ខេត្តបាត់ដំបង ៖ ស្ទើរពេញមួយយប់ទៅហើយ ដែលកម្លាំងសមត្ថកិច្ចនិងក្រុមគ្រួសារបានប្រឹងប្រែងស្វែងរកកុមារាម្នាក់ដែលបានបាត់ខ្លួនក្នុងគ្រាទៅលេងតំបន់ទឹកធ្លាក់នៅស្ទឹងបរឡាង (សំឡូតចាស់) ក្នុងស្រុកសំឡូត ជាមួយក្រុមគ្រួសារ កាលពីវេលាម៉ោង៣០និង៣០នាទីរសៀលថ្ងៃទី១៦ តុលា ហើយរហូតមកទល់ពេលនេះនៅតែគ្មានដំណឹងពីកុមារារងគ្រោះនៅឡើយទេ ។ នេះបើតាមសមត្ថកិច្ចបានរាយការណ៍។
អធិការស្រុកសំឡូត លោក ម៉ែន រីម បានប្រាប់កោះសន្តិភាពថា ស្ទើរពេញមួយយប់ទៅហើយ ដែលកម្លាំងសមត្ថកិច្ច និងក្រុមគ្រួសារក្មេងរងគ្រោះបាននាំគ្នាចុះរាវរកក្នុងទឹកផង រុករកក្នុងព្រៃភ្នំផង រហូតមកដល់ត្រិមម៉ោង១០ព្រឹកថ្ងៃទី១៧ តុលា នេះ នៅតែគ្មានដំណឹងពីកុមារាដែលបាត់ខ្លួននោះនៅឡើយទេ។
លោកបានបញ្ជាក់ថា ពេលនេះ មន្ត្រីជំនាញរបស់លោកកំពុងសួរនាំបន្ថែមទៀតដល់ក្រុមគ្រួសារពីរឿងរ៉ាវដែលនាំឲ្យបាត់ខ្លួនកុមារានោះ ។ បើតាមក្រុមគ្រួសារកុមារារងគ្រោះបានឲ្យដឹងតាមរយៈបណ្ដាញសង្គមថា ក្មេងប្រុសដែលបាត់ខ្លួននោះឈ្មោះ អួន មេសា អាយុ០៦ឆ្នាំ រស់នៅខេត្តប៉ៃលិន ។ កុមារារងគ្រោះ បានទៅលេងតំបន់ទឹកធ្លាក់នៅសំឡូតចាស់ជាមួយក្រុមគ្រួសារ តែនៅរសៀលថ្ងៃកើតហេតុ សុខៗស្រាប់តែបាត់មិនឃើញនៅកន្លែងលេងទឹក ។
ក្រោយពីដឹងថាបាត់កូន ភ្លាមៗនោះ អាណាព្យាបាល និងបងប្អូនបាននាំគ្នាស្ទុះស្ទារដើររកគ្រប់ទីកន្លែង ថែមទាំងចុះរាវរកក្នុងទឹកផង រុករកក្នុងព្រៃតំបន់នោះផង តែរកមិនឃើញឡើយ ទើបផ្អើលឆោឡោកាន់ខ្លាំង ។ ប្រភពព័ត៌មានពីកន្លែងហេតុ ដំបូងកុមារារងគ្រោះបានចុះលេងទឹកដែរ តែមិនបានលេងយូរទេក៏ឡើងវិញ ។ ម្យ៉ាងទៀត នៅទឹកនៅកន្លែងលេងនោះក៏មិនជ្រៅប៉ុន្មាន ហើយក៏មិនធំដុំដែរ ។ ដូច្នេះបើតាមការពិនិត្យ ក្មេងប្រុសនោះទំនងមិនលង់ទឹកទេ អាចច្រឡំឡើងជិះរថយន្តទៅជាមួយគេផងក៏មិនដឹង ។
លោក ម៉ែន រីម អធិការស្រុកសំឡូត ក៏យល់ឃើញបែបនេះដែរ ដោយនិយាយថា ស្ទើរពេលមួយយប់ កម្លាំងសមត្ថកិច្ចនិងក្រុមគ្រួសារចុះរាវរកក្នុងទឹកផងរុករកក្នុងព្រៃផង។ ដូច្នេះ បើក្មេងប្រុសនោះលង់ទឹក នឹងត្រូវរកឃើញហើយ ព្រោះមនុស្សច្រើនណាស់ដែលបានជួយចុះរាវរកក្នុងទឹក ។
លោកអធិការបានសន្និដ្ឋានបឋមថា ក្មេងប្រុសនោះទំនងឡើងជិះរថយន្តច្រឡំទៅជាមួយគេហើយ ព្រោះស្វែងរកខ្វែងដៃខ្វែងជើងនៅគ្រប់ទិសទីនៅតំបន់នោះហើយ នៅតែគ្មានដំណឹង ។ ប៉ុន្តែយ៉ាងណា ពេលនេះ ក្រុមគ្រួសារ និងសមត្ថកិច្ចរបស់លោកកំពុងស្វែងរកនៅឡើយទេ ។
មានព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