សម្តេចធិបតី ៖ ការសម្រេចដកកងទ័ពកម្ពុជា ចេញពីប្រទេសម៉ាលី ដោយសារអសន្តិសុខក្នុងតំបន់
ខេត្តកំពង់ចាម ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា សូម្បីកងទ័ពយូអិន UN ដែលមានកងទ័ពកម្ពុជា…
ខេត្តកំពង់ចាម ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា សូម្បីកងទ័ពយូអិន UN ដែលមានកងទ័ពកម្ពុជា ក្នុងនោះ ក៏ត្រូវបង្ខំចិត្ត ដកទ័ពចេញពីប្រទេសម៉ាលីដែរ ដោយសារតែសង្គ្រាម បានបង្កឲ្យអសន្តិសុខ ក្នុងតំបន់ ។
ការលើកឡើងរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ខាងលើនេះ ក្នុងពេលចុះជួបសំណេះសំណាល ជាមួយកម្មករជាង ១ម៉ឺននាក់ នៅខេត្តកំពង់ចាម នាថ្ងៃទី២៥ ខែតុលា ឆ្នាំ២០២៣ ។
សម្តេចធិបតី បានលើកឡើងថា ៖ “គ្មានប្រទេសណាមួយ សប្បាយរីករាយ នៅពេលដែលខ្លួន អសន្តិសុខទេ គ្មានប្រទេសណាមួយ សប្បាយនៅពេល ដែលប្រទេសរបស់ខ្លួនធ្លាក់ក្នុងភ្លើងសង្គ្រាមទេ កុំថា ប្រទេសអ្នកមាន ប្រទេសអ្នកក្រ” ។
ជាមួយគ្នានោះដែរ សម្តេចធិបតី ហ៊ុន ម៉ាណែត បានលើកឡើងថា ៖ “នៅអារ៉ាប់ នៅអ៊ីស្រាអែល ប្រទេសអ្នកមាន តែឥឡូវ វាយគ្នារាល់ថ្ងៃ មិនបានសុខទេ ប្រទេសរុស្ស៊ី ប្រទេសអ៊ុយក្រែន វាយគ្នា សុទ្ធតែប្រទេសអ្នកមាន មិនបានក្តីសុខទេ។ ប្រទេសច្រើនណាស់នៅអាហ្វ្រិក ប្រទេសមួយចំនួន នៅមជ្ឈមបូព៌ាបានវាយប្រហារគ្នា” ។
សម្តេចនាយករដ្ឋមន្ត្រី បានបញ្ជាក់ថា ៖ “ប៉ុន្មានថ្ងៃមុន ខ្ញុំត្រូវផ្តល់ការឯកភាព ដើម្បីដកទ័ព យើងចេញពីប្រទេសម៉ាលី ដោយសារ UN ចាប់ផ្តើមជម្លៀសទ័ព ព្រោះបាត់ពីតំបន់ខ្លះ ដោយសារកន្លែងនោះ វានៅលែងបាន ទ័ព UN មួកខៀវ ក៏គេវាយដែរ” ។
ក្នុងឱកាសនោះដែរ សម្តេចធិបតី បានលើកឡើងទៀតថា “អត់ស្គាល់ទ័ពអ៊ុនតាក់ កាលជំនាន់អ៊ុនតាក់ នៅនេះ។ កងទ័ពកម្ពុជានៅប្រទេសម៉ាលីនោះ UN ត្រូវសម្រេចដកកងទ័ព ប៉ុន្មានម៉ឺននាក់ ក្នុងនោះមានទ័ពកម្ពុជាជិត១០០នាក់នៅទីនោះ បញ្ជាឲ្យដកទ័ព ហើយកម្ទេចចោលសម្ភារៈទាំងអស់ ឡានអាកាំម៉ាស់ ប៉ុន្មានគ្រឿង មួយគ្រឿងជិត១០ម៉ឺនដុល្លារជាង ត្រូវយកអេស្កាវាទ័រ វាយចោលនៅនឹងកន្លែង កម្ទេចចោលទាំងអស់ នឹងហើយ ប្រសិនបើវាបាត់សន្តិភាព សូម្បីអង្គការសហប្រជាជាតិ ក៏ដកថយដែរ” ។
គួរបញ្ជាក់ថា នៅប៉ុន្មានឆ្នាំចុងក្រោយនេះ ស្ថានភាពពិភលោក កំពុងរងការគំរាមកំហែង ដោយសារសង្គ្រាម ដោយប្រទេសធំៗ មួយចំនួន បានចាប់ផ្តើមវាយលុក លើប្រទេសដទៃ ហើយបង្កឲ្យសង្គ្រាម តួរយ៉ាង រុស្ស៊ី និងអ៊ុយក្រែន និងរយៈពេលចុងក្រោយនេះ ប្រទេសអ៊ីស្រាអែល និងក្រុមប្រយុទ្ធហាម៉ាស់ ប៉ាឡេស្ទីន តែម្តង ៕
ចែករំលែកព័តមាននេះ