៅរសៀលថ្ងៃទី២៥ ខែតុលា ឆ្នាំ២០២៣ នៅច្រករបៀងទួលស្តី ឃុំទួលស្តីស្រុកចន្ទ្រា ។ បើតាមប្រភពពីមន្ត្រីច្រកទ្វារព្រំដែនទួលស្ដីម្នាក់សុំមិនបញ្ចេញឈ្មោះបានបង្ហើបឲ្យដឹងថា ករណីក្រុមឈ្មួញលួចដឹកទំនិញគេចពន្ធឆ្លងដែនទៅប្រទេសវៀតណាមខុសច្បាប់នេះ មានរយៈពេលជាយួរមកហើយ គឺក្រុមឈ្មួញបានដឹកទំនិញតាមរថយន្តយីឌុបដែលមានស្លាកយីហោ(Kដឹកជញ្ជួន2023) ចេញពេលថ្ងៃ និងពេលយប់ ហើយក៏មិនបានដឹងថា បង់ពន្ធជូនមន្ត្រីគយឬយ៉ាងណាទេ ? ក៏ប៉ុន្តែបើពិនិត្យនៅច្រករបៀងនេះ មិនឃើញមានមន្ត្រីគយណាម្នាក់មកពិនិត្យ ឬបង់ពន្ធដែរ ។
ប្រភពបន្តទៀតថា ទំនិញគេចពន្ធទាំងនោះ រួមមាន ៖ គ្រឿងអេឡេចត្រូនិច (ម៉ាស៊ីនត្រជាក់ ទូទឹកកក), ស្រាដប, បារី, ស្ករ.ស ។ល។ ចំណែកកម្មករលើកទំនិញម្នាក់ ក៏បានឲ្យដឹងទៀតថា យប់ខ្លះក៏មានបង្កប់ឈើប្រណីតឆ្លងដែនទៅប្រទេសវៀតណាមដែរ ។ ប្រភពបានបង្ហើបទៀតថា ពេលផ្ទេរទំនិញឆ្លងដែន គឺពួកគេឃើញមានមន្ត្រីមានសមត្ថកិច្ចជាច្រើនស្ថាប័ន បានទៅយកប្រាក់ក្បាលរថយន្តពីឈ្មួញ។ ទាក់ទិនករណីខាងលើនេះដែរ មិនអាចរកការបំភ្លឺពីស្ថាបន័ពាក់ព័ន្ធបានទេ ដោយទូរស័ព្ទចូលគឺគ្មានអ្នកទទួល ចំណែកអ្នកទទួលបានឆ្លើយថា សូមសួរទៅស្ថាប័នជំនាញទៅ ។
ប្រជាពលរដ្ឋនៅឃុំទួលស្តី បានសំណូមពរដល់អ្នកសារព័ត៌មានយើងមេត្តាជួយចុះផ្សាយព័ត៌មាន ដើម្បីស្នើសុំដល់លោកស្នងការនៃស្នងការដ្ឋាននគបាលខេត្តស្វាយរៀង និងឯកឧត្តម ប៉េង ពោធិ៍សា អភិបាលខេត្តស្វាយរៀង មេត្តាជួយចាត់មន្ត្រីជំនាញអោយចុះតាមដានក្រុមឈ្មួញដែលលួចដឹកទំនិញចេញតាមច្រករបៀងទួលស្ដី ស្រុកចន្ទ្រានេះផង ដោយសមត្ថកិច្ចចប្រចាំការនៅច្រករបៀងទួលស្តី កំពុងបើកដៃឲ្យឈ្មួញដឹកទំនិញឆ្លងដែនទៅប្រទេសវៀតណាមទាំងយប់ទាំងថ្ងៃ សង្ស័យជាទំនិញគេចពន្ធនាំអោយបាត់ចំណូលចូលរបស់រដ្ឋ ។
មានព័ត៌មានបន្ថែម កោះសន្តិភាពផ្សាយជូនបន្ត ។
ចែករំលែកព័តមាននេះ