ប្រទេសប៉ាគីស្ថានបានប្រកាសកាលពីថ្ងៃទី១៧ ឧសភា ពីការចាប់ខ្លួនមេបញ្ជាការសំខាន់ម្នាក់របស់អាល់កៃដា សញ្ជាតិយេម៉ែន លោកម៉ូហាម៉េដអាលី កាស៊ីម យ៉ាគូប ហៅអាប៊ូសូហៃអ៊ីប អាល់ម៉ាកគី នៅទីក្រុងការ៉ាជីភាគខាងត្បូងប្រទេស។ ក៏ប៉ុន្តែបុរសរូបនេះពុំមានឈ្មោះក្នុងបញ្ជីសមាជិកអាល់កៃដាដែលតាមរកចាប់ខ្លួនបំផុតលើពិភពលោកឡើយ ហើយកងទ័ពប៉ាគីស្ថានចាត់ទុកការចាប់ខ្លួនជននេះថា ជាព្រឹត្តិការណ៍ចម្បងមួយដើម្បីតាមកម្ទេចបណ្តាញអាល់កៃដាដែលធ្វើប្រតិបត្តិការក្នុងតំបន់ ។
ក្នុងសេចក្តីប្រកាសមួយមានចំណងជើងថា មេបញ្ជាការអាល់កៃដាសំខាន់ម្នាក់ត្រូវចាប់ខ្លួននៅការ៉ាជី កងទ័ពប៉ាគីស្ថានអះអាងថា យ៉ាគូប គឺជាសមាជិកសកម្ម និងសំខាន់មួយរូបរបស់បណ្តាញអាល់កៃដារបស់អូសាម៉ា ប៊ីនឡាដេន ដែលត្រូវសម្លាប់កាលពី២សប្តាហ៍មុនដោយកងកុំម៉ង់ដូអាេមរិកមួយកងនៅភាគខាងជើងប៉ាគីស្ថាន ។ ជននេះត្រូវចាប់ខ្លួនដោយពួកភ្នាក់ងារសន្តិសុខនៅក្រុងការ៉ាជី ។ យោងតាមលទ្ធផលនៃការស៊ើបអង្កេតដំបូងទាំងឡាយថា អាល់ម៉ាកគី ជាជនជាតិយេម៉ែន ហើយធ្វើការក្រោមបញ្ជាដោយផ្ទាល់របស់បណ្តាប្រមុខអាល់កៃដានៅតាមបណ្តោយព្រំដែនរវាងប៉ាគីស្ថាន និងអាហ្វហ្គានីស្ថាន ។
ការប្រកាសពីការចាប់ខ្លួននេះកើតមានក្រោយពីប៉ាគីស្ថាន និងសហរដ្ឋអាេមរិកសម្តែងពីឆន្ទៈស្តារឡើងវិញនូវទំនុកចិត្តគ្នារវាងសម្ព័ន្ធមិត្តទាំង២ បន្ទាប់ពីវិបត្តិដែលកើតដោយសារការសម្លាប់ប៊ីនឡាដេន ក្នុងប្រតិបត្តិការសម្ងាត់មួយរបស់អាេមរិក ក៏ប៉ុន្តែក្នុងទីក្រុងមួយស្ថិតនៅក្បែររដ្ឋធានីប៉ាគីស្ថាន។ ប្រទេសទាំង២សន្យាថា ចាប់ពីពេលនេះទៅនឹងធ្វើការរួមគ្នា ក្នុងករណីមានសកម្មភាពប្រឆាំងរាល់គោលដៅសំខាន់នៅប៉ាគីស្ថាន ៕
ចែករំលែកព័តមាននេះ