ខេត្តបន្ទាយមានជ័យ ៖ ក្រោយពីសភាពការណ៍នៅតាមបន្ទាត់ព្រំដែនមានភាពធូរស្រាលក្រុមឈ្មួញនៅតែបន្តការរកស៊ីនាំម៉ូតូខុសច្បាប់ពីប្រទេសសៀមតាមច្រករបៀងក្បែរច្រកតំបន់បឹងត្រកួន ស្រុកថ្មពួក ដោយពួកឈ្មួញបង់លុយឱ្យកម្លាំងសមត្ថកិច្ចដែលឈរជើងតាមបន្ទាត់ព្រំដែន តាមដងផ្លូវ និងបន្តបង់ប្រាក់វិន័យហើយនាំចេញទៅលក់នៅ
ខេត្តបន្ទាយមានជ័យ ៖ ក្រោយពីសភាពការណ៍នៅតាមបន្ទាត់ព្រំដែនមានភាពធូរស្រាលក្រុមឈ្មួញនៅតែបន្តការរកស៊ីនាំម៉ូតូខុសច្បាប់ពីប្រទេសសៀមតាមច្រករបៀងក្បែរច្រកតំបន់បឹងត្រកួន ស្រុកថ្មពួក ដោយពួកឈ្មួញបង់លុយឱ្យកម្លាំងសមត្ថកិច្ចដែលឈរជើងតាមបន្ទាត់ព្រំដែន តាមដងផ្លូវ និងបន្តបង់ប្រាក់វិន័យហើយនាំចេញទៅលក់នៅរាជធានីភ្នំពេញ និងតាមបណ្តាខេត្តមួយចំនួនក្នុងមួយថ្ងៃៗមានពី២០ទៅ៤០គ្រឿង ។
គួរបញ្ជាក់ផងដែរថា រយៈពេលកន្លងមក រាជរដ្ឋាភិបាលកម្ពុជា បានចាត់វិធានការរឹតបន្តឹងទៅលើអំពើពុករលួយ ហើយបានស្រាវជ្រាវរកឃើញមន្ត្រីមួយចំនួនដែលពាក់ព័ន្ធនឹងឈ្មួញរកស៊ីរថយន្តចង្កូតស្តាំខុសច្បាប់ដោយបានដកហូតតំណែងមន្ត្រីថ្នាក់ដឹកនាំក្នុងខេត្តមួយចំនួន ហើយឈ្មួញខ្លះបានគេចខ្លួន តែរហូតមកទល់ពេលនេះបានចូលស្រុកខ្លះៗហើយ និងបានធ្វើសកម្មភាពនាំចូលម៉ូតូគេចពន្ធឡើងវិញ ។
ក្រោយពីម៉ូតូគេចពន្ធត្រូវបាននាំចូលពីប្រទេសសៀមតាមច្រករបៀងក្បែរច្រកតំបន់បឹងត្រកួនកន្លងមក គេឃើញកម្លាំងយោធាភូមិភាគទី៥ ជួសមុខឱ្យអាជ្ញាធរខេត្តបន្ទាយមានជ័យចាប់បាន៦គ្រឿង និងកម្លាំងនគរបាលការពារព្រំដែនប្រចាំទិសនៅបឹងត្រកួន បានបង្ក្រាបផ្ទះឈ្មួញស្តុកម៉ូតូគេចពន្ធ និងចាប់ឈ្មួញបញ្ជូនទៅតុុលាការ ។ ទោះបីជាមានការបង្ក្រាបឈ្មួញដែលរកស៊ីម៉ូតូខុសច្បាប់យ៉ាងណាក៏ដោយ គេឃើញឈ្មួញនៅតែបន្តរកស៊ីយ៉ាងគគ្រឹកគគ្រេងដដែល ហាក់មិនខ្លាចញញើតនឹងច្បាប់ឡើយ ។
តាមប្រភពព័ត៌មានពីឈ្មួញដែលរកស៊ីម៉ូតូខុសច្បាប់បានឱ្យដឹងថា មូលហេតុដែលគាត់ហ៊ានទទួលទិញម៉ូតូពីចោរសៀមនាំចូលតាមច្រករបៀងដែលជាម៉ូតូគេចពន្ធខុសច្បាប់ គឺគាត់បានបង់លុយឱ្យសមត្ថកិច្ចដែលឈរជើងតាមបន្ទាត់ព្រំដែន និងតាមផ្លូវពីបឹងត្រកួនមកដល់ទីរួមខេត្តដែលមានជាច្រើនកន្លែង ហើយត្រូវយកមកបង់ពន្ធផាកពិន័យនៅកន្លែងគយ រួចទើបនាំចេញទៅលក់នៅរាជធានីភ្នំពេញនិងតាមបណ្តាខេត្តមួយចំនួន ។ តាមការឱ្យដឹងពីឈ្មួញខ្មែរថា ម៉ូតូដែលលួចនាំចូលមកនេះមាន២ប្រភេទគឺម៉ូតូដាវ និងម៉ូតូក្តៅ។ ម៉ូតូដាវគឺជាប្រភេទម៉ូតូដែលលួចទិញមិនស្របច្បាប់ពីរោងចក្រ តែម៉ូតូប្រភេទនេះតិចទេ ឯម៉ូតូក្តៅគឺជាម៉ូតូដែលចោរលួចឬប្លន់បានយកមកលក់ ហើយម៉ូតូប្រភេទនេះមានច្រើន ។ តាមជំនឿរបស់ខ្មែរតែងប្រកាន់ថា របស់ដែលបានមកពីការឆក់ ប្លន់ ឬលួចជារបស់ក្តៅ ក្រហាយ ដូច្នេះមិនគួរនាំគ្នាទិញជិះទេ ទោះបីជាថោកបន្តិចក្តី ៕
ចែករំលែកព័តមាននេះ