ទីតាំងរុករករ៉ែមាសប្រមាណជា១០០កន្លែងកំពុងធ្វើសកម្មភាពដោយប្រើឧបករណ៍បូមទឹកបា.ញ់ទម្លុះដី ដើម្បីប្រមូលកម្ទេចរ៉ែមាស ស្ថិតនៅក្នុងដែនជម្រកសត្វព្រៃឡង់ ចំណុចភូមិ
ខេត្តក្រចេះ ៖ ទីតាំងរុករករ៉ែមាសប្រមាណជា១០០កន្លែងកំពុងធ្វើសកម្មភាពដោយប្រើឧបករណ៍បូមទឹកបា.ញ់ទម្លុះដី ដើម្បីប្រមូលកម្ទេចរ៉ែមាស ស្ថិតនៅក្នុងដែនជម្រកសត្វព្រៃឡង់ ចំណុចភូមិឧបសម្ព័ន្ធសោមឌីប៉ូ ឃុំកំពង់ចាម ស្រុកសំបូរ ខេត្តក្រចេះ ។ ករណីនេះ ត្រូវបានគេរាយការណ៍ថា ជាទ្រង់ទ្រាយលក្ខណៈគ្រួសារ ទំនងមិនមានច្បាប់ធ្វើអាជីវកម្មនោះទេ។
បើតាមប្រភពព័ត៌មាន បានឱ្យដឹងថា ក្រោយការរុករកប្រទះឃើញនៅតំបន់ខាងលើ មានប្រភពរ៉ែកម្ទេចមាសភ្លាម ក៏ចាប់ផ្តើមផ្អើលពីមួយទៅមួយ ហើយកែច្នៃឧបករណ៍បូមទឹកបា.ញ់ទម្លុះដី ដែលភាសាអ្នករុករករ៉ែមាសហៅថា (ប៉ាញ់ឈិត) ។ ឧបករណ៍នេះ អាចបា.ញ់ទម្លុះដី ក្នុងមួយម៉ោងចន្លោះចាប់ពី៥ម៉ែត្រទៅជិត១០ម៉ែត្រគូបដីឯណោះ។ ហើយក្រោយពីបូមទឹកបា.ញ់ទម្លុះដីឱ្យសុះរលាយទៅជាកំហាប់ និងប្រមូលផ្តុំនៅកណ្តាលរណ្តៅ ទើបគេប្រមូលយកកំហាប់កណ្តាលរណ្តៅនោះ បន្តទៅដាក់លើបន្ទះក្តារជំរាលមួយ ដែលគេហៅថា (ចាក់ ទ) ជាកំណាក់កាលចុងក្រោយ នៃការរ៉ែងទទួលផលកម្ទេចរ៉ែមាស។
ប្រភពដដែលបន្តថា ការផ្ទុះកក្រើក ដោយមានសកម្មភាពប្រើប្រាស់ឧបករណ៍បូមទឹកបា.ញ់ទម្លុះដីរុករករ៉ែមាសនោះ គឺមានការសូកប៉ាន់ជួលផ្ទៃដីតាមទំហំតូច ឬធំ ដោយមានលោកមេភូមិឧបសម្ព័ន្ធសោមឌីប៉ូ ម្នាក់ ដែលជាអ្នកចាត់ចែងទទួលខុសត្រូវក្នុងតំបន់នោះ ។
ប្រភពដដែលបន្តថា បើទោះជាការប្រើប្រាស់ឧបករណ៍កែច្នៃលក្ខណៈគ្រួសារ មួយរណ្ដៅត្រូវចំណាយលុយ៦០ម៉ឺនរៀល បង់ឲ្យទៅមន្ត្រីបរិស្ថានដែលស្ថិតនៅក្រោមការគ្រប់គ្រងរបស់លោក សាំង សាខន នាយកដែនជម្រកសត្វព្រៃ ព្រៃឡង់ ហើយតម្រូវឲ្យមានការចុះបញ្ជីឈ្មោះត្រឹមត្រូវ និងបង់លុយជាមុនសិន ទើបអនុញ្ញាតឲ្យចូលការរុករករ៉ែមាសបាន។ ប្រសិនបើមិនបានចុះបញ្ជីឈ្មោះត្រឹមត្រូវពីអាជ្ញាធរភូមិទេ មន្ត្រីបរិស្ថាន និងដើរពិនិត្យ ហើយចាប់បង្ក្រាបយកម៉ាស៊ីនបូមទឹក រួមនឹងឧបករណ៍ប្រើប្រាស់ទាំងនោះទៅដុតកម្ទេចចោលតែម្ដង។ ចំពោះការបង់លុយវិញ គឺម្ចាស់រណ្ដៅនីមួយៗត្រូវផ្ដល់លុយតាមរយៈលោក រិទ្ធ ដែលជាមេភូមិឧបសម្ព័ន្ធសោមដេប៉ូ ដើម្បីចាត់ចែងរៀបចំលើកិច្ចការងាររត់ការផ្សេងៗ។
ទាក់ទិនករណីខាងលើនេះ សារព័ត៌មានមិនអាចទំនាក់ទំនងសុំការបញ្ជាក់ពីលោក សាំង សាខន នាយកដែនជម្រកសត្វព្រៃឡង់ បានទេ ដោយសារទូរស័ព្ទខលចូលច្រើនដង ប៉ុន្តែមិនមានអ្នកទទួល។
ដោយឡែក លោក រិទ្ធ មេភូមិឧបសម្ព័ន្ធសោមឌីប៉ូ ឃុំកំពង់ចាម ក៏មិនអាចទំនាក់ទំនងបានដែរ ដោយទូរស័ព្ទចូលមិនលើកហើយ ចុចផ្តាច់បិទការទំនាក់ទំនងបានបន្តទៀត។
រីឯលោក ឈិត ណន មេឃុំកំពង់ចាម បានលើកឡើងថា «ចំពោះរឿងនេះ លោកមិនបានដឹងទេ ដោយសារតំបន់នោះស្ថិតនៅក្នុងភូមិឧបសម្ព័ន្ធ មេភូមិអត់ឃើញរាយការណ៍មក។ ណាមួយតំបន់នោះ វាស្ថិតនៅក្នុងព្រៃ មិនសូវបានទៅដល់»។
ក្រុមអ្នកប្រកបរបរនេះ បានរអ៊ូរទាំថា «ការងារនេះ ត្រូវការពេលវេលាចន្លោះចាប់ពី៥ទៅ៧ថ្ងៃ ទើបបានចម្រាញ់ចេញជាមាសម្ដង ហើយលទ្ធផលបានតិចតួចមិនច្រើននោះទេ តែត្រូវចំណាយទៅលើប្រេងសាំង ម្ហូបអាហារប្រចាំថ្ងៃ និងបង់ឲ្យទៅសមត្ថកិច្ច សឹងមិនគ្រប់ផង»។
ការសម្រុកចូលដែនជម្រកសត្វព្រៃ ព្រៃឡង់ ដើម្បីធ្វើជាជីវកម្មរ៉ែមាសខុសច្បាប់ខាងលើ លោក ឆាយ ដួងសាវុធ ប្រធានមន្ទីរបរិស្ថានខេត្តក្រចេះ បានប្រាប់សារព័ត៌មានឲ្យដឹងថា «រឿងនេះ ខ្ញុំទើបតែបានដឹងនៅថ្ងៃទី៦ ថ្មីៗនេះទេ។ ចាំមើលខ្ញុំសួរទៅនាយកដែនជម្រកសិន ហើយសូមអរគុណច្រើនដែលអ្នកសារព័ត៌មាន បានសួរគ្នាមុននឹងធ្វើការផ្សព្វផ្សាយ តែចំពោះបញ្ហានេះ យើងនឹងចុះទៅធ្វើការបង្ក្រាបដោយគ្មានការលើកលែងទេ នឹងបញ្ជាកម្លាំងឲ្យទៅអនុវត្តច្បាប់តែម្ដង»៕
ចែករំលែកព័តមាននេះ