រាជ​ធានី​ភ្នំពេញ​ ៖ ក្រុមចៅក្រមនៃអង្គជំនុំ​ជម្រះសាលាដំបូងកាលពីថ្ងៃទី៩ ឧសភា ឆ្នាំ២០១១ បានចេញសេចក្តីសំរេចមួយអំពី​ការ​បដិសេធបណ្តឹងរបស់ អៀង សារី និង​អៀង ធីរិទ្ធ ប្តឹងដិតចិត្តចៅក្រមយូ ឧត្តរា ស្ថិត​នៅក្នុង​អង្គចៅក្រមពិសេស និងជាចៅក្រម​បម្រុង​នៃអង្គជំនុំជម្រះសាលាដំបូង។ ការបដិ​សេធដោយសំអាងថាបណ្តឹងនោះគ្មាន​មូលដ្ឋាន។

យោងតាមសេចក្តី​សំរេច​ដែលបានចេញ​ផ្សាយជាសាធារណៈដោយអង្គជំនុំជម្រះសាលា​ដំបូងនៃសា លាក្តីខ្មែរក្រហមចុះថ្ងៃទី៩ ខែ​ឧសភា ឆ្នាំ២០១១​ចុះហត្ថលេខា​ដោយចៅក្រម​ចំនួន៥រូប​មាន​ចៅក្រមខ្មែរ៣រូប និងចៅ​ក្រម​បរទេស២រូបឲ្យដឹងថាអង្គជំនុំជម្រះសាលាដំបូងមិនឯកភាពទៅនឹងការលើកឡើងរបស់មេធាវីការពារ​​អៀង សារី ​ដែលថាមានទំនាស់ផល​ប្រយោជន៍នៅក្នុងការសំរេចរបស់អង្គជំនុំជម្រះ លើបណ្តឹងទាំងអស់នេះ។ អំណះអំណាងនោះ​របស់​មេធាវីអៀង សារី គឺសំអាងលើការចោទ​ប្រកាន់​ជារួមអំពីឯករាជ្យរបស់តុលាការ និង​ពុំទាក់ទងទៅនឹងចៅក្រមណាម្នាក់នៃអង្គជំនុំជម្រះសា លាដំបូងឡើយ។

សាលាក្តីបន្តថា ដោយហេតុថាអង្គចៅក្រមពិសេសបានបញ្ចប់នូវ អាណត្តិរបស់ខ្លួនហើយនោះ បណ្តឹងរបស់អៀង ធីរិទ្ធ​និងអៀង សារី គឺចាត់ទុកថាគ្មាន​មូលដ្ឋាន។​ ទោះ​បីជាយ៉ាងណាក្តីដោយយល់ឃើញពី​សារ​សំខាន់នៃបញ្ហាដែលបានលើកឡើងនៅក្នុងបណ្តឹងដិតចិត្តនោះ អង្គជំនុំជម្រះចេញសេចក្តី​សំរេចនេះដើម្បីសំរេចទៅលើបញ្ហា​សារធាតុនៃ ការចោទប្រកាន់នៅក្នុងពាក្យបណ្តឹងដែលអង្គជំនុំជម្រះយល់ឃើញថាត្រូវបានធ្វើឡើងដោយមិន សមហេតុផល។

សាលាក្តីបានឲ្យដឹងទៀថា ការចោទប្រកាន់ ចៅក្រម យូ ឧត្តរា ថាមានភាពលំអៀងកើត​ឡើងដោយសារគាត់មានតួនាទីនៅក្នុងក្រុមប្រឹក្សាជំនុំជម្រះនៃតុលាការ​កំពូល​កម្ពុជាដែល​បានតម្កល់សាលក្រមផ្តន្ទាទោសលោកស្រីមូរ សុខហួរជាអ្នកនយោបាយមកពីគណបក្សប្រឆាំងពីបទបរិហារកេរ្តិ៍សម្តេច​នាយក​រដ្ឋ​​មន្រ្តី​ហ៊ុន សែន កាលពីខែ​មិថុនាឆ្នាំ២០១០កន្លងទៅ ។ ការប្តឹងដិតចិត្តជាសិទ្ធិជនត្រូវចោទនៅ ចំពោះមុខច្បាប់ ៕