ភ្នំពេញ៖ ក្រសួងអប់រំ យុវជន និងកីឡា បានប្រកាសពីការរៀបចំ​ប្រារព្ធទិវាគ្រូបង្រៀន នៅថ្ងៃទី៥តុលាស្អែកនេះ ក្រោមប្រធានបទ «គ្រូបង្រៀនជាសសរស្តម្ភនៃសាលារៀន ឆ្ពោះទៅរកឧត្តមភាព»។​ ពិធីជួបជុំនេះ នឹងធ្វើឡើង ក្រោមអធិបតីភាពដ៏ខ្ពង់ខ្ពស់​សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា។​

ទិវាគ្រូបង្រៀន ថ្ងៃ៥តុលា នៅឆ្នាំនេះ នឹងប្រារព្ធឡើង ក្រោមប្រធានបទ “គ្រូបង្រៀន ជាសសរស្តម្ភនៃសាលារៀន ឆ្ពោះទៅរកឧត្តមភាព”។

ក្រសួងអប់រំ យុវជន និងកីឡា បានប្រកាសថា​ ក្នុងឱកាសប្រារព្ធទិវាគ្រូបង្រៀន ឆ្នាំ២០២៣ នេះ ក្រសួង នឹងរៀបចំកម្មវិធី ដូចខាងក្រោម៖ ១-ពិធីប្រគល់ពានរង្វាន់ព្រះភិរម្យភាសាអ៊ូ ហៅ ង៉ុយ «ផ្នែកស្មូតកំណាព្យ» និងពានរង្វាន់​​សម្តេចសង្ឃរាជ ជួន ណាត «ផ្នែក​តែងនិពន្ធ» ដល់ជ័យលាភីចំណាត់​ថ្នាក់លេខ១ ដល់លេខ៣។ ២-បំពាក់គ្រឿងឥស្សរិយយស ព្រះរាជាណាចក្រ​កម្ពុជា និងមុនីសារភ័ណ្ឌ ថ្នាក់ធិបឌិន្ទ ជូនបុគ្គលិកអប់រំ ចំនួន ១១រូប ដែលបានបង្រៀន​សិស្សឱ្យទទួល​បាន​ពិន្ទុខ្ពស់ជាងគេ នៃមុខវិជ្ជានីមួយៗ ក្នុងការប្រឡង​សញ្ញាបត្រមធ្យម​សិក្សាទុតិយភូមិ សម័យ​ប្រឡង ថ្ងៃ៥ ខែធ្នូ ឆ្នាំ២០២២​។ ៣-បឋកថា ស្តីពី «បទពិសោធ​ក្នុងការដឹកនាំ និងគ្រប់គ្រង​សាលារៀនបឋមសិក្សា ឆ្ពោះទៅរកឧត្តមភាព» និង៤-វេទិកាតុមូល លើប្រធានបទ «ទស្សនៈរួម ស្តីពី សាលារៀនគំរូ»។

សូមបញ្ជាក់ថា ទិវាគ្រូបង្រៀន ត្រូវបានប្រារព្ធឡើង ក្នុងគោលបំណង ដើម្បី​បំផុសនូវគ្រប់គ្រឹះស្ថានសិក្សាទូទាំង​ប្រទេស អោយរំលឹកពីគុណបំណាច់របស់គ្រូបង្រៀន ដែលបានចំណាយ​ពេលវេលា កម្លាំងកាយ កម្លាំងចិត្ត ស្មារតី និងវិជ្ជាជីវៈ ក្នុងការបំពេញភារកិច្ចជាអ្នកបណ្តុះបណ្តាល ដើម្បីផ្ទេរនូវតម្លៃ ព្រមទាំងទូន្មាន អោយ​សិស្សានុសិស្ស ធ្វើតែអំពើល្អ ស្គាល់ខុស ស្គាល់ត្រូវ និងចេះគោរពចាស់ទុំ៕