ខេត្តកំពត ៖ សម្តេចតេជោហ៊ុន សែន នាយករដ្ឋមន្ត្រីបានលើកឡើងថា បណ្តាប្រទេសមួយចំនួនគេថា កម្ពុជា-ថៃជាមិត្តនឹងគ្នា ប៉ុន្តែគេភ្លេចគិតថា មិត្តវាមានអាក្រក់ មានល្អ ដូច្នេះមិនចាំបាច់និយាយសម្រួលឱ្យថៃទេ អ្នកណាអាក្រក់ អ្នកណាល្អ គេបានដឹងអស់ទៅហើយ...ជាធម្មតាទេ ប្រទេសដែលឈ្លានពានគេ គឺវាត្រូវតែអាក្រក់អញ្ចឹងហើយ គេមើលឃើញបែបហ្នឹង។
សម្តេចតេជោនាយករដ្ឋមន្ត្រីបានសង្កត់ធ្ងន់ថា បណ្តាប្រទេសមួយចំនួននេះមានពាក់ព័ន្ធពាណិជ្ជកម្មជាមួយថៃ គេមិនសូវហ៊ានថា អ្វីពីការរំលោភបំពានរបស់ថៃមកលើកកម្ពុជាទេ គេបែរជានិយាយថា ជាមិត្តភក្តិ បើថៃចាត់ទុកកម្ពុជាជាមិត្តភក្តិ មិនមែនថៃបង្កជម្លោះឈ្លានពានកម្ពុជា ដោយកម្លាំងយោធា និងចុងអាវុធនោះទេ គឺត្រូវដោះស្រាយតាមផ្លូវច្បាប់ទាំងច្បាប់ ក្នុងប្រទេស និងច្បាប់អន្តរជាតិ ។
សម្តេចតេជោនាយករដ្ឋមន្ត្រិបានលើកឡើងបែបនេះក្នុងឱកាសអញ្ជើញជាអធិបតីដឹកនាំមន្ត្រីជាន់ខ្ពស់ មន្ត្រីស្ថាប័នពាក់ព័ន្ធ និងដៃគូអភិវឌ្ឍន៍ជាច្រើននាក់សម្ពោធបើកការដ្ឋានស្ថាបនាផ្លូវជាតិលេខ៤១ មានប្រវែង៩៥,២៨គីឡូម៉ែត្រ ចាប់ពីថ្នល់ទទឹងចំណុចប្រសព្វលើផ្លូវជាតិលេខ៤ ខេត្តកណ្តាល ដល់ល្អាងចំណុចប្រសព្វលើផ្លូវជាតិលេខ៣ ស្រុកដងទង់ ខេត្តកំពត នាវេលាម៉ោង៨ព្រឹកថ្ងៃទី១៨ ឧសភា ២០១១ ។
ផ្លូវជាតិលេខ៤១ ដែលបើកការស្ថាបនានេះគឺធ្វើឡើងក្រោមប្រាក់កម្ចីសម្បទានរបស់សាធារណរដ្ឋប្រជាមានិតចិន និងថវិកាបដិភាគរបស់រដ្ឋាភិបាលដោយសាងសង់ឡើងទៅតាមស្តង់ដាកម្រិតទី៣ នៃគំរូរចនាប្លង់សំណង់របស់សាធារណរដ្ឋប្រជាមានិតចិន ជាប្រភេទផ្លូវក្រាលថ្មចាក់កៅស៊ូពីរជាន់ DBST គ្រោងចំណាយថវិកាសរុបចំនួន៤៦.២៥០.០០០ដុល្លារអាមេរិក និងត្រូវប្រើរយៈពេលសាងសង់៤០ខែដែលគ្រោងនឹងបញ្ចប់នៅឆ្នាំ២០១៤។
សម្តេចតេជោបានបញ្ជាក់ថា ថៃ បើវ៉ៃកម្ពុជាបានហើយ គឺគេក៏អាចវ៉ៃឡាវ, មីយ៉ាន់ម៉ា និងម៉ាឡេស៊ី បានទៀតដែរ ពីព្រោះថា ថៃធ្លាប់ឈ្លោះជាមួយឡាវ, មីយ៉ាន់ម៉ា និងម៉ាឡេស៊ី ដោះស្រាយមិនទាន់ចប់នៅឡើយទេ ៕
ចែករំលែកព័តមាននេះ