ខេត្តបាត់ដំបង ៖ មេខ្លោងម្នាក់ដែលតែងលួច ឆក់យ៉ាងសកម្មបំផុតនៅក្នុងភូមិវត្តលៀប សង្កាត់ចំការសំរោង ក្រុងបាត់ដំបង កាលពីយប់ថ្ងៃទី១៧ ឧសភា ត្រូវចាប់ខ្លួនដោយនគរបាលព្រហ្មទណ្ឌខេត្ត ធ្វើឱ្យប្រជាពលរដ្ឋនៅក្នុងមូលដ្ឋានសាទរ ព្រោះតែជននេះ និងបក្សពួកដែលសុទ្ធតែជាសមាសភាពនៃអ្នកញៀនថ្នាំតែងតែបង្កអសន្តិសុខមិនឈប់ឈរស្ទើររាល់យប់នៅក្នុងមូលដ្ឋាន។
លោកមៀន ឡាយ នាយការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្តនិយាយថា កម្លាំងរបស់លោកបានឃាត់ខ្លួនមេខ្លោងសកម្មបំផុតខាងប្រព្រឹត្តអំពើចោរកម្ម បង្កអសន្តិសុខមិនឈប់នៅក្នុងមូលដ្ឋាន។ ជននេះឈ្មោះឌី សុភ័ក្រ ហៅម៉ាប់ អាយុ៣១ឆ្នាំ រស់នៅភូមិវត្តលៀប សង្កាត់ចំការសំរោង និងបក្សពួកប៉ុន្មាននាក់ទៀតបានធ្វើសកម្មភាពជាលើកចុងក្រោយកាលពីយប់ថ្ងៃទី១៤ ឧសភា ដោយចូលលួចយកកុំព្យូទ័រចល័ត១គ្រឿង និងសម្ភារមួយចំនួននៅផ្ទះរបស់ឈ្មោះជូន មុំ ភេទស្រី អាយុ៣៩ឆ្នាំ រស់នៅភូមិវត្តរំដួល សង្កាត់ចំការសំរោង។ ក្រោយពីទទួលពាក្យបណ្តឹង ទើបឈានដល់ការចាប់ខ្លួនមេខ្លោងរូបនេះតែម្តង។
ជនសង្ស័យឈ្មោះឌី សុភ័ក្រ ហៅម៉ាប់ និងបក្សពួកប៉ុន្មាននាក់ទៀតត្រូវអ្នកភូមិចាត់ទុកថា ជាក្រុមដ៏កំពូលក្នុងការប្រព្រឹត្តចោរកម្មនៅក្នុងមូលដ្ឋាន ហើយក៏ប្រើប្រាស់ថ្នាំញៀនដែរ នៅក្នុងភូមិវត្តលៀប ព្រោះនៅក្បែរវត្តលៀប ជាសម្បុកចែកចាយ និងប្រើប្រាស់គ្រឿងញៀនយ៉ាងវក់វីបំផុត។ រីឯចំណាត់ការរបស់អាជ្ញាធរ និងសមត្ថកិច្ចមូលដ្ឋានតិចតួចណាស់។
ឈ្មោះឌី សុភ័ក្រ ហៅម៉ាប់ និយាយថា ពួកគេមិនធ្លាប់ប្លន់ទេ ប៉ុន្តែសកម្មបំផុតគឺលួច និងឆក់តាមដងផ្លូវ។ គេមានបក្សពួក៣នាក់ គឺ២នាក់ទៀតឈ្មោះញ៉ាក់ និងឈ្មោះភ័ណ។ ពួកគេប្រើប្រាស់ថ្នាំញៀនប្រចាំ ហើយលួចមិនរើសមុខទេ ប៉ះអីយកហ្នឹង។ របស់ដែលលួចបានភាគច្រើនយកទៅលក់នៅផ្ទះទទួលទិញមួយក្បែរផ្សារវត្តលៀប មានម្ចាស់ឈ្មោះមី ភេទប្រុស គឺរបស់ស្អីក៏គេទិញដែរ។
អ្នកភូមិឱ្យដឹងថា កុំថាឡើយរបស់មានតម្លៃ សូម្បីតែតុ កៅអីក៏ក្រុមនេះលួចដែរ។ បើគេបាត់របស់ទៅរកមើលនៅក្នុងផ្ទះឈ្មោះមី ឃើញទាំងអស់ ដូចជាតែមម៉ូតូ ស្បែកជើង កុងទ័រម៉ូតូ ឬទូរស័ព្ទដៃជាដើម។ អ្នកភូមិស្វាគមន៍ចំពោះការបង្ក្រាបឈ្មោះឌី សុភ័ក្រ តែនៅបក្សពួកគេជាច្រើននាក់ទៀត។ អ្នកភូមិអំពាវនាវដល់សមត្ថកិច្ចឱ្យបង្ក្រាបក្រុមអ្នកលក់ថ្នាំញៀនក្បែររបងវត្តលៀប និងអ្នកប្រើប្រាស់ថ្នាំញៀនផង ព្រោះបច្ចុប្បន្នកក្រើកខ្លាំងណាស់ ជាពិសេសជួយពិនិត្យផ្ទះទទួលទិញ ឬទទួលបញ្ចាំរបស់របរដែលមានម្ចាស់ឈ្មោះមី នោះផង។ បើគ្មានអ្នកទទួលទិញ ប្រហែលជាកាត់បន្ថយការលួចខ្លះ។
ទាក់ទិននឹងការទទួលទិញផលចោរកម្មនេះ លោកមី ធ្លាប់ផ្តល់បទសម្ភាសន៍ជាមួយកោះសន្តិភាពកាលពីពេលមុនថា «អ្នកដែលយករបស់របរមកលក់ឱ្យលោក ពួកគេមិនដែលប្រាប់មុនថា ជារបស់លួចទេ ឬក៏មានបិទស្លាកថា របស់ចោរកម្មទេ ដូច្នេះលោកធ្វើម៉េចដឹងថា វាជារបស់ចោរ»។ លោកមៀន ឡាយ ប្រធានការិយាល័យព្រហ្មទណ្ឌកម្រិតស្រាលបញ្ជាក់ថា លោកកំពុងកសាងសំណុំរឿងបញ្ជូនឈ្មោះឌី សុភ័ក្រ ទៅតុលាការជាមួយវត្ថុតាងកុំព្យូទ័រចល័ត១គ្រឿង និងសម្ភារមួយចំនួនទៀត ដែលគេ និងបក្សពួកលួចបាន។ ទន្ទឹមនេះសមត្ថកិច្ចកំពុងបន្តតាមចាប់បក្សពួកគេប៉ុន្មាននាក់ទៀត៕
ចែករំលែកព័តមាននេះ