ខេត្តកំពង់ឆ្នាំង ៖ យុវជនម្នាក់បានលង់ទឹកស្លា.ប់ ខណៈចូលទៅពួនក្នុងពាងទឹកដែលគេដាក់ផ្កា.ប់ដើម្បីទ្រផ្ទះបណ្តែតទឹក។ ហេតុការណ៍កើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី១៧ មេសា នៅក្រោមផ្ទះជនរងគ្រោះ ស្ថិតនៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង
ខេត្តកំពង់ឆ្នាំង ៖ យុវជនម្នាក់បានលង់ទឹកស្លាប់ ខណៈចូលទៅពួនក្នុងពាងទឹកដែលគេដាក់ផ្កាប់ដើម្បីទ្រផ្ទះបណ្តែតទឹក។ ហេតុការណ៍កើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី១៧ មេសា នៅក្រោមផ្ទះជនរងគ្រោះ ស្ថិតនៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង។
ក្រុមគ្រួសារនិយាយថា យុវជនឈ្មោះវ៉ាត វឿន អាយុ២៩ឆ្នាំ ជាកូនកំព្រា ស្នាក់នៅជាមួយម្តាយមីងលើផ្ទះបណ្តែតទឹក បានចុះងូតទឹកជាមួយក្មេងៗនៅជិតខាង ហើយបាននាំគ្នាលេងបិទពួន។ វ៉ាត វឿន បានមុជទឹកទៅពួនក្រោមផ្ទះ លុះបាត់ប្រហែល១០នាទី ដោយមានការសង្ស័យក្រុមគ្រួសារបានចុះរាវរក បានប្រទះឃើញស្លាប់នៅក្នុងពាងដែលដាក់ផ្កាប់សម្រាប់ទ្រផ្ទះ។
ដោយមិនអស់ចិត្ត សង្ស័យថាវ៉ាត វឿន នៅរស់ ក្រុមគ្រួសារយកទៅសង្គ្រោះនៅមន្ទីរពេទ្យ តែត្រូវគ្រូពេទ្យប្រាប់ថា ស្លាប់ទៅហើយ។ លោករិន រដ្ឋា នាយរងប៉ុស្តិ៍នគរបាលផ្សារឆ្នាំងឱ្យដឹងថា ផ្ទះបណ្តែតទឹកខ្លះគេចងប្ញស្សីធ្វើជាក្បូន ហើយខ្លះទៀតយកពាងធំៗដាក់ផ្កាប់៦ទៅ៨ពាង រួចវ៉ៃខ្នោះឱ្យជាប់គ្នា ទើបសង់ផ្ទះពីលើ ដែលគេហៅថា ផ្ទះបណ្តែតទឹក។ មាត់ពាងដែលគេផ្កាប់ទ្រផ្ទះនោះវាបឺតខ្លាំងណាស់ ដូច្នេះហើយទើបវ៉ាត វឿន ចេញមិនរួចបណ្តាលឱ្យស្លាប់។ ម្យ៉ាងទៀតជនរងគ្រោះអាចខ្យល់ចាប់ លុះពេលចូលទៅជិតពាងត្រូវស្រូបចូលគ្មានកម្លាំងរើចេញមកវិញ បណ្តាលឱ្យថប់ដង្ហើមស្លាប់តែម្តង។
លោកបញ្ជាក់ថា ធ្លាប់មានករណីមនុស្សស្លាប់បែបនេះកន្លងមកផងដែរ ដូច្នេះសម្រាប់អ្នកឯទៀតគួរតែចៀសវាងកុំទៅក្បែរ ឬមុជទឹកជិតឱ្យសោះ៕
ចែករំលែកព័តមាននេះ