រាជធានីភ្នំពេញ ៖ ក្នុងឱកាសចូលសម្តែងការគួសម និងជម្រាបលាលោកឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ កាលពីព្រឹកថ្ងៃទី១៨ ឧសភា ឆ្នាំ២០១១ លោក Mohammad youniskhan ឯកអគ្គរដ្ឋទូតប៉ាគីស្ថានប្រចាំកម្ពុជា ដែលត្រូវបញ្ចប់អាណត្តិបានថ្លែងថា ប៉ាគីស្ថាន និងកម្ពុជានៅតែ
រាជធានីភ្នំពេញ ៖ ក្នុងឱកាសចូលសម្តែងការគួសម និងជម្រាបលាលោកឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ កាលពីព្រឹកថ្ងៃទី១៨ ឧសភា ឆ្នាំ២០១១ លោក Mohammad youniskhan ឯកអគ្គរដ្ឋទូតប៉ាគីស្ថានប្រចាំកម្ពុជា ដែលត្រូវបញ្ចប់អាណត្តិបានថ្លែងថា ប៉ាគីស្ថាន និងកម្ពុជានៅតែបន្តទំនាក់ទំនងលើគ្រប់វិស័យកាន់តែរឹងមាំបន្ថែមទៀត បើទោះបីជាប្រទេសយើងទាំងពីរស្ថិតនៅឆ្ងាយពីគ្នាក៏ដោយ។
លោកគុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានប្រាប់អ្នកកាសែតក្រោយជំនួបនោះថា លោក Mohammad youniskhan ឯកអគ្គរដ្ឋទូតប៉ាគីស្ថានប្រចាំកម្ពុជា ដែលលោកត្រូវបញ្ចប់អាណត្តិ និងវិលទៅប្រទេសរបស់លោកវិញនោះបានថ្លែងនូវការកោតសរសើរ ចំពោះរាជរដ្ឋាភិបាលកម្ពុជា ដែលដឹកនាំប្រទេសមានការអភិវឌ្ឍន៍លើគ្រប់វិស័យ។ លោកក៏បានសម្តែងនូវមោទនភាពផងដែរ ក្នុងអំឡុងពេលដែលលោកបំពេញបេសកកម្មការទូតនៅកម្ពុជា ហើយទទួលបានការគាំទ្រ និងការគោរពស្រឡាញ់ពីរាជរដ្ឋាភិបាល ប្រជាជនកម្ពុជា ដែលធ្វើឱ្យលទ្ធផលនៃការងារការទូតរបស់លោកទទួលបានជោគជ័យ។
លោក Mohammad youniskhan បានថ្លែងអំណរគុណចំពោះរាជរដ្ឋាភិបាល និងប្រជាជនកម្ពុជាដែលបានចូលរួមជាវិភាគទានដោយស្មារតីសប្បុរសជួយដល់ជនរងគ្រោះប៉ាគីស្ថាន ដោយសារទឹកជំនន់ និងរញ្ជួយដីកន្លងមក ហើយលោកបានចាត់ទុកកាយវិការនោះ គឺជាស្មារតីសាមគ្គីភាពមិត្តភាព និងសហប្រតិបត្តិការដ៏រឹងមំារវាងប្រទេសទាំងពីរប៉ាគីស្ថាន-កម្ពុជា។ ទន្ទឹមនោះ ដើម្បីឆ្លើយតបចំពោះកម្ពុជា ដែលបានបោះឆ្នោតគំាទ្រប្រទេសប៉ាគីស្ថានចូលជាសមាជិកមិនអចិន្ត្រៃយ៍នៃក្រុមប្រឹក្សា សន្តិសុខអង្គការសហប្រជាជាតិនោះ ប្រទេសប៉ាគីស្ថានសន្យាថា នឹងបោះឆ្នោតគាំទ្រប្រទេសកម្ពុជាចូលជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិវិញនាឆ្នាំ២០១២ខាងមុខ។
ក្នុងជំនួបនោះផងដែរ លោកឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិបានឆ្លើយតបនឹងវាយតម្លៃខ្ពស់ចំពោះការខិតខំប្រឹងប្រែងលើការងារការទូត របស់លោក Mohammad youniskhan ក្នុងបេសកកម្មការទូតនៅកម្ពុជា ។ បេសកកម្មប្រកបដោយជោគជ័យនោះ គឺបានរួមចំណែកដល់កិច្ចសហប្រតិបត្តិការ និងទំនាក់ទំនងដ៏ល្អរវាងប្រទេសយើងទាំងពីរកម្ពុជា-ប៉ាគីស្ថាន។ លោកក៏បានថ្លែងអំណរគុណដល់ប្រទេសប៉ាគីស្ថានផងដែរ ដែលបានផ្តល់អាហារូបករណ៍រយៈពេលខ្លីដល់និស្សិតកម្ពុជា បានទៅសិក្សារៀនសូត្រ និងដកស្រង់បទពិសោធន៍ការងារនៅទីនោះ។ ទន្ទឹមនោះប្រទេសប៉ាគីស្ថាន ក៏បានផ្តល់ជាសម្ភារថវិកាដល់ជនរងគ្រោះកម្ពុជា ក្នុងឧបទ្ទវហេតុលើស្ពានពេជ្រនៃក្រុងកោះពេជ្រ រួមទាំងលើផ្នែកផ្សេងៗទៀត ។
លោកហោ ណាំហុង បានបញ្ជាក់ថា ក្រៅពីនេះប្រទេសទាំងពីរនៅមានទំនាក់ទំនងលើវិស័យពាណិជ្ជកម្មដែលកន្លងមកក៏មានការនាំចូលមុខទំនិញពីប៉ាគីស្ថានមកកម្ពុជាក្នុងទំហំទឹកប្រាក់ប្រមាណជិត២០លានដុល្លារ ក្នុងមួយឆ្នាំ។ ចំណែកកម្ពុជា បាននាំមុខទំនិញចេញទៅប៉ាគីស្ថានវិញក្នុងទឹកប្រាក់ប្រមាណ១លានដុល្លារក្នុងមួយឆ្នាំផងដែរ ។
យ៉ាងណាក៏ដោយភាគីទាំងពីរសុទ្ធតែបាន អះអាងថា ចំណងទាក់ទងរវាងប្រទសប៉ាគី ស្ថាន និងកម្ពុជាកាន់តែរឹងមាំថែមទៀតនាពេលអនាគត ៕
ចែករំលែកព័តមាននេះ