ចុះរុះរើសំណង់លើដីចំណីព្រែកកំពង់បាយត្រើយខាងលិច ក្រោយម្ចាស់សំណង់សុំពន្យារពេលអស់មួយរយៈ
- កំពត
ខេត្តកំពត ៖ កម្លាំងគណៈបញ្ជាការឯកភាពរដ្ឋបាលក្រុងកំពតបានចុះរុះរើសំណង់មិនរៀបរយលើដី
ខេត្តកំពត ៖ កម្លាំងគណៈបញ្ជាការឯកភាពរដ្ឋបាលក្រុងកំពតបានចុះរុះរើសំណង់មិនរៀបរយលើដីចំណីព្រែកកំពង់បាយត្រើយខាងលិច ស្ថិតក្នុងភូមិសាស្ត្រសង្កាត់អណ្ដូងខ្មែរ បន្ទាប់ពីឱសានវាទនៃសេចក្តីជូនដំណឹងបានចូលមកដល់។
លោក ម៉ែន វណ្ណារ៉ា អភិបាលរងក្រុងកំពតបានប្រាប់ឱ្យដឹងថា ផ្អែកតាមកាលកំណត់នៃលិខិតជូនដំណឹងរបស់សាលាក្រុងបានចូលមកដល់ ហើយប្រជាពលរដ្ឋជាម្ចាស់សំណង់ហាក់យឺតយ៉ាវ កាលពីព្រឹកថ្ងៃទី២ ខែតុលា ឆ្នាំ២០២៣ កន្លងទៅនេះ លោក លាង រឿនសុធី អភិបាលក្រុងកំពតបានដឹកនាំកម្លាំងគណ:បញ្ជាការឯកភាពរដ្ឋបាលក្រុង និងយកគ្រឿងចក្រចុះរុះរើសំណង់លើដីចំណីព្រែកកំពង់បាយត្រើយខាងលិចក្នុងសង្កាត់អណ្តូងខ្មែរដើម្បីទុកលទ្ធភាពជូនអាជ្ញាធរខេត្តស្ថាបនាផ្លូវ និងសួនច្បារបម្រើប្រយោជន៍រួម។
ប្រតិបត្តិការនេះបានប្រព្រឹត្តទៅជាធម្មតាដោយមិនមានភាពរាំងស្ទះបង្កឡើងពីជនណាម្នាក់ឡើយ។
អ្វីដែលហាក់យឺតយ៉ាវនោះ ដោយសារបងប្អូនប្រជាពលរដ្ឋខ្វះឧបករណ៍ក្នុងការរុះរើ ទើបតម្រូវឱ្យរដ្ឋបាលក្រុងយកគ្រឿងចក្រចុះរុះរើសំណង់ជាប្រភេទបេតុង។
លោកអភិបាលរងក្រុងបានបញ្ជាក់ថា ប្រតិបត្តិការនេះនឹងបន្តធ្វើនៅព្រឹកថ្ងៃទី៣ ខែតុលានេះទៀតទើបរួចរាល់ក្នុងចំណោមសំណង់ជាង១០កន្លែងចាប់ពីស្ពានឥន្ទធនូដល់ចំណតទូកទេសចរណ៍ដែលមានផ្លូវបេតុងស្រាប់។ ចំណែកសំណង់ចាប់ពីស្ពានរថភ្លើងដល់ស្ពានឥន្ទធនូ រដ្ឋបាលក្រុងនឹងចាប់ផ្តើមអនុវត្តក្រោយមានសេចក្តីណែនាំពីឯកឧត្តមអភិបាលខេត្តកំពតបន្តទៀត។
សូមរំលឹកថា ខណ:ពេលមន្ត្រីជំនាញចុះវាស់វែងកំណត់ទីតាំងដើម្បីស្ថាបនាសមិទ្ធផលថ្មីលើដីឆ្នេរព្រែកកំពង់បាយត្រើយខាងលិចកាលពីដើមខែសីហា ឆ្នាំ១០២៣ ប្រជាពលរដ្ឋបានធ្វើកិច្ចសន្យារុះរើដោយខ្លួនឯងកំណត់ត្រឹមថ្ងៃទី៣០ ខែកញ្ញា ឆ្នាំ២០២៣។ ជាដំបូងនេះ រដ្ឋបាលក្រុងកំពតបានចាប់អនុវត្តពីចំណុចស្ពានឥន្ទធនូរហូតដល់ស្ពានត្រើយកោះក្នុងទឹកដីភូមិទ្វីខាងត្បូង សង្កាត់អណ្តូងខ្មែរ។ ជំហានបន្ទាប់ រដ្ឋបាលក្រុងនឹងធ្វើពីចំណុចស្ពានរថភ្លើងដល់ស្ពានឥន្ទធនូក្នុងភូមិទ្វីខាងជើង សង្កាត់អណ្តូងខ្មែរបន្តទៀត។ ក្រោយពីរុះរើសំណង់រួចរាល់ រដ្ឋបាលខេត្តនឹងចាប់អនុវត្តគម្រោងកែលម្អសោភ័ណភាពដោយស្ថាបនាផ្លូវមួយខ្សែ និងរៀបចំច្រាំងព្រែកពីចំណុចស្ពានរថភ្លើងរហូតដល់ស្ពានត្រើយកោះ៕
ចែករំលែកព័តមាននេះ