រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា នាយកដ្ឋាននគរបាលព្រហ្មទណ្ឌក្រសួងមហាផ្ទៃ បានដាក់កម្លាំងចុះឡោមព័ទ្ធទីតាំងអគារមួយកន្លែង និងបានឃាត់ខ្លួនជនបរទេសជាច្រើននាក់ទៀត ដោយសង្ស័យថា ពាក់ព័ន្ធករណីផលិតរឿងបែបអ.អ.ភ (អា.សអាភា.ស) បង្កឱ្យមានការភ្ញាក់ផ្អើលកាលពីវេលាម៉ោង៨យប់ ថ្ងៃទី២៤ ខែតុលា ឆ្នាំ២០២៣ នៅចំណុចអគារមួយកន្លែង ស្ថិតលើកំណាត់ផ្លូវលេខ៣១០ មូលដ្ឋានសង្កាត់បឹងកេងកង១ ក្នុងខណ្ឌបឹងកេងកង រាជធានីភ្នំពេញ។
យោងតាមប្រភពព័ត៌មានពីទីតាំងកើតហេតុខាងលើ បានប្រាប់ឲ្យដឹងថា នៅមុនពេលកើតហេតុ មាននារីចំនួន២នាក់ (សង្ស័យជានារីរងគ្រោះ) បានទៅដាក់ពាក្យបណ្តឹងនៅក្រសួងមហាផ្ទៃ ពាក់ព័ន្ធជាមួយករណីថត និងផលិតរឿងបែបអ.អ.ភ (អា.សអាភា.ស) នៅក្នុងបន្ទប់ជាន់ទី៩ នៃអគាកើតហេតុខាងលើ។
ក្រោយពីទទួលដំណឹងនេះភ្លាម កម្លាំងនាយកដ្ឋាននគរបាលព្រហ្មទណ្ឌកម្រិតធ្ងន់ និងកម្រិតស្រាល បានដាក់កម្លាំងជាច្រើននាក់ រួមមាន ៖ ឯកសណ្ឋាន អាវក្រោះ និងកាំភ្លើ.ងគ្រប់ដៃ នាល្ងាចថ្ងៃទី២៤ ខែតុលា ឆ្នាំ២០២៣នេះ ក៏ចុះទៅឡោមព័ទ្ធទីតាំងអគាមួយកន្លែង ព្រមទាំងឃាត់ខ្លួនជនបរទេសជាច្រើននាក់ទៀត ដែលសង្ស័យថា ជាប់ពាក់ព័ន្ធករណីថត និងផលិតរឿងបែបអ.អ.ភ (អា.សអាភា.ស) នោះ។
ក្រោយពេលឃាត់ខ្លួនរួច សមត្ថកិច្ចបានបញ្ជូនក្រុមជនសង្ស័យ ព្រមទាំងសម្ភារៈជាប់ពាក់ព័ន្ធទាំងអស់ ទៅកាន់នាយកដ្ឋានព្រហ្មទណ្ឌក្រសួងមហាផ្ទៃ ដើម្បីធ្វើការសាកសួរ និងបំពេញឯកសារ ចាត់ការតាមនីតិវិធីនៃច្បាប់នៅពេលក្រោយ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព នៅពេលក្រោយបន្តទៀត។
ចែករំលែកព័តមាននេះ