ទឹកស្ទឹងព្រែកត្នោតនៅតែបន្តហក់ឡើងខ្លាំង បើគិតត្រឹមវេលាព្រឹកថ្ងៃទី២០ ខែតុលា ឆ្នាំ២០២៣ ទឹកបានជន់លិចភូមិឋាន និងផ្ទះសម្បែងនៅក្នុងខណ្ឌដង្កោ រាជធានីភ្នំពេញ កើនឡើងដល់៩សង្កាត់ហើយ ស្មើនឹងជាង៩០០ខ្នង
រាជធានីភ្នំពេញ ៖ ទឹកស្ទឹងព្រែកត្នោតនៅតែបន្តហក់ឡើងខ្លាំង បើគិតត្រឹមវេលាព្រឹកថ្ងៃទី២០ ខែតុលា ឆ្នាំ២០២៣ ទឹកបានជន់លិចភូមិឋាន និងផ្ទះសម្បែងនៅក្នុងខណ្ឌដង្កោ រាជធានីភ្នំពេញ កើនឡើងដល់៩សង្កាត់ហើយ ស្មើនឹងជាង៩០០ខ្នង ដែលបានបង្កផលប៉ះពាល់ដល់ការរស់នៅរបស់មនុស្សជិត៤ពាន់នាក់ ។ ក្រៅពីនេះ ក៏នៅមានប៉ុស្តិ៍នគរបាល សាលារៀន មណ្ឌលសុខភាព វត្តអារាម សាលាសង្កាត់ ផ្លូវថ្នល់ និងដីស្រែ ក៏ត្រូវលិចលង់ផងដែរ ប៉ុន្តែពុំបណ្ដាលឲ្យមានអ្នកស្លា.ប់នៅក្នុងគ្រោះទឹកជំនន់នេះឡើយ។
យោងតាមរបាយការណ៍សង្ខេបរបស់អាជ្ញាធរខណ្ឌដង្កោ បានឲ្យដឹងថា ទឹកស្ទឹងនៅតែបន្តហក់ឡើងជាលំដាប់ ហើយទឹកបានជន់លិចកើនឡើងដល់៩សង្កាត់ ស្មើនឹង៤១ភូមិលិចផ្ទះផ្ទះចំនួន៩៣៣ខ្នង ប៉ះពាល់ម្ចាស់ផ្ទះចំនួន១,០០៥គ្រួសារ ដែលមានចំនួនមនុស្ស៣,៧២៦នាក់ ។ លិចផ្លូវចំនួន១០ខ្សែ, សាលារៀនចំនួន០២ទីតាំង, មណ្ឌលសុខភាពចំនួន០១ទីតាំង, វត្តចំនួន០៣, សាលាសង្កាត់ចំនួន០២ និងប៉ុស្តិ៍រដ្ឋបាលនគរបាលចំនួន០២ ។ សង្កាត់ចំនួន៩នោះ រួមមាន ៖ សង្កាត់ស្ពានថ្ម, សង្កាត់គងនយ, សង្កាត់សាក់សំពៅ, សង្កាត់ដង្កោ, សង្កាត់ព្រៃស, សង្កាត់ទៀន, សង្កាត់ជើងឯក, សង្កាត់ព្រែកកំពឹស និងសង្កាត់ក្រាំងពង្រ។
ដោយឡែកនៅស្ថានីយ៍ទំនប់៧មករា កម្ពស់ទឹកខាងមុខទ្វារ ៥,៨៥ម៉ែត្រ(ខ្ពស់ជាងទំនប់បង្ហៀរ+១,០៥ម៉ែត្រ) កម្ពស់ទឹកខាងក្រោយទ្វា៨,៦៨ម៉ែត្រ (កើនឡើង+០,៩៣ម៉ែត្រ ធៀបព្រឹកថ្ងៃទី១៩ ខែតុលា៧,៧៥ម៉ែត្រ) កម្ពស់ទឹកក្រោយទ្វា៧,០០ម ហើយកម្ពស់ទឹកមុខ និងក្រោយទ្វាខុសគ្នា០,១៧ម៉ែត្រ ។
