នេប៉ាល់ ៖ ការរំពឹងទុកនៃការកើនឡើងភ្ញៀវទេសចរបរទេសរបស់ប្រទេសនេប៉ាល់ ទទួលរងបរាជ័យ ដោយមួយផ្នែកត្រូវបានស្តីបន្ទោសលើភាពតានតឹងរវាងប្រទេសឥណ្ឌា និងចិន ដែលនៅជិតខាងគ្នា។ នេះបើយោងតាមប្រភពពី BBC ចេញផ្សាយនៅថ្ងៃទី៤ ខែតុលា ឆ្នាំ២០២៣ នេះ ។
ខេត្ត Lumbini ដែលជាទីតាំងទាក់ទាញភ្ញៀវទេសចរបានឃើញចំនួនភ្ញៀវទេសចរជិត១លាននាក់ កាលពីឆ្នាំ២០២២ ហើយជាមួយចំនួននេះ រដ្ឋាភិបាលនេប៉ាល់កំពុងធ្វើការភ្នាល់ដ៏ធំមួយ តាមរយៈការចំណាយ៧៦លានដុល្លារអាមេរិក ដើម្បីសាងសង់អាកាសយានដ្ឋានអន្តរជាតិ Gautam Buddha International Airport ដែលបានបើកដំណើរ កាលពីខែឧសភា ឆ្នាំមុន។
អ្នកទេសចរក្នុងស្រុកជាចំនួនភាគច្រើននៃចំនួនភ្ញៀវទេសចរសរុបរបស់នេប៉ាល់ ក្នុងនោះ ចំនួនតិចជាង១ភាគ៣ បានធ្វើដំណើរមកពីប្រទេសឥណ្ឌា ។ អាកាសយានដ្ឋាន Gautam Buddha ដែលត្រូវបានស្គាល់ឈ្មោះមួយទៀតថា Bhairahawa អនុញ្ញាតឱ្យអ្នកទេសចរហោះហើរត្រង់ទៅកាន់ខេត្ត Lumbini ជំនួសឱ្យការធ្វើដំណើរដោយយានជំនិះចម្ងាយ២៥០គីឡូម៉ែត្រពីរដ្ឋធានី Kathmandu នៃខេត្ត Bagmati ។
ប៉ុន្តែទោះយ៉ាងណាក៏ដោយ ការរីកចម្រើននៃការធ្វើដំណើរដែលបានរំពឹងទុកមិនទាន់សម្រេចបានផ្លែផ្កានៅឡើយទេ ហើយអ្វីដែលអ្នកជំនាញក្នុងឧស្សាហកម្មទេសចរណ៍បានសន្មត់នោះ គឺខ្វះការផ្សព្វផ្សាយ និងការលើកទឹកចិត្តដល់ក្រុមហ៊ុនអាកាសចរណ៍អន្តរជាតិ ។
អ្នកជំនាញនៅក្នុងឧស្សាហកម្មទេសចរណ៍អះអាងថា ការមកដល់របស់ភ្ញៀវទេសចរ ជាពិសេស ពីក្រៅប្រទេសនឹងកើនឡើង ប្រសិនបើមានជើងហោះហើរអន្តរជាតិកំណត់ពេលទៀងទាត់ ដែលដំណើរការចេញពីអាកាសយានដ្ឋាន Bhairahawa ។ ប៉ុន្តែមន្ត្រីនេប៉ាល់បាននិយាយថា ទីក្រុងដេលីរបស់ឥណ្ឌា បានបដិសេធមិនអនុញ្ញាតឱ្យយន្តហោះដឹកអ្នកដំណើរធំៗ ហោះហើរទៅទិសខាងលិច តាមដែនអាកាសរបស់ខ្លួន ដែលមានន័យថា យន្តហោះមិនអាចហោះហើរឆ្លងកាត់ឥណ្ឌា ដើម្បីទៅដល់ព្រលានយន្តហោះ Bhairahawa របស់នេប៉ាល់បាននោះទេ ដោយការចូលទៅកាន់ដែនអាកាសឥណ្ឌាមានន័យថា ជើងហោះហើរប្រើរយៈពេលខ្លី និងតម្លៃទាប ។
ទន្ទឹមជាមួយគ្នានោះផងដែរ គ្រប់គ្នានៅក្នុងប្រទេសនេប៉ាល់ជឿថា ឥណ្ឌាមានការប្រុងប្រយ័ត្នខ្ពស់ ចំពោះការពិតដែលថា ព្រលានយន្តហោះ Bhairahawa របស់នេប៉ាល់ ត្រូវបានសាងសង់ដោយអាកាសយានដ្ឋានអាកាសចរណ៍ស៊ីវិលភាគពាយ័ព្យរបស់ប្រទេសចិន ។ អាកាសយានដ្ឋាននេះ ក៏
មានទីតាំងនៅជិតព្រំដែននេប៉ាល់ជាមួយនឹងឥណ្ឌា ពោលនៅភាគខាងលិច កន្លែងដែលកងទ័ពយក្សអាស៊ីទាំង២ បានប៉ះទង្គិចគ្នាកាលពីខែធ្នូ ឆ្នាំមុន នៅក្នុងតំបន់ Arunachal Pradesh ត្រឹមតែ៧ខែប៉ុណ្ណោះ បន្ទាប់ពីអាកាសយានដ្ឋាននេះ បើកដំណើរការជើងហោះហើរអន្តរជាតិ ។
ស្ថានភាពតាមព្រំដែនត្រូវបានឆ្លុះបញ្ចាំងដោយភាពតានតឹងផ្នែកនយោបាយ ដែលកំពុងកើនឡើងជាមួយនឹងទំនាក់ទំនងដ៏តានតឹងរវាងនាយករដ្ឋមន្ត្រីឥណ្ឌា ណារិនដ្រា ម៉ូឌី (Narendra Modi) និងប្រធានាធិបតីចិន ស៊ី ជីនពីង (Xi Jinping) ។ ក្រុមអ្នកសង្កេតការណ៍អះអាងថា ការពិភាក្សាគឺជាផ្លូវតែមួយគត់ឆ្ពោះទៅមុខ ព្រោះប្រទេសប្រដាប់អាវុធនុយក្លេអ៊ែរទាំង២មានការខាតបង់ច្រើន៕
(ប្រភពពី BBC)
ចែករំលែកព័តមាននេះ