ក្រុមការងារនៃកម្លាំងជំនាញនាយកដ្ឋាននគរបាលប្រឆាំងបទល្មើសសេដ្ឋកិច្ច ដោយមានការចូលរួមពីមន្ត្រីមន្ទីរសុខាភិបាលខេត្តស្វាយរៀង និងកម្លាំងជាច្រើនទៀត បានសហការគ្នាចុះបង្ក្រាបករណីផលិត និងវេចខ្ចប់គ្រឿងសម្អាងគ្មានច្បាប់អនុញ្ញាត នៅចំណុចឃ្លាំង
ខេត្តស្វាយរៀង ៖ ក្រុមការងារនៃកម្លាំងជំនាញនាយកដ្ឋាននគរបាលប្រឆាំងបទល្មើសសេដ្ឋកិច្ច ដោយមានការចូលរួមពីមន្ត្រីមន្ទីរសុខាភិបាលខេត្តស្វាយរៀង និងកម្លាំងជាច្រើនទៀត បានសហការគ្នាចុះបង្ក្រាបករណីផលិត និងវេចខ្ចប់គ្រឿងសម្អាងគ្មានច្បាប់អនុញ្ញាត នៅចំណុចឃ្លាំងក្នុងដីឡូតិ៍គ្មានលេខមួយកន្លែង ស្ថិតនៅផ្លូវលំ ក្នុងភូមិស្វាយប្រហ៊ូត ឃុំគោកព្រីង ស្រុកស្វាយជ្រុំ ខេត្តស្វាយរៀង កាលពីនៅថ្ងៃទី១៨ ខែតុលា ឆ្នាំ២០២៣នេះ ដោយរឹបអូសបានឡេក្លែងក្លាយ និងសារធាតុផ្សំជាង២តោន។
ប្រតិបត្តិការខាងលើនេះ ដោយក្រុមការងារ នៃកម្លាំងជំនាញនាយកដ្ឋាននគរបាលប្រឆាំងបទល្មើសសេដ្ឋកិច្ច មានការចូលរួមពីមន្ត្រីមន្ទីរសុខាភិបាលខេត្តស្វាយរៀង កម្លាំងសមត្ថកិច្ចស្នងការដ្ឋាននគរបាលខេត្តស្វាយរៀង និងអាជ្ញាធរមូលដ្ឋាន ក្រោមការសម្របសម្រួលនីតិវីធីពីលោក ឡាយ ជុងហេង ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀងផងដែរ។
បើតាមរបាយការណ៍របស់សមត្ថកិច្ច បានឲ្យដឹងថា ក្រោយពីធ្វើការឆែកឆេរ សមត្ថកិច្ចចម្រុះបានរកឃើញ និងដកហូតវត្ថុតាម រួមមាន ៖ ឡេលាបខ្លួនម៉ាក Luxury super ចំនួន២១កេស ស្មើនឹង៦០០គីឡូក្រាម, ឡេលាបមុខម៉ាក TD Night cream (ផលិតផលសម្រេច) ចំនួន៤០០គីឡូក្រាម, ម៉ាស៊ីនក្រឡុកឡេ ចំនួន៣៦គ្រឿង, វត្ថុធាតុដើមផ្សំសម្រាប់ផលិតឡេចំនួន៩មុខ ស្មើនឹង១,៨៦៨គីឡូក្រាម, សម្បកកញ្ចប់ក្រដាសវេចខ្ចប់ ចំនួន៤៥០គីឡូក្រាម, ប្លាស្ទិកវេចខ្ចប់ ចំនួន១៣កេស និងសម្បកខ្លងសម្រាប់វេចខ្ចប់ ចំនួន១,០០៥គីឡូក្រាម។
ក្រោយពីមានការអនុញ្ញាតិពីលោកព្រះរាជអាជ្ញារង សមត្ថកិច្ចក្រុមការងារចម្រុះ បានដកហូតវត្ថុតាងទាំងអស់ និងបិទផ្លុំបេទីតាំងផលិតខាងលើ រួចនាំខ្លួនម្ចាស់ទីតាំងដែលមានឈ្មោះ ញឹម សារិន ភេទស្រី អាយុ៥០ឆ្នាំ និងលោក សុខ តាយ អាយុ២៧ឆ្នាំ (មេការ) មកសាកសួរបំភ្លឺនៅស្នងការដ្ឋាននគរបាលខេត្តស្វាយរៀង ដើម្បីបន្តនីតិវិធីតាមច្បាប់៕
ចែករំលែកព័តមាននេះ