ខេត្តកំពត ៖ កាលពីព្រឹកថ្ងៃទី១៨ ឧសភា ប្រជាពលរដ្ឋអ្នករកស៊ីឡើងភ្នំចំនួនជាង១០០នាក់ ក្នុងចំណោមជាង២០០គ្រួសារ បាននាំគ្នាទៅតវ៉ានៅមុខកុងត្រូលការដ្ឋានទំនប់វារីអគ្គិសនីកំចាយ របស់ក្រុមស៊ីណូហាយត្រូ (ចិន) ដើម្បីសំណូមពរសុំឱ្យក្រុមហ៊ុននេះបើកផ្លូវឱ្យពួកគេបានឡើងភ្នំតាមផ្លូវដែលពួកគាត់ធ្លាប់ឡើងនេះផង ពីព្រោះកន្លងមកពួក
ខេត្តកំពត ៖ កាលពីព្រឹកថ្ងៃទី១៨ ឧសភា ប្រជាពលរដ្ឋអ្នករកស៊ីឡើងភ្នំចំនួនជាង១០០នាក់ ក្នុងចំណោមជាង២០០គ្រួសារ បាននាំគ្នាទៅតវ៉ានៅមុខកុងត្រូលការដ្ឋានទំនប់វារីអគ្គិសនីកំចាយ របស់ក្រុមស៊ីណូហាយត្រូ (ចិន) ដើម្បីសំណូមពរសុំឱ្យក្រុមហ៊ុននេះបើកផ្លូវឱ្យពួកគេបានឡើងភ្នំតាមផ្លូវដែលពួកគាត់ធ្លាប់ឡើងនេះផង ពីព្រោះកន្លងមកពួកគាត់ជាង២០០គ្រួសារ ដែលរស់នៅភូមិទ្វីខាងជើង និងភូមិអូរតូច ក្នុងសង្កាត់អណ្តូងខ្មែរ ក្រុងកំពត មានតែមុខរបររកស៊ីឡើងភ្នំ ដើម្បីបោចវល្លិ៍បោចផ្តៅ និងកាប់ឫស្សីត្បាញកញ្ឆេ ធ្វើដោះស្រាយជីវភាពប្រចាំថ្ងៃមួយថ្ងៃរួចមួយថ្ងៃប៉ុណ្ណោះ បើសិនក្រុមហ៊ុនបិទផ្លូវដែលធ្លាប់ឡើងភ្នំនេះ មិនឱ្យពួកគាត់ឡើងទេ ពួកគាត់ពិតជាដាច់ពោះស្លាប់ពុំខាន ។
ក្រោយពីប្រជាពលរដ្ឋមកសុំដល់កុងត្រូលដែលជាកន្លែងប្រចាំការការពារការដ្ឋានទំនប់នេះ សមត្ថកិច្ចបានប្រាប់ពួកគាត់ឱ្យនាំគ្នាទៅសុំអាជ្ញា ធរខេត្តវិញ ព្រោះ ខេត្តជាអ្នកបិទ ។ ក្រោយពីឮការណែនាំពីសមត្ថកិច្ចមកប្រជាពលរដ្ឋជាង១០០នាក់ តំណាងឱ្យប្រជាពលរដ្ឋជាង២០០នាក់នោះ នាំគ្នាមកដល់សាលាខេត្តកំពត នៅវេលាម៉ោង៩និង៣០នាទីព្រឹកដើម្បីសុំឱ្យលោកអភិបាលខេត្តជួយដោះស្រាយបញ្ហាការបិទផ្លូវខាងលើ ។ ប៉ុន្តែប្រជាពលរដ្ឋមានការហួសចិត្តគ្រប់ៗគ្នា ដោយពុំបានជួប និងទទួលការណែ នាំ ឬជួបផ្ទាល់ជាមួយមន្ត្រីក្នុងសាលាខេត្តណាម្នាក់សោះ គឺបានជួបនិងទទួលការណែនាំពីអ្នកបើកបររថយន្តទៅវិញ ដោយបានប្រាប់ និងណែនាំឱ្យប្រជាពលរដ្ឋទាំងអស់ត្រឡប់ទៅវិញ ទៅធ្វើលិខិតពីមេឃុំ ឬ ចៅសង្កាត់មកទើបលោកអភិបាលខេត្តមានការដោះស្រាយជូន។