សូមរម្លឹកផងដែរថា ក្រោយពីមានភ្លៀងធ្លាក់ខ្លាំងជាលំដាប់នៅឯភូមិសាស្ត្រខេត្តកំពង់ស្ពឺ បានធ្វើឲ្យបរិមាណទឹកនៅទីនោះឈានដល់កម្រិតការប្រកាសអាសន្ន ហើយដើម្បីបញ្ចៀសកុំឲ្យមានការលិចលង់នៅទីនោះ អាជ្ញាធរបានបើកទ្វារទឹកនៅតាមបណ្ដាស្ថានីយ៍ទំនប់ទឹកនានា ។ ដែលជាហេតុធ្វើឲ្យទឹកហូរចាក់តាមស្ទឹងព្រែកត្នោតមកប៉ែកខាងក្រោមបង្កឲ្យមានការជន់លិចតំបន់មួយចំនួនខាងលើរបស់ខណ្ឌដង្កោ រួមជាមួយភូមិសាស្ត្រខណ្ឌកំបូល រាជធានីភ្នំពេញ ស្រុកកណ្ដាលស្ទឹង និងក្រុងតាខ្មៅ ខេត្តកណ្ដាលផងដែរ។
ដោយឡែកប្រជាពលរដ្ឋដែលរស់នៅតំបន់ជន់លិចក្នុងខណ្ឌដង្កោ បាននិយាយថា ទឹកស្ទឹងព្រែកត្នោតបានចាប់ផ្ដើមឡើងរយៈពេលប្រមាណ៥ថ្ងៃកន្លងមកហើយ ប៉ុន្តែ៣ថ្ងៃចុងក្រោយនេះទឹកបានឡើងខ្លាំងនិងឡើងលឿន បណ្ដាលឲ្យជន់លិចភូមិឋាន និងផ្ទះសម្បែងពួកគាត់យ៉ាងឆាប់រហ័សគួរឲ្យព្រួយបារម្ភ។ ពួកគាត់មួយចំនួនបានចាកចេញពីផ្ទះតាំងពីព្រលប់ថ្ងៃទី១៨ ខែ និងខ្លះទៀតចាកចេញនៅវេលាជិតភ្លឺថ្ងៃទី១៩ ខែតុលា ហើយខ្លះបានទៅស្នាក់នៅផ្ទះបងប្អូនសាច់ញាតិ ស្ថិតនៅតាមភូមិនានាដែលទឹកអត់លិច និងខ្លះទៀតបានទៅកាន់ទីកន្លែងផ្សេងរៀងៗខ្លួន។
ប្រភពដដែលបានប្រាប់ឲ្យដឹងបន្តទៀតថា ជារៀងរាល់ឆ្នាំទឹកបើទឹកជន់តូច ហើយពុំមានភ្លៀងធ្លាក់បន្តនៅឯភូមិសាស្ត្រខេត្តកំពង់ស្ពឺទេ ទឹកអាចលិចផ្ទះសម្បែងពួកគាត់ត្រឹមតែរយៈពេល៣ទៅ៥ថ្ងៃនិងស្រកទៅវិញអស់ហើយ ប៉ុន្តែប្រសិនបើទឹកធំដូចកាលពីប៉ុន្មានឆ្នាំមុននៅតែមានភ្លៀងធ្លាក់នោះអាចលិចយូរច្រើនថ្ងៃជានេះ ។
ទោះបីជាបែបនេះក្ដី សម្រាប់ពួកគាត់ដែលជាអ្នករស់នៅជប់មាត់ស្ទឹងព្រែកត្នោតនេះបានចងចាំ និងមានបទពិសោធន៍អំពីទឹកអស់ទៅហើយ ព្រោះជាទៀងទាត់ឲ្យតែដល់ខែតុលា គឺទឹកស្ទឹងព្រែកត្នោតនេះ តែងតែត្រូវបានជន់ឡើង បណ្ដាលឲ្យលិចលង់ផ្ទះសម្បែងដីស្រែចំការ សាលារៀន មន្ទីរពេទ្យ សាលាសង្កាត់ និងទីវត្តអារាមមិនដែលខាននោះទេ ៕
ចែករំលែកព័តមាននេះ