ខេត្តកំពង់ចាម ៖ ក្នុងរយៈពេល១ថ្ងៃទី១៦ ឧសភា ២០១១ នៅតំបន់ត្រើយខាងលិចទន្លេមេគង្គមានគ្រោះថ្នាក់ចរាចរណ៍កើតឡើងចំនួន៣លើក នៅស្រុក-ក្រុងចំនួន៣ គឺស្រុកបាធាយស្រុកព្រៃឈរ និងក្រុងកំពង់ចាម ដោយឆក់យកអាយុជីវិតមនុស្សចំនួន២នាក់ និងរងរបួសចំនួន៦នាក់
ខេត្តកំពង់ចាម ៖ ក្នុងរយៈពេល១ថ្ងៃទី១៦ ឧសភា ២០១១ នៅតំបន់ត្រើយខាងលិចទន្លេមេគង្គមានគ្រោះថ្នាក់ចរាចរណ៍កើតឡើងចំនួន៣លើក នៅស្រុក-ក្រុងចំនួន៣ គឺស្រុកបាធាយស្រុកព្រៃឈរ និងក្រុងកំពង់ចាម ដោយឆក់យកអាយុជីវិតមនុស្សចំនួន២នាក់ និងរងរបួសចំនួន៦នាក់ ។
តាមសេចក្តីរាយការណ៍ពីលោក សំ ណាល់ អធិការនគរបាលស្រុកបាធាយឲ្យដឹងថានៅវេលាម៉ោង៨ និង២៤នាទីព្រឹក ថ្ងៃទី១៦ឧសភា នៅលើផ្លូវជាតិលេខ៦A ក្នុងភូមិតាពយ ឃុំសំបួរ ស្រុកបាធាយ មានថៈឡេថង១គ្រឿងបើកពីកើតទៅលិចបានរេចង្កូតក្រឡាប់បណ្តាលឲ្យស្លាប់ម្នាក់ និងរបួស៣នាក់ ។ លោកអធិការនគរបាលស្រុកបាធាយបន្តថា អ្នកស្លាប់ឈ្មោះ គួន គីមសេង ភេទប្រុសអាយុ៥៣ឆ្នាំ និងអ្នករបួស ១-ឈ្មោះជួប ហាំង ភេទប្រុស អាយុ៤២ឆ្នាំ ជាអ្នកបើកថៈឡថេង ២-ឈ្មោះ ខេន គ្រុយ ភេទប្រុស អាយុ៥២ឆ្នាំ ៣-ឈ្មោះ វ័រ ម៉ាញ ភេទប្រុស អាយុ៣០ឆ្នាំ រស់នៅភូមិស្នាមពុក ឃុំវាលពុក ស្រុកឧត្តុង្គ ខេត្តកំពង់ស្ពឺទាំងអស់គ្នា ។
ចំណែកលោកវរសេនីយ៍ត្រី នួន សាម៉ន អធិការនគរបាលស្រុកព្រៃឈរបានឲ្យដឹងថា នៅវេលាម៉ោង៩ និង១០នាទីព្រឹកថ្ងៃទី១៦ ឧសភា នៅឃ្លាំងស្តុកទំនិញរបស់ឈ្មោះហេង ហួរ នៅភូមិតារាម ឃុំជ្រៃវៀន ស្រុកព្រៃឈរ រថយន្តម៉ាកហ៊ីយ៉ាន់ដាយពណ៌ខៀវ១គ្រឿង ពាក់ស្លាកលេខភ្នំពេញ 3A-2273 បើកដោយឈ្មោះ បូរ វិបុល ភេទប្រុស អាយុ២០ឆ្នាំ រស់នៅភូមិអណ្តូង ឃុំសូរ្យសែន ស្រុកព្រៃឈរ បានបើកថយក្រោយខ្វះការប្រុងប្រយ័ត្នបណ្តាល ឲ្យបុកឈ្មោះជិន កុយ ភេទប្រុសអាយុ២៥ឆ្នាំ រស់នៅភូមិស្វាយមីង ឃុំគ ស្រុកព្រៃឈរផ្ទប់ទៅនឹងជញ្ជាំងឃ្លាំងពេញទំហឹងស្លាប់ភ្លាម។អ្នកបើកបររថយន្តនោះបានរត់គេចខ្លួនបាត់ ។
ដោយឡែកលោក ស៊ាម យូសេង ប្រធានចរាចរនៃអធិការដ្ឋាននគរបាលក្រុងកំពង់ចាមប្រាប់ឲ្យដឹងថា នៅវេលាម៉ោង៩ និង៥០នាទីយប់ថ្ងៃទី១៦ ឧសភា នៅខាងលិចហាងសម័យទំនើបស្ថិតនៅភូមិបឹងស្នាយ សង្កាត់សំបួរមាស ក្រុងកំពង់ចាមរថយន្តម៉ាកនីស្សាន់១បាំងកន្លះ ពាក់ស្លាកលេខភ្នំពេញ2Q-9561 បើកបរដោយឈ្មោះរស់ ណារី ភេទប្រុស អាយុ ៤២ឆ្នាំ រស់នៅភូមិទី២ សង្កាត់វាលវង់ ក្រុងកំពង់ចាមបានបុកជាមួយម៉ូតូC125 ពាក់ស្លាក លេខកណ្តាល 1i-7180 បើកបរដោយឈ្មោះ យឹម ស៊ន ភេទប្រុស អាយុ៤៣ឆ្នាំ រស់នៅភូមិ អណ្តូងឃុំក្រឡា ស្រុកកំពង់សៀម ពេញទំហឹង បណ្តាលឲ្យអ្នកជិះម៉ូតូរងរបួសទាំង៣នាក់ ក្នុងនោះស្រ្តីម្នាក់រងរបួសធ្ងន់ត្រូវបាននាំទៅសង្គ្រោះនៅគ្លីនិកឯកជនមួយក្នុងក្រុងកំពង់ចាម ។ ចំពោះវត្ថុតាងទាំង៣ករណីនោះត្រូវបាននាំ ទៅរក្សាទុកនៅអធិការដ្ឋាននគរបាលស្រុកនីមួយៗដើម្បីដោះស្រាយតាមច្បាប់៕
ចែករំលែកព័តមាននេះ