ក្រោយពីទទួលការណែនាំពីអ្នកបើកបររថយន្តរួចប្រជាពលរដ្ឋទាំងអស់ក៏ត្រឡប់មកសង្កាត់អណ្តូងខ្មែរ ដើម្បីឱ្យចៅសង្កាត់ជួយធ្វើអន្តរាគមន៍ ។ លោកយ៉យ ស៊ីថង ចៅសង្កាត់អណ្តូងខ្មែរ បានឱ្យដឹងថា ប្រជាពលរដ្ឋដែលមានមុខរបរឡើងភ្នំបោចវល្លិ៍ បោចផ្តៅ និងកាប់ឫស្សីត្បាញកញ្ឆេធ្វើលួនេះនៅទូទាំងសង្កាត់អណ្តូងខ្មែរ មានចំនួនជាង២០០គ្រួសារ ក្នុងនោះមានភូមិពីរ គឺភូមិទ្វីខាងជើងមានពលរដ្ឋពាក់កណ្តាលនៃចំនួនពលរដ្ឋសរុបដែលមានមុខរបររកស៊ីឡើងភ្នំ ឯពាក់កណ្តាលទៀតពួកគាត់មានមុខរបរផ្សេងៗដូចជាធ្វើសំណង់ រត់ម៉ូតូឌុប និងជាមន្ត្រីរាជការ ចំពោះភូមិមួយទៀត គឺភូមិអូរតូច ប្រជាពលរដ្ឋភាគច្រើនជាអ្នករកស៊ីឡើងភ្នំ ។
ប្រជាពលរដ្ឋឈ្មោះហ៊ាន ហាន ភេទប្រុស អាយុ៣៦ឆ្នាំ នៅភូមិអូរតូច សង្កាត់អណ្តូងខ្មែរ បានឱ្យដឹងថា គាត់មានតែមុខរបររកស៊ីឡើងភ្នំ ដើម្បីដោះស្រាយជីវភាពក្នុងគ្រួសារតែប៉ុណ្ណោះ បើអាជ្ញាធរ និងក្រុមហ៊ុនបិទផ្លូវដែលពួកគាត់ធ្លាប់ឆ្លងកាត់ទៅឡើងភ្នំនោះ គ្មានផ្លូវច្រកណាអាចឡើងទៅភ្នំបានទៀតទេ កូនប្រពន្ធ ពិតជាអត់បាយដាច់ពោះស្លាប់ហើយ សូមអាជ្ញាធរ និងក្រុមហ៊ុនមេត្តាជួយដោះស្រាយបញ្ហាខាងលើនេះផង ។ រីឯប្រជាពលរដ្ឋម្នាក់ទៀតឈ្មោះកៅ ខេង ភេទប្រុស អាយុ៤០ឆ្នាំ រស់នៅភូមិទ្វីខាងជើង សង្កាត់អណ្តូងខ្មែរ ក្រុងកំពត បានឱ្យដឹងថា ច្រកផ្លូវដែលក្រុមហ៊ុនបិទមិនឱ្យចូលឆ្លងកាត់នេះ អ្នកភូមិដែលរកស៊ីឡើងភ្នំ ជាច្រើនតំណមកហើយ គឺធ្លាប់ឡើងតែតាមច្រកផ្លូវមួយនេះ បើក្រុមហ៊ុនបិទមិនឱ្យឆ្លងកាត់គាត់គ្មានផ្លូវត្រង់ណាអាចឡើងបានទេ សូមអាជ្ញាធរ និងក្រុមហ៊ុនមេត្តាជួយដោះស្រាយដល់រូបគាត់ និងប្រជាពលដែលធ្លាប់តែដើរតាមផ្លូវនេះជាយូរយារណាស់មកហើយផង ។
គួររំលឹកដែរថា ការបិទផ្លូវដែលប្រជាពលរដ្ឋធ្លាប់ធ្វើដំណើរទៅកាប់ឫស្សី ដោយដឹកតាមកង់ និងម៉ូតូតាមច្រកទ្វារចូលក្នុងការដ្ឋានទំនប់នេះតាំងពីថ្ងៃទី១ ឧសភា រហូតមកដល់ថ្ងៃទី១៨ ឧសភា ជិត២០ថ្ងៃហើយដែលបង្កក្តីព្រួយបារម្ភចំពោះប្រជាពលរដ្ឋជាង២០០គ្រួសារ នៅក្នុងសង្កាត់អណ្តូងខ្មែរ ក្រុងកំពត ពីបញ្ហាដោះស្រាយជីវភាពរស់នៅប្រចាំថ្ងៃ កំពុងគំរាមកំហែងយ៉ាងធ្ងន់ធ្ងរ ៕
ចែករំលែកព័តមាននេះ