ខេត្តបន្ទាយមានជ័យ ៖ ពលករខ្មែរប្រុសស្រីចំនួន១៧នាក់ ធ្វើចំណាកស្រុកទៅរកការងារធ្វើនៅប្រទេសថៃដោយខុសច្បាប់ត្រូវបានសមត្ថកិច្ចប៉ូលិសការិយាល័យប្រឆាំងការជួញដូរមនុស្ស និងការពារអនីតិជនធ្វើការទប់ស្កាត់នៅវេលាម៉ោង១២និង៤០នាទីរសៀល ថ្ងៃទី១៨ ឧសភា ឆ្នាំ២០១១ នៅលើផ្លូវជាតិលេខ៦ ចំណុចខាងកើតស្ពានទី១
ខេត្តបន្ទាយមានជ័យ ៖ ពលករខ្មែរប្រុសស្រីចំនួន១៧នាក់ ធ្វើចំណាកស្រុកទៅរកការងារធ្វើនៅប្រទេសថៃដោយខុសច្បាប់ត្រូវបានសមត្ថកិច្ចប៉ូលិសការិយាល័យប្រឆាំងការជួញដូរមនុស្ស និងការពារអនីតិជនធ្វើការទប់ស្កាត់នៅវេលាម៉ោង១២និង៤០នាទីរសៀល ថ្ងៃទី១៨ ឧសភា ឆ្នាំ២០១១ នៅលើផ្លូវជាតិលេខ៦ ចំណុចខាងកើតស្ពានទី១ ក្នុងភូមិសាស្ត្រក្រុងសិរីសោភ័ណ ។
តាមព័ត៌មានពីលោកវរសេនីយ៍ទោ សិទ្ធិ ឡោះ នាយការិយាល័យប្រឆាំងការជួញដូរមនុស្ស និងការពារអនីតិជនបានឱ្យដឹងថា ដោយមានការចង្អុលណែនាំជាប្រចាំពីលោកឧត្តមសេនីយ៍ត្រីស្នងការនគរបាលខេត្ត លោកបានចាត់តាំងកម្លាំងជំនាញចុះធ្វើការសើុបអង្កេតស្រាវជ្រាវ និងឈានដល់ការទប់ស្កាត់ពលករខ្មែរចំនួន១៧នាក់ ក្នុងនោះស្រី៨នាក់ មកពីឃុំល្វា ស្រុកពួក ខេត្តសៀមរាប បានធ្វើចំណាកស្រុកទៅរកការងារធ្វើនៅប្រទេសថៃ ដោយខុសច្បាប់ ។
លោកនាយការិយាល័យបានបន្តថា តាមការសាកសួរពលករទាំងនោះ បាននិយាយថា ពួកគាត់មានជីវភាពក្រីក្រចង់ទៅរកការងារធ្វើនៅប្រទេសថៃ ដូចជាកាប់អំពៅ ដាំដំឡូងជាដើម ហើយការទៅនេះ គឺពួកគាត់ទៅដោយចិត្តឯង គ្មានការអូសទាញពីមេខ្យល់ណាទេ ។
ទាក់ទិននឹងការទប់ស្កាត់ពលករទាំងនេះ លោកវរសេនីយ៍ទោ សិទ្ធិ ឡោះ បានណែនាំពួកគាត់ឱ្យយល់ពីការធ្វើចំណាកស្រុកដោយប្រថុយប្រថាន ដែលឆ្លងដែនដោយខុសច្បាប់ទៅរកការងារធ្វើនៅប្រទេសថៃថា អាចបង្កឱ្យមានគ្រោះថ្នាក់ដល់អាយុជីវិត និងត្រូវបានគេមើលងាយមើលថោកទៀតផង។ ម្យ៉ាងទៀតក៏មិនបានកំរ៉ៃលើសពីការធ្វើការងារក្នុងស្រុករបស់យើងដែរ ។ សព្វថ្ងៃនេះ ថៃកំពុងតែបង្កជម្លោះតាមព្រំដែនជាមួយខ្មែរយើង ដូច្នេះជាការងាយនឹងគេធ្វើបាបដោយប្រការផ្សេងៗ ។ ពលករខ្មែរទាំង១៧នាក់ ក្រោយពីធ្វើការអប់រំពន្យល់ណែ នាំហើយ បានឱ្យពួកគាត់វិលត្រឡប់ទៅលំនៅឋានវិញ ព្រមទាំងសុំឱ្យគាត់ជួយផ្សព្វផ្សាយពីផលប៉ះពាល់នៃការចំណាកស្រុកផងដែរ ៕
ចែករំលែកព័តមាននេះ