ហាមឡានដឹកទំនិញធំៗមិនឱ្យឆ្លងកាត់ផ្លូវខេត្តលេខ៣១៣ (ទំនប់បង្ហៀរបឹងស្នេហ៍) ខណៈផ្លូវនេះត្រូវទឹកជន់លិច
- កណ្តាល
ខេត្តព្រៃវែង ៖ ស្របពេលដែលទឹកជំនន់កំពុងចាប់ផ្តើមកើនឡើងបន្តិចម្តងៗ ប៉ុន្មានថ្ងៃចុងក្រោយ
ខេត្តព្រៃវែង ៖ ស្របពេលដែលទឹកជំនន់កំពុងចាប់ផ្តើមកើនឡើងបន្តិចម្តងៗ ប៉ុន្មានថ្ងៃចុងក្រោយនេះក៏មានភ្លៀងធ្លាក់ជាហូរហែរថែមទៀត ទើបធ្វើអោយកំពស់ទឹកហក់ឡើងលឿន រហូតជន់លិចតាមវាលបឹង និងវាលទំនាបនានា ជាមួយគ្នានោះដែរ កំណាត់ផ្លូវខេត្តលេខ៣១៣ ត្រង់ចំណុចទំនប់បង្ហៀរបឹងស្នេហ៍ ក៏ត្រូវបានទឹកជន់លិចផងដែរ ដែលបញ្ហានេះ វាមិនត្រឹមតែបង្កការលំបាកដល់ការធ្វើដំណើររបស់ប្រជាពលរដ្ឋនោះទេ ប៉ុន្តែក៏ប្រឈមនូវគ្រោះថ្នាក់ផងដែរ។
លោក អ៊ុន សុធា ប្រធានមន្ទីរសាធារណៈការ និងដឹកជញ្ជូនខេត្តព្រៃវែង បានអោយដឹងថា ដើម្បីការពារកុំអោយមានគ្រោះថ្នាក់ជាយថាហេតុ ទៅលើបងប្អូនអ្នកដំណើរពេលឆ្លងកាត់តាមកំណាត់ផ្លូវនេះ នៅថ្ងៃទី៤ តុលា មន្ទីរសាធារណៈការខេត្ត បានចេញសេចក្តីជូនដំណឹងមួយ ដោយបង្ហោះនៅលើផេកហ្វេសប៊ុករបស់មន្ទីរ ដោយហាមឃាត់រថយន្តដឹកទំនិញធំៗ មិនអោយចរាចរណ៍ឆ្លងកាត់តាមកំណាត់ផ្លូវលេខ៣១៣នេះទៀតទេ ដោយបានដាក់ផែនទីបង្ហាញ តម្រូវអោយរថយន្តធំៗទាំងអស់ ត្រូវបើកវៀងតាមទីប្រជុំជនអ្នកលឿងជាបណ្តោះអាសន្នសិន រហូតដល់មានការជូនដំណឹងសាជាថ្មី។
ទោះជាយ៉ាងណាក៏ដោយ លោកប្រធានមន្ទីរបានបញ្ជាក់ថា ការហាមឃាត់នេះ ផ្តោតទៅលើតែរថយន្តដឹកទំនិញធំៗប៉ុណ្ណោះ ប៉ុន្តែសំរាប់រថយន្តតូចៗលក្ខណៈគ្រួសារ គឺនៅអាចធ្វើដំណើរឆ្លងកាត់បានជាធម្មតា។
ដោយឡែកសំរាប់បងប្អូនប្រជាពលរដ្ឋ ជាអ្នកលក់ដូរចំណីអាហារ នៅតំបន់ទំនប់បង្ហៀរបឹងស្នេហ៍នេះវិញ បែរជានិយាយទាំងអារម្មណ៍សប្បាយរីករាយថា ពួកគាត់ចង់អោយមានទឹកលិចផ្លូវបែបនេះ ព្រោះពេលទឹកលិច មានមនុស្សម្នាមកលេងទីនេះច្រើន ហើយក៏ធ្វើអោយពួកគាត់លក់ដាច់ខ្លាំងផងដែរ ៕
ចែករំលែកព័តមាននេះ