ភ្នំពេញ៖ ប្រធានស្តីទី​គណបក្សភ្លើងទៀន លោក សុក ហាច បានអះអាងថា ពេលនេះ គណបក្ស​កម្លាំង​ជាតិ  ដែលមានស្ថាបនិក ឈ្មោះ ស៊ុន ចន្ធី ​បង្កើតឡើង ដោយគណបក្សភ្លើងទៀន។ គណបក្សកម្លាំងជាតិ ពេលនេះ កំពុងបែកឆ្វេង លែងស្តាប់ខ្លួន ដែលជាអ្នកផ្តល់ថវិកាទៀតហើយ​។

​គណបក្សកម្លាំងជាតិ បានប្រកាសនៅថ្ងៃទី២២ តុលា ឆ្នាំ២០២៣ ពីទិសដៅការងារ ឆ្នាំ២០២៧ គឺការបោះឆ្នោត​ឃុំសង្កាត់​។ គណបក្សកម្លាំងជាតិ បានប្រកាសថា គណបក្ស​កម្លាំងជាតិ គឺជាផ្ទះថ្មី ដែលមាននីតិសម្បទាត្រឹមត្រូវគ្រប់លក្ខណៈច្បាប់ សម្រាប់ឲ្យកម្លាំងអ្នកប្រជាធិបតេយ្យពិតប្រាកដ ដែលបានចេញមុខតស៊ូ តាំងពីឆ្នាំ១៩៩៥ រហូត​ដល់​បច្ចុប្បន្ន​នេះ មកស្នាក់នៅរួមរស់ជាមួយគ្នា ដើម្បីបន្តដំណើរតស៊ូទៅមុខ ក្នុងបុព្វហេតុតស៊ូទាមទារសិទ្ធិសេរីភាព យុត្តិធម៌សង្គម ការពារបូរណភាពទឹកដី និងស្តារដំណើរការលទ្ធិប្រជាធិបតេយ្យសេរីឡើងវិញ សម្រាប់ផលប្រយោជន៍ប្រជាពលរដ្ឋ និងប្រទេសជាតិទាំងមូល។

កាលពីថ្ងៃទី១២ ខែតុលា ឆ្នាំ២០២៣ ​លោកអភិសន្តិបណ្ឌិត ស សុខា បានចេញលិខិត សម្រេច​ចុះឈ្មោះ គណបក្ស​កម្លាំងជាតិ ដែលមានអាសយដ្ឋាន​នៃទីស្នាក់កណ្តាល នៅក្រុមទី១៣ ផ្លូវលំ ភូមិ​ក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ក្នុងបញ្ជីគណបក្ស​នយោបាយ​ នៅក្រសួងមហាផ្ទៃ។​

សូមបញ្ជាក់បន្ថែមថា គណបក្សភ្លើងទៀន ដែលបានប្តូរឈ្មោះមកពីគណបក្ស​សមរង្ស៊ី គឺបាត់​ច្បាប់​ដើមនៃការសម្រេចទទួលស្គាល់ និងចុះឈ្មោះគណបក្ស​នេះ នៅក្រសួងមហាផ្ទៃ។ ដូច្នេះគណបក្សភ្លើងទៀន មិនអាចចូលរួម​ការបោះឆ្នោត​តំណាងរាស្ត្រ កាលពីខែកក្កដា ឆ្នាំ២០២៣ និង​ការបោះឆ្នោតព្រឹទ្ធសភា នាខែកុម្ភៈ ឆ្នាំ២០២៤ បាននោះទេ​៕​