ដោយសារតែរយៈពេលជាច្រើនថ្ងៃកន្លងមកនេះ មានភ្លៀងធ្លាក់ជាបន្តបន្ទាប់ស្ទើរតែរាល់ថ្ងៃ បានធ្វើឲ្យកំណាត់ផ្លូវជាតិលេខ៤ នៅត្រង់ចំណុចខាងលិចសាលាក្ដីខ្មែរក្រហម មុខបុរីញូវថោន ជាប់ផ្លូវរថភ្លើងខ្សែភ្នំពេញ-កំពង់សោម ស្ថិតក្នុងភូមិអង្គ សង្កាត់ចោមចៅទី៣
រាជធានីភ្នំពេញ ៖ ដោយសារតែរយៈពេលជាច្រើនថ្ងៃកន្លងមកនេះ មានភ្លៀងធ្លាក់ជាបន្តបន្ទាប់ស្ទើរតែរាល់ថ្ងៃ បានធ្វើឲ្យកំណាត់ផ្លូវជាតិលេខ៤ នៅត្រង់ចំណុចខាងលិចសាលាក្ដីខ្មែរក្រហម មុខបុរីញូវថោន ជាប់ផ្លូវរថភ្លើងខ្សែភ្នំពេញ-កំពង់សោម ស្ថិតក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ត្រូវបានទឹកជន់លិចជាប់ជាប្រចាំជាច្រើនថ្ងៃហើយមកដែរ។
រហូតមកដល់ថ្ងៃទី២៤ ខែតុលា ឆ្នាំ២០២៣នេះ ទឹកនៅតែបន្តលិចដដែល ដោយនៅកណ្ដាលទ្រូងផ្លូវទឹកលិចត្រឹមខ្នងជើង ចំណែកនៅកៀងខាងវិញ កន្លែងខ្លះលិចត្រឹមស្មងជើង និងកន្លែងខ្លះទៀតលិចដល់ត្រឹមភ្លៅតែម្ដង។
បើតាមប្រជាពលរដ្ឋបាននិយាយប្រាប់ឱ្យដឹងថា នៅចំណុចខាងលើនេះ ត្រូវបានទឹកជន់ជារៀងរាល់ឆ្នាំរយៈពេលប្រមាណជាង១០ឆ្នាំមកហើយ គឺឲ្យតែដល់ខែវស្សា មានភ្លៀងធ្លាក់ខ្លាំងរាល់ថ្ងៃ គឺដឹងតែលិចមិនដែលខាននោះទេ ជាពិសេសនៅអំឡុងខែតុលានេះតែម្ដង ហើយមានពេលខ្លះមិនត្រឹមតែលិចផ្លូវជាតិលេខ៤ ប៉ុណ្ណោះទេ ទឹកបានជន់លិចដល់ក្នុងផ្ទះនៅអមសងខាងផ្លូវនោះថែមទៀតផង។
ប្រភពដដែលបានប្រាប់ឲ្យដឹងបន្តថា នៅអមផ្លូវជាតិលេខ៤នោះ ក៏មានប្រឡាយ២ខ្សែផងដែរ ប៉ុន្តែនៅតែពុំអាចរំដោះទឹកចេញទាន់ឡើយ ព្រោះបរិមាណទឹកច្រើនពេក ដោយទឹកបានហូរចាក់តាំងពីក្នុងភូមិសាស្ត្រស្រុកអង្គស្នួល ខេត្តកណ្ដាល និងភូមិសាស្ត្រខណ្ឌកំបូល រាជធានីភ្នំពេញមកផង ។ គួបផ្សំនឹងតំបន់នេះ ទំនាបផង ធ្វើឲ្យទឹកហូរបន្តទៅប៉ែកខាងក្រោមៗមិនទាន់ ទើបបណ្ដាលឲ្យលិចលង់ផ្លូវជាតិបែបនេះជាប្រចាំតែម្ដង ចំណែកនៅត្រង់ចំណុចមុខវត្តស្ងួនពេជ្រ ស្ថិតក្នុងសង្កាត់កន្ទោក ខណ្ឌកំបូល ក៏ត្រូវទឹកលិចដែរ។
ប្រភពខាងលើបានប្រាប់ឲ្យដឹងបន្តទៀតថា កាលពីប៉ុន្មានថ្ងៃមុន ដោយសារតែលិចខ្លាំងរដ្ឋបាលខណ្ឌកំបូល បានចេញសេចក្ដីជូនដំណឹងស្ដីពីការបញ្ចៀសចរាចរណ៍រថយន្តធុនធំ ដែលចេញ និងចូលរាជធានីភ្នំពេញ មិនឲ្យបើកឆ្លងកាត់ផ្លូវជាតិលេខ៤ ត្រង់ចំណុចខាងលើឡើយ។ ដោយបានឲ្យរថយន្តធន់ធ្ងន់នានា ធ្វើចរាចរណ៍វាងទៅតាមផ្លូវជាតិលេខ៤២ ពីចំណុចផ្សារបែកចាន ឃុំបែកចាន ស្រុកអង្គស្នួល ខេត្តកណ្ដាល ឬទៅតាមផ្លូវជាតិលេខ៣ និងផ្លូវក្រវាត់ក្រុងទី៣ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ប្រភពមួយនេះបានបញ្ជាក់ថា ការបិទចរាចរណ៍នោះ ក្រោយមកក៏បានបើកឲ្យធ្វើចរាចរណ៍វិញជាធម្មតា បន្ទាប់ពីទឹកស្រកបន្តិចវិញ ដោយឡែកនៅថ្ងៃទី២៣ ខែតុលា មានភ្លៀងធ្លាក់បន្តធ្វើឲ្យទឹកជន់ឡើងខ្លាំងថែមទៀត ប៉ុន្តែការធ្វើចរាចរណ៍រថយន្តគ្រប់ប្រភេទនៅតែបន្តជាធម្មតា គ្រាន់តែយឺតៗមិនអាចបើកលឿនបានឡើយ ហើយភាគច្រើនធ្វើដំណើរបានតែនៅកណ្ដាលផ្លូវប៉ុណ្ណោះ៕
ចែករំលែកព័តមាននេះ