ខេត្តកោះកុង ៖ បន្ទាប់ពីមានសភាពការណ៍តានតឹងគួរឱ្យកត់សម្គាល់នៅតាមខ្សែបន្ទាត់ព្រំដែនខេត្តកោះកុង កម្ពុជា និងខេត្តត្រាត របស់សៀម ជាពិសេសនៅចំណុចលេខ៣២៩ ដែលទាហានឈុតខ្មៅសៀមបានមកបោះទីតាំងរំលោ.ភលើតំបន់ស តាំងពីព្រឹកថ្ងៃទី១៤ ឧសភា រហូតមក ហើយកងទ័ពកម្ពុជាបានធ្វើការទាក់ទងយ៉ាងអត់ធ្មត់ជាច្រើនថ្ងៃ
ខេត្តកោះកុង ៖ បន្ទាប់ពីមានសភាពការណ៍តានតឹងគួរឱ្យកត់សម្គាល់នៅតាមខ្សែបន្ទាត់ព្រំដែនខេត្តកោះកុង កម្ពុជា និងខេត្តត្រាត របស់សៀម ជាពិសេសនៅចំណុចលេខ៣២៩ ដែលទាហានឈុតខ្មៅសៀមបានមកបោះទីតាំងរំលោភលើតំបន់ស តាំងពីព្រឹកថ្ងៃទី១៤ ឧសភា រហូតមក ហើយកងទ័ពកម្ពុជាបានធ្វើការទាក់ទងយ៉ាងអត់ធ្មត់ជាច្រើនថ្ងៃ ទើបនៅព្រឹកថ្ងៃទី១៧ ឧសភា ក៏មានជំនួបពិសេសមួយរវាងមេបញ្ជាការរងយោធភូមិភាគ៣ របស់កម្ពុជា និងឧត្តមសេនីយ៍ត្រី ចំលង វ៉ាងដាន មេបញ្ជាការរងកងទ័ពជើងទឹក ច័ន្ទបុរី-ត្រាត នៅក្នុងទីបញ្ជាការ ឆ.ក៣ (ចំណុចខៅឡាន) ជាទីបញ្ជាការធំរបស់ទាហានឈុតខ្មៅសៀម ។
ក្នុងជំនួបអស់រយៈពេលជាងមួយម៉ោង តាមសេចក្តីរាយការណ៍បានឱ្យដឹងថា មេបញ្ជាការទាំង២ភាគីបានឯកភាពជាគោលការណ៍ ២ចំណុច ១-ព្រមព្រៀងដកកងទ័ពទាំងសងខាងចាប់ពីរសៀលថ្ងៃទី១៧ ឧសភា ដោយរក្សាទុកកងកម្លាំងម្ខាងតែ២០នាក់ប៉ុណ្ណោះ ២-ភាគីទាំងសងខាងត្រូវលុបលេណដ្ឋានដែលបានជីករួចហើយទាំងអស់។ ប៉ុន្តែការលុបលេណដ្ឋាន គឺជាភារកិច្ចរបស់កងកម្លាំងដែលឈរជើង២០នាក់នេះឯង ។
តាមប្រភពព័ត៌មានបានរាយការណ៍ឱ្យដឹងថា ចំពោះកិច្ចព្រមព្រៀងក្នុងជំនួបថ្ងៃទី១៧ ឧសភា ទាំង២ចំណុចខាងលើ ត្រូវបានត្រួតពិនិត្យជាថ្មីនៅថ្ងៃទី២០ ឧសភា ខាងមុខនេះម្តងទៀត បើភាគីទាំង២ បានអនុវត្តដោយការឯកភាពរួចហើយ ភាគីទាំង២នឹងលើកយកការឯកភាពជាថ្មីមួយចំណុចទៀត គឺត្រូវដកកម្លាំងចេញបន្ថែមទៀតដោយរក្សាទុកតែ៥នាក់ប៉ុណ្ណោះសម្រាប់ភាគីនីមួយៗ ហើយថយចេញពីចំណុចសចម្ងាយ៣០០ម៉ែត្រដូចគ្នា ។
