អតីតមន្ត្រីនគរបាលអន្តោប្រវេសន៍១រូបស្លា.ប់ក្នុងបន្ទប់ទឹករហូតហើមស្អុ.យ ទើបកូនដឹង
- ភ្នំពេញ
រាជធានីភ្នំពេញ ៖ បុរសចំណាស់ម្នាក់អតីតជានគរបាលអន្តោប្រវេសន៍ បច្ចុប្បន្នបានចូលនិវត្តន៍ទៅ
រាជធានីភ្នំពេញ ៖ បុរសចំណាស់ម្នាក់អតីតជានគរបាលអន្តោប្រវេសន៍ បច្ចុប្បន្នបានចូលនិវត្តន៍ទៅហើយ គាត់បានរស់នៅក្នុងផ្ទះមួយតែម្នាក់ឯង ចំណែកឯប្រពន្ធនិងកូនៗរស់នៅផ្ទះផ្សេងៗ ហើយសង្ស័យខ្យល់គ ដួលស្លា.ប់ក្នុងបន្ទប់ទឹកអស់រយៈពេល៣ថ្ងៃរហូតហើមស្អុយទើបត្រូវបានកូនៗដឹង។
ហេតុការណ៍ខាងលើនោះបានបង្កឲ្យមានការភ្ញាក់ផ្អើលកាលពីវេលាម៉ោង១០ព្រឹកថ្ងៃទី១៩ ខែតុលា ឆ្នាំ២០២៣នេះ នៅក្នុងភូមិចោមចៅ៣ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
បុរសរងគ្រោះខាងលើឈ្មោះ ហួរ ណារ៉ុង អាយុ៦៣ឆ្នាំ អតីតជាមន្ត្រីនគរបាលអន្តោប្រវេសន៍ តែបច្ចុប្បន្នបានចូលនិវត្តន៍ហើយ គាត់រស់នៅក្នុងផ្ទះកើតហេតុនោះតែម្នាក់ឯងប៉ុណ្ណោះ ដោយសាកូនប្រុសរបស់គាត់ម្នាក់រស់នៅឯខណ្ឌច្បារអំពៅ ចំណែកប្រពន្ធ និងកូន២នាក់ទៀត រស់នៅផ្ទះឯខេត្តសៀមរាប ទើបពេលគាត់មានគ្រោះថ្នាក់កើតឡើងពុំមានអ្នកដឹងភ្លាមៗឡើយ។
កូនប្រុសរបស់បុរសរងគ្រោះម្នាក់បានប្រាប់ឲ្យនគរបាលដឹងថា កន្លងមកដោយសារតែឃើញឪពុកចាស់ហើយ រស់នៅតែម្នាក់ឯងបែបនេះធ្វើឲ្យកូនៗមានការព្រួយបារម្ភខ្លាំងណាស់ ហើយខ្លួនក៏ធ្លាប់ប្រាប់ឲ្យលោកឪពុកលក់ផ្ទះនឹងទៅ ហើយទៅរស់នៅជាមួយប្រពន្ធនិងកូនវិញ ។ ប៉ុន្តែលោកឪពុកមិនព្រមឡើយដោយគាត់ប្រាប់ថាស្ដាយផ្ទះដែលធ្លាប់រស់នៅច្រើនឆ្នាំមកហើយ មិនចង់លក់ទេ សុខចិត្តស៊ូទ្រាំរស់នៅម្នាក់ឯង ហើយពេលលោកឪពុកមិនយល់ព្រមលក់បែបនេះ កូនៗក៏ពុំដឹងថាត្រូវធ្វើបែបណាទេ មានតែតាមចិត្តគាត់ទៅចុះ។
ប្រភពដដែលនេះបានប្រាប់ឲ្យដឹងបន្តទៀតថា នៅមុនពេលកើតហេតុ លោកឪពុកបានទៅលេងផ្ទះឯខេត្តសៀមរាបប៉ុន្មានថ្ងៃដែរ ហើយទើបត្រឡប់មកផ្ទះកើតហេតុបានរយៈពេល៤ថ្ងៃប៉ុណ្ណោះ។ ដោយឡែកកាលពីថ្ងៃទី១៦ ខែតុលា ឆ្នាំ២០២៣ កូនៗបាននាំគ្នារទូស័ព្ទសាកសួរសុខទុក្ខដែរ ប៉ុន្តែខលចូលលោកឪពុកមិនលើកសោះ ហើយដោយជាប់រវល់ធ្វើការងារផងនិងមិនចាប់អារម្មណ៍ថាលោកឪពុកមានគ្រោះថ្នាក់ផង ទើបមិនបានទៅមើលផ្ទាល់ឡើយ។ លុះមកដល់ព្រឹកថ្ងៃទី១៩ ខែតុលា បានទូរស័ព្ទទៅកាន់លោកឪពុកជាថ្មីនៅតែមិនលើកទៀត ទើបទៅមើលដល់ផ្ទះខណៈនោះឃើញផ្ទះជាន់ផ្ទាល់ដីចាក់សោពីក្នុង ចំណែកទ្វារជាន់លើចំហរ ក៏សុំផ្ទះអ្នកជិតខាងលើឆ្លងចូលទៅមើល ស្រាប់តែធុំក្លិនស្អុយ ហើយប្រទះឃើញលោកឪពុកដេកស្លា.ប់ក្នុងបន្ទប់ទឹកហើមស្អុយបាត់ទៅហើយ។
ក្រោយពេលកើតហេតុ កូនៗបានរាយការណ៍ជូននគរបាលប៉ុស្តិ៍ចោមចៅទី២ ឲ្យចុះទៅពិនិត្យមើលហើយនគរបាលប៉ុស្តិ៍ខាងលើបានរាយការណ៍បន្តទៅកាន់នគរបាលការិយាល័យបច្ចកទេសវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញចុះទៅធ្វើការពិនិត្យកោសល្យវិច័យ ហើយលទ្ធផលនគរបាលរកឃើញថា បុរសរងគ្រោះរូបនេះស្លា.ប់ដោយសារគាំងបេះដូង រួចប្រគល់ស.ពជូនក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