ខេត្តកណ្តាល ៖ ស្ត្រីម្នាក់បានស្លា.ប់បាត់បង់ជីវិតនៅនឹងកន្លែងដោយសារម៉ូតូមួយគ្រឿងបើកបរយ៉ាងលឿនបុកពេញទំហឹង ក្នុងខណៈពេលដែលគាត់កំពុងដើរឆ្លងផ្លូវ ហើយម៉ូតូដែលបុកនោះក៏បានដួលបណ្តាលឱ្យអ្នកបើកបររងរបួសធ្ងន់ផងដែរ ។ ឧប្បត្តិហេតុនោះបានកើតឡើងកាលពីវេលាម៉ោង៦និង៥០នាទីព្រឹកថ្ងៃទី១៧ ខែឧសភា ឆ្នាំ២០១១
ខេត្តកណ្តាល ៖ ស្ត្រីម្នាក់បានស្លាប់បាត់បង់ជីវិតនៅនឹងកន្លែងដោយសារម៉ូតូមួយគ្រឿងបើកបរយ៉ាងលឿនបុកពេញទំហឹង ក្នុងខណៈពេលដែលគាត់កំពុងដើរឆ្លងផ្លូវ ហើយម៉ូតូដែលបុកនោះក៏បានដួលបណ្តាលឱ្យអ្នកបើកបររងរបួសធ្ងន់ផងដែរ ។
ឧប្បត្តិហេតុនោះបានកើតឡើងកាលពីវេលាម៉ោង៦និង៥០នាទីព្រឹកថ្ងៃទី១៧ ខែឧសភា ឆ្នាំ២០១១ នៅលើកំណាត់ផ្លូវជាតិលេខ៤ ត្រង់ចំណុចភូមិកៅ ឃុំបែកចាន ស្រុកអង្គស្នួល ។ ជនរងគ្រោះដែលស្លាប់បាត់បង់ជីវិតនោះឈ្មោះឡុង អន អាយុ៤០ឆ្នាំ ជាកម្មការិនីរោងចក្រកាត់ដេរ មានទីលំនៅភូមិថ្មី ឃុំរលាំងកែន ស្រុកកណ្តាលស្ទឹង ខេត្តកណ្តាល ។ រីឯម៉ូតូដែលបើកបុកជនរងគ្រោះនោះម៉ាកហុងដា សេ១២៥ ពណ៌ខ្មៅ ពាក់ស្លាកលេខភ្នំពេញ 1J-4375 បើកបរដោយបុរសម្នាក់ឈ្មោះប៉ាង ខែ អាយុ៣៦ឆ្នាំ មានទីលំនៅភូមិចាន់ត្រក ឃុំក្រាំងស្គារ ស្រុកទឹកផុស ខេត្តកំពង់ឆ្នាំង រងរបួសធ្ងន់ ។
តាមប្រភពព័ត៌មានបានឱ្យដឹងថា មុនពេលកើតហេតុខាងលើជនរងគ្រោះបានជិះរ៉ឺម៉កម៉ូតូចេញពីផ្ទះទៅធ្វើការរោងចក្រនៅម្តុំកន្លែងកើតហេតុនោះ ។ លុះពេលទៅដល់គាត់បានចុះដើរឆ្លងផ្លូវក្នុងទិសដៅពីត្បូងទៅជើង ពេលឆ្លងបានបន្តិចគាត់បានឈប់នៅលើផ្លូវហើយមានការស្ទាក់ស្ទើរចង់ត្រឡប់ក្រោយបន្តិចចង់ដើរទៅមុខបន្តិច។ ប្រភពដដែលបានបន្តទៀតថា ស្របពេលនោះ ស្រាប់តែម៉ូតូខាងលើបើកបរក្នុងល្បឿនលឿនក្នុងទិសដៅពីលិចទៅកើតមកដល់ល្មម ហើយបានបុកពេញទំហឹងបណ្តាលឱ្យស្លាប់ ភ្លាមៗនៅនឹងកន្លែងតែម្តង ។ ដោយឡែកម៉ូតូដែលបើកបុកនោះក៏បានដួលបណ្តាលឱ្យអ្នកបើកបររងរបួសធ្ងន់ ហើយត្រូវគេបញ្ជូនទៅសង្គ្រោះនៅគ្លីនិកឯកជនក្បែរនោះភ្លាមៗដែរ ។
ក្រោយពេលកើតហេតុ សាកសពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យនៅស្រុកកំណើត ចំណែកឯម៉ូតូត្រូវបានកម្លាំងប៉ូលិសចរាចរស្រុកអង្គស្នួលនាំយកទៅរក្សាទុករង់ចាំការដោះស្រាយ ៕
ចែករំលែកព័តមាននេះ