ប្រភពដដែលបានរាយការណ៍ថា ទោះបីជាយ៉ាងណាជំនួបខាងលើនេះបានធ្វើឱ្យសភាពការណ៍បានធូរស្រាល ហើយបន្ទាប់ពីការជួបពិភាក្សារួចភាគីទាំង២ក៏បានហូបបាយសាមគ្គីដោយភាពកក់ក្តៅ ។
គួររំលឹកថា កាលពីរសៀលថ្ងៃទី១៦ ឧសភា ទាហានឈុតខ្មៅសៀមដែលមានចំនួនពី៣០ទៅ៤០នាក់ប្រដាប់ដោយអាវុធគ្រប់ដៃបានធ្វើការបំពានដោយចល័តកម្លាំងមកបោះទីតាំងនៅកៀកនឹងទីតាំងឈរជើងរបស់កងទ័ពកម្ពុជា ដែលទង្វើនេះជាការរំលោភបំពានដល់តំបន់សដែលខណ្ឌចែករវាងប្រទេសទាំង២។
ដោយសារតែមានការចល័តកម្លាំងចូលពីសំណាក់ទាហានសៀមនេះ ការប្រឈមមុខដាក់គ្នាបានកើតឡើងរវាងកងទ័ពកម្ពុជា និងសៀម ដែលឈរជើងនៅចំណុចភ្នំតាមីន ព្រំដែនកម្ពុជា-សៀម ស្ថិតក្នុងភូមិសាស្ត្រ ឃុំប៉ាក់ខ្លង ស្រុកមណ្ឌលសីមា ។ ប្រភពខាងលើបានឱ្យដឹងថា ការប្រឈមមុខនេះបានកើតឡើងតាំងពីវេលាម៉ោងប្រមាណ១១និង៣០នាទី ថ្ងៃទី១៤ ឧសភាកន្លងទៅនេះ បន្ទាប់ពីទាហានសៀមប្រដាប់ដោយអាវុធគ្រប់ដៃទាំងនោះបានមកបោះទីតាំងនៅកៀកនឹងចំណុចឈរជើងរបស់កងទ័ពកម្ពុជា ក្រោយពីបានដកថយមួយរយៈខ្លី កាលពីដើមខែឧសភា កន្លងទៅ។ លុះមកដល់ថ្ងៃទី១៦ ឧសភា ទាហានសៀមក៏បានបិទច្រករបៀងនៅតំបន់ខាវវង្ស មិនឱ្យប្រជាពលរដ្ឋខ្មែរធ្វើដំណើរឆ្លងកាត់ដូចធម្មតា ដែលសកម្មភាពនេះបានបង្កជាបញ្ហាស្មុគស្មាញ។ តែទោះបីជាយ៉ាងណា កងទ័ពកម្ពុជា ដែលកំពុងឈរជើងនៅចំណុចនោះបានប្រកាន់ភាពអត់ធ្មត់អនុវត្តបានយ៉ាងម៉ឹងម៉ាត់ក្នុងជំហរការពារត្រឹមទីតាំងរបស់ខ្លួន ។
មន្ត្រីយោធាកម្ពុជាឱ្យដឹងថា កាលពីថ្ងៃទី២៦ មេសា កន្លងទៅ ទាហានសៀមនៅចំណុចខាងលើ ដែលមានគ្នាប្រមាណពី២០ទៅ២៥នាក់ ធ្លាប់បានរំកិលមកកៀកនឹងទីតាំងឈរជើងរបស់កងទ័ពកម្ពុជានៅចំណុចភ្នំតាមីននេះម្តងហើយ ហើយនៅថ្ងៃទី១ ឧសភា ទាហានសៀមបានព្រមព្រៀងដកថយទៅវិញ បន្ទាប់ពីមានការជួបគ្នារវាងលោកឧត្តមសេនីយ៍ត្រី យន្ត មីន មេបញ្ជាការតំបន់ប្រតិបត្តិការសឹករងកោះកុង និងមេបញ្ជាការរងទ័ពជើងទឹកចន្ទបុរី-ត្រាតរបស់សៀម៕ ឃុនឆាង
ចែករំលែកព័តមាននេះ